రాష్ట్రంలో సగానికిపైగా హత్యలకు వివాదాలు.. వివాహేతర సంబంధాలే కారణం

ఒకే కుటుంబానికి చెందిన వారైనా... చిన్నతనం నుంచి కలిసిమెలిసి పెరిగిన వారైనా సరే... చిన్న తగాదా ఇద్దరి మధ్య అగాధం పెంచేస్తోంది. అదే తీవ్రరూపు దాల్చి కక్షలకు కారణమై హత్యలకు దారి తీస్తోంది. మరోపక్క అనైతిక సంబంధాల ఆరాటం.. ప్రాణాలు తీసేందుకు పురికొల్పుతోంది. భూ వివాదాలు, ఆర్థిక లావాదేవీల్లో తలెత్తే తగాదాలు.. ఎదుటివారిని చంపేసేంతగా ప్రతీకారాన్ని పెంచేస్తున్నాయి.

2017-2019 మధ్య మూడేళ్లలో రాష్ట్రవ్యాప్తంగా 2,859 హత్యకేసులు నమోదయ్యాయి. వీటిలో 1,660 (58.60 శాతం) ఘటనలకు వివాదాలు, వివాహేతర సంబంధాలే కారణాలు. బాధితులుగా మారుతున్న వారిలో ఎక్కువ మంది 18-30 ఏళ్ల వారే.

దగ్గరివారే..

2017-19 మధ్య వివాదాల వల్ల 1,139 మంది హత్యలకు గురయ్యారు. కుటుంబ తగాదాలు, భూ వివాదాలు, నగదు లావాదేవీల్లో తలెత్తిన విభేదాలు, చిన్నచిన్న గొడవల్లో ప్రత్యర్థులు వారిని హతమార్చారు. వీరిలో 492 మంది (43.19 శాతం) కుటుంబ వివాదాల వల్లే హత్యలకు గురయ్యారు

* పలు ఘటనల్లో హతులు, హంతకులు ఒక కుటుంబానికి చెందినవారే. ఆస్తి తగాదాల వల్లే ఈ పరిస్థితి తలెత్తిందని పోలీసులు చెబుతున్నారు. ముఖ్యంగా సోదరుల మధ్య ఇలాంటి విభేదాలు అధికమని విశ్లేషిస్తున్నారు.

అడ్డుగా ఉంటున్నారని..

* వివాహేతర సంబంధాల వల్ల మూడేళ్లలో 521 మందిని చంపేశారు. ఏటా ఈ ఒక్క కారణంతో సగటున 17-18 శాతం హత్యలు జరుగుతున్నాయి.

* వివాహేతర సంబంధానికి అడ్డు తొలగించుకోవాలనే ఉద్దేశంతో కొందరు, తమ వైవాహిక జీవితంలోకి ప్రవేశించి కుటుంబాన్ని చిన్నాభిన్నం చేస్తున్నారనే కారణంతో మరికొందరు ఈ హత్యలకు పాల్పడుతున్నారు. వివాహేతర సంబంధాలు కొనసాగిస్తున్నారనే అనుమానంతోనూ ఇంకొంతమందిని చంపేస్తున్నారు. ఈ హత్యల్లో అంతమవుతున్న వారిలో ఎక్కువమంది 18-30 ఏళ్లకు చెందినవారే ఉంటున్నారు.

ఇదీ చదవండి: సైబర్ నేరగాళ్ల మోసాల పరంపర... స్కాన్​ చేస్తే నగదు మాయం