తెదేపా నేత కళా వెంకట్రావు అరెస్టును తెదేపా అధినేత చంద్రబాబు ఖండించారు. దేవాలయాలపై దాడులు, దేవుళ్ల విగ్రహాల విధ్వంసాన్ని ఖండించడం కళా చేసిన తప్పా? అని ప్రశ్నించారు. రాష్ట్రంలో ప్రాథమిక హక్కులను కాలరాస్తున్నారని విమర్శించారు. రాష్ట్రంలో బీసీ నాయకత్వంపై కుట్రలు చేస్తున్నారని ఆరోపించారు. ఈ రాక్షస చర్యలకు ప్రజలే బుద్ది చెబుతారని హెచ్చరించారు. కళా వెంకట్రావును తక్షణమే బేషరతుగా విడుదల చేసి తప్పుడు కేసులను ఎత్తివేయాలని డిమాండ్ చేశారు.
తాను అవినీతి కుంభకోణాల్లో జైలుకు వెళ్లాడు కాబట్టి, ఏదో ఒక తప్పుడు కేసులో తెదేపా నేతలను ఇరికించి జైళ్లకు పంపాలని చూడటం జగన్రెడ్డి సైకో మనస్తత్వానికి అద్దం పడుతోందని దుయ్యబట్టారు. కళా వెంకట్రావ్ వివాద రహితుడు, సౌమ్యుడు, అజాతశత్రువని పేర్కొన్నారు. అలాంటి వ్యక్తిపై తప్పుడు కేసులు పెట్టి అక్రమ నిర్బంధం చేయటం ఆటవిక చర్యని ధ్వజమెత్తారు. రామతీర్థంలో రాముడి తల నరికివేస్తే, చూడటానికి వెళ్లడమే నేరమా? అని నిలదీశారు.
అరెస్టును ఖండించిన అచ్చెన్నాయుడు..
మాజీ మంత్రి కళా వెంకట్రావు అరెస్టును తెదేపా రాష్ట్ర అధ్యక్షుడు అచ్చెన్నాయుడు ఖండించారు. రాత్రి సమయంలో ఇంటికెళ్లి ఉగ్రవాదులను చుట్టుముట్టినట్లు ఇంటి చుట్టూ 300 మంది పోలీసులతో రావడం సిగ్గుచేటని ధ్వజమెత్తారు. తక్షణమే వెంకట్రావును విడుదల చేయాలని.. లేదంటే పోలీస్ స్టేషన్ ముట్టడించి రాష్ట్రవ్యాప్తంగా ఆందోళనకు దిగుతామని హెచ్చరించారు. ఈ ఘటనకు వైకాపా తగిన మూల్యం చెల్లించుకుంటుందన్నారు. తిరుపతిలో తెదేపా ప్రచారానికి వెళ్తుండటంతో వైకాపాకు భయం పట్టుకుందని దుయ్యబట్టారు. రామతీర్థంలో విగ్రహాలు ధ్వంసం చేసిన వారిని పట్టుకోకుండా బీసీ నేతను అరెస్టు చేయడం దుర్మార్గమని ధ్వజమెత్తారు.
ఇదీ చూడండి: తెదేపా నేత కళా వెంకట్రావు అరెస్టు
