CPS PROTEST ACROSS STATEWIDE : సీపీఎస్ అమలు చేసిన సెప్టెంబర్‌ 1ని విద్రోహదినంగా పాటిస్తున్న ఉద్యోగులు.. రాష్ట్రవ్యాప్తంగా నల్లబ్యాడ్జీలతో నిరసన తెలిపారు. పోలీసుల అనుమతి నిరాకరణతో చలో విజయవాడ, సీఎం నివాస ముట్టడిని వాయిదా వేసిన ఉద్యోగులు.. నిరసన కార్యక్రమాలు యధావిధిగా చేపట్టారు. విజయవాడలోని పంచాయతీరాజ్ కార్యాలయం వద్ద ఉద్యోగ సంఘాలు భారీ ఎత్తున ఆందోళనకు దిగాయి. ఇచ్చిన హామీని అమలు చేయమంటే నిర్బంధాల పేరుతో ప్రభుత్వం.. ఉపాధ్యాయులు, ఉద్యోగులను వేధిస్తోందన్న నేతలు.. ఇది మంచి పద్ధతి కాదని విజ్ఞప్తి చేశారు. ఎలాంటి పోరాటాలకైనా తాము సిద్ధమన్న వారు.. సీపీఎస్ రద్దు చేయాల్సిందేనని తేల్చిచెప్పారు.
నెల్లూరు కలెక్టర్‌ కార్యాలయం ఎదుట ఏపీ జేఏసీ ఆందోళన చేపట్టింది. ప్రధాన ద్వారం వద్ద వర్షంలోనూ ఐకాస నేతలు ధర్నా నిర్వహించారు. సీపీఎస్ రద్దుతో పాటు దీర్ఘకాలంగా పెండింగ్‌లో ఉన్న ఉద్యోగ సమస్యలను ప్రభుత్వం తక్షణమే పరిష్కరించాలని డిమాండ్‌ చేశారు. కర్నూలు కలెక్టరేట్‌ ఎదుట నిర్వహించిన నిరసనలో ఏపీజేఏసీ నేత హృదయరాజు, జిల్లా ఉద్యోగ సంఘాల నేతలు పాల్గొన్నారు. ఓపీఎస్ అమలుతో పాటు ఉద్యోగులపై పెట్టిన కేసులు ఉపసంహరించుకోవాలని డిమాండ్‌ చేశారు. ఎమ్మిగనూరులో తహసీల్దార్‌ కార్యాలయం ముందు నల్ల బ్యాడ్జీలు ధరించి నిరసన తెలిపారు. ఉద్యోగ, ఉపాధ్యాయ, పెన్షనర్‌ సంఘాల ఐకాస నాయకులు నంద్యాలలో ర్యాలీ నిర్వహించారు. కలెక్టరేట్‌ కార్యాలయ ఆవరణలో ధర్నా చేపట్టారు.
సీపీఎస్ రద్దు కోరుతూ ఏలూరులో ఎర్రజెండాలు, నల్లబ్యాడ్జీలు ధరించి నినాదాలు చేశారు. లేకపోతే దశలవారీగా ఆందోళనలు ఉద్ధృతం చేస్తామన్నారు. కమిటీలతో కాలయాపన చేస్తున్న ప్రభుత్వం ఇతర రాష్ట్రాల్లో అమలు చేస్తున్న విధానాల కోసం.. మంత్రివర్గ ఉపసంఘంతో పాటు ఐఏఎస్లతో కూడిన కమిటీలను పంపాలని డిమాండ్‌ చేశారు. విశాఖ ఏపీఎన్జీవో కార్యాలయం ముందు ఉద్యోగులు నల్ల బ్యాడ్జీలతో నిరసన తెలిపారు. సీపీఎస్ రద్దు సహా అన్ని సమస్యలు పరిష్కరించాలని డిమాండ్‌ చేశారు. గతంలో ఎంపీగా, ప్రతిపక్ష నేతగా ఉన్న సమయంలో తాము చేసిన పోరాటం జగన్‌కి తెలియదా అని ప్రశ్నించారు.
విజయనగరం, పార్వతీపురం మన్యం జిల్లా కలెక్టరేట్ల వద్ద ఉద్యోగులు నిరసన ప్రదర్శన నిర్వహించారు. సీపీఎస్ రద్దు మినహా ఎలాంటి ప్రత్యామ్నాయాలనూ ఒప్పుకోబోమని తేల్చిచెప్పారు. శ్రీకాకుళం ఎన్జీవో కార్యాలయం ముందు ఆందోళనలు నిర్వహించిన ఉద్యోగులు.. ఇచ్చిన హామీని నిలబెట్టుకోవాలని సీఎం జగన్‌కు సూచించారు. అల్లూరి సీతారామరాజు జిల్లా పాడేరు ఐటీడీఏ వద్ద గిరిజన సంక్షేమ ఉద్యోగులు ప్రభుత్వానికి వ్యతిరేకంగా నినాదాలు చేశారు. సీపీఎస్ వద్దు ఓపీఎస్ ముద్దు అంటూ హుకుంపేట, జి.మాడుగులలోనూ నినాదాలు చేశారు.
ఇవీ చదవండి:
