విశాఖ విషవాయువు విషాదంపై జనంలో ఆగ్రహం కట్టలు తెంచుకుంది. బాధిత కుటుంబాలు ఆక్రోశంతో రగిలిపోయాయి. మృతదేహాలతో సహా వారు ఎల్జీ పాలిమర్స్ సంస్థ ఎదుట బైఠాయించి ఆందోళనకు దిగారు. పరిశ్రమను తమ ఊరి నుంచి తరలించాలని నినాదాలతో హోరెత్తించారు. ఊరిజనమంతా ఒక్కసారిగా సంస్థ ప్రాంగణంలోకి చొచ్చుకెళ్లగా ఓ దశలో పరిస్థితులు చేయి దాటిపోయే పరిస్థితి ఏర్పడింది. అదే సమయంలో పరిశ్రమను సందర్శించిన డీజీపీ గౌతం సవాంగ్‌కు సిబ్బంది ఆయుధాలతో సహా రక్షణ వలయంగా ఏర్పడాల్సిన పరిస్థితి నెలకొంది.
కట్టలు తెగిన ఆగ్రహం
ఒక్క ఘటనతో ఊరిని వల్లకాడులా మార్చేశారని.. స్థానికులు నిప్పులు చెరిగారు. పచ్చగా ఉన్న గ్రామాలను పనికిరాకుండా చేశారని మండిపడ్డారు. న్యాయం అడిగినందుకు... అరెస్టు చేయడం ఏంటని నిలదీశారు.
పరిశ్రమ స్పందించదా..?
ఇంత ఘోరం జరిగినా పరిశ్రమ తగిన రీతిలో స్పందించలేదని స్థానికులు రగిలిపోతున్నారు. యాజమాన్యం తరఫున బాధితులకు ఇంత వరకూ ఒక్క సమాచారం లేదన్నారు. కనీసం గ్రామాల్లోకి వచ్చి కూడా చూడలేదని ఆగ్రహం వ్యక్తం చేశారు. అర్ధరాత్రి ప్రమాదకర గ్యాస్ లీకైతే.. వాసనను బట్టి తమను తాము రక్షించుకున్నామే కానీ.. సంస్థ నుంచి కనీసం ఎవరూ అప్రమత్తం చేయలేదని మండిపడ్డారు. గాలి, నీరు కలుషితం అయితే కనీసం పరీక్షలు జరిపించలేదన్నారు. మూడు రోజులుగా ఐదు గ్రామాల ప్రజలు బయట తలదాచుకుంటుంటే.. వారు ఉండటానికి చోటు కూడా పరిశ్రమ చూపించలేదని.. స్వచ్చంద సంస్థలు ఆహరం పెట్టాయి కానీ.. కనీసం కంపెనీ బాధితుల కడుపు నింపే ప్రయత్నం కూడా చేయలేదని తీవ్రంగా ఆగ్రహం వ్యక్తం చేశారు.
ప్రభుత్వం స్పందించదా..?
ఓ వైపు ప్రజలు ప్రాణాలు పోతున్నా.. పరిశ్రమ విషయంలో ప్రభుత్వం ఎందుకు ఉదాసీనంగా వ్యవహరిస్తుందని జనం మండిపడ్డారు. పరిశ్రమను తరలిస్తామని ముఖ్యమంత్రి జగన్ ఎందుకు ప్రకటించడం లేదని ప్రశ్నిస్తున్నారు. పరిశ్రమపై చర్య తీసుకోకపోగా.. నేతలు పరిశ్రమ లోపలికి రాకపోకలు సాగిస్తూ తమను విస్మరించారని ఆవేదన వ్యక్తం చేస్తున్నారు.
డబ్బుతో ప్రాణాలొస్తాయా..?
ప్రమాదం జరిగిన తర్వాత పరిశ్రమ వ్యవహరించిన తీరు తీవ్ర విమర్శలకు దారితీసింది. పరిశ్రమ ప్రతినిధులు ఎవరూ గ్రామాలకు రాకపోవడం గ్రామస్థుల ఆగ్రహానికి కారణమైంది. ప్రభుత్వం కూడా పరిహారం ఇస్తున్నామంటూ వ్యవహరించడంపై స్థానికుల్లో అసంతృప్తి ఉంది. డబ్బుతో ప్రాణాలు వచ్చేస్తాయా అని పలువురు ప్రశ్నించారు. డబ్బు ఇవ్వడం కన్నా.. పరిశ్రమను తరలిస్తున్నాం అంటేనే తాము ఎక్కువ సంతోషిస్తామని వారు చెప్పారు. ముఖ్యమంత్రి తమ గ్రామాలను సందర్శించాల్సిందని అన్నారు.
తీవ్ర ఉద్రిక్తత
పాలిమర్స్ వద్ద ఆందోళనల సందర్భంగా గేటు ఎదుట టెంట్ వేసేందుకు స్థానికులు ప్రయత్నించడం తీవ్ర ఉద్రిక్తత, తోపులాటకు దారితీసింది. టెంటు వేసి మృతదేహాలతో సహా ఆందోళన చేసే ప్రయత్నాన్ని అడ్డుకొనేందుకు పోలీసులు తీవ్రంగా శ్రమించారు. చివరకు గేటు ముందున్న ఆందోళనకారులను చెల్లాచెదురు చేసిన పోలీసులు అతి కష్టంమీద పరిస్థితిని అదుపులోకి తెచ్చారు. పోలీసుల హెచ్చరికలతో స్థానికులు మృతదేహాలను అక్కడి నుంచి తరలించారు.
ఇదీ చూడండి..
