అన్నదాత కంట 'అకాల వర్షం'

కరోనా వైరస్‌, లాక్‌డౌన్‌ ప్రభావాలతో ఇప్పటికే ఇబ్బందుల్లో ఉన్న రైతులను అకాల వర్షాలు భారీ దెబ్బతీశాయి. ఉత్తరాంధ్ర, రాయలసీమ జిల్లాల్లో మంగళ, బుధవారాల్లో ఈదురు గాలులతో కూడిన వానలు అరటి, మామిడి, బత్తాయి, మొక్కజొన్న, వరి పంటలకు నష్టం కలిగించాయి. అన్నదాతలకు కడగండ్లను మిగిల్చాయి. ఈదురుగాలుల ప్రభావంతో పలుచోట్ల అనేక వృక్షాలు నేలకూలాయి. పలు ప్రాంతాల్లో విద్యుత్‌ సరఫరాకు అంతరాయం కలిగింది. మరోవైపు గురు, శుక్రవారాల్లో రాష్ట్రంలో పలు చోట్ల ఉరుములు, మెరుపులతో కూడిన వర్షాలు పడతాయన్న వాతావరణ సూచన రైతుల్లో ఆందోళన కలిగిస్తోంది.

అకాల వర్షాలు రాయలసీమ, ఉత్తరాంధ్ర రైతుల్ని వణికించాయి. మంగళ, బుధవారాల్లో ఉరుములు, మెరుపులు, పెనుగాలులతో వానలు కురవడంతో కొన్ని చోట్ల ఉద్యాన పంటలు దెబ్బతిన్నాయి. అనంతపురం జిల్లా హిందూపురంలో గరిష్ఠంగా 100 మిల్లీమీటర్ల వర్షపాతం నమోదైంది. జిల్లాలో అరటి, మామిడి, బత్తాయి, మొక్కజొన్న, వరి పంటలకు నష్టం వాటిల్లింది. చిత్తూరు జిల్లాలో బుధవారం వేకువ జాము నుంచి మూడు గంటల పాటు వాన కురిసింది. అయిదు మండలాలు మినహా జిల్లా వ్యాప్తంగా వర్షాలు పడ్డాయి. కడప జిల్లా రాయచోటి ప్రాంతంలో ఈదురు గాలులతో కూడిన భారీ వర్షం కురిసింది. పెండ్లిమర్రి, యర్రగుంట్ల తదితర మండలాల్లోనూ వర్ష ప్రభావం ఉంది. అరటితోపాటు పలు రకాల ఉద్యాన పంటలు దెబ్బతిన్నాయి. నంద్యాల డివిజన్‌లో ఆళ్లగడ్డ, శిరువెళ్ల, నంద్యాల ప్రాంతాల్లో భారీ వర్షం కురిసింది. అరటి, మామిడి, బొప్పాయి, మునగ తదితర పంటలకు రూ.9 కోట్ల నష్టం వాటిల్లింది.

బుధవారం ఉత్తరాంధ్రలోని విశాఖపట్నం జిల్లా నర్సీపట్నం, తూర్పు గోదావరి జిల్లా తొండంగి, శ్రీకాకుళం జిల్లా రాజాం తదితర ప్రాంతాల్లో 44 మి.మీ నుంచి 67 మి.మీ వరకు వర్షపాతం నమోదైంది. తుని, గోకవరం, తొండంగి, కాట్రేనికోన తదితర మండలాల్లో ఈదురుగాలుల ప్రభావంతో కొన్నిచోట్ల విద్యుత్తు సరఫరాకు అంతరాయం ఏర్పడింది. చెట్లు నేల కూలాయి. రెండు రోజులుగా కురుస్తున్న వర్షాలతో వరి రైతులు పెద్ద ఎత్తున దెబ్బతిన్నారు. కోసి పనలమీదున్న వరి నీట తడిసింది. ఆరబెట్టిన ధాన్యం నీటిలో నానింది.

వచ్చే రెండు రోజులూ వానలు

రాష్ట్రంలో వచ్చే రెండు రోజుల పాటు ఉరుములు, మెరుపులతో వర్షాలు కురిసే అవకాశం ఉందని అమరావతి వాతావరణ కేంద్రం తెలిపింది. గంటకు 30 కిలోమీటర్ల నుంచి 40 కిలోమీటర్ల వేగంతో గాలులు వీస్తాయని సూచించింది. ఉత్తర సుమత్రా, పరిసర ప్రాంతాల్లో 3.6 కిలోమీటర్ల ఎత్తు వరకు ఉపరితల ఆవర్తనం కొనసాగుతున్నట్లు పేర్కొంది. దీని ప్రభావంతో దక్షిణ అండమాన్‌ పరిసర ప్రాంతాల్లో అల్పపీడనం ఏర్పడి.. తర్వాత 48 గంటల్లో వాయుగుండంగా బలపడే అవకాశం ఉందని వెల్లడించింది.

అన్నదాత కంట 'అకాల వర్షం'

బెంగళూరులో భారీ వర్షం

భారీ వర్షం బెంగళూరు నగరవాసులను ఉక్కిరిబిక్కిరి చేసింది. బుధవారం వేకువజామున 4 గంటలకు ప్రారంభమైన వర్షం ఉదయం తొమ్మిది గంటల వరకు కురుస్తూనే ఉంది. కోరమంగల, హెచ్‌ఎస్‌ఆర్‌ లేఔట్‌, మారేనహళ్లి, ఆనేకల్‌, ఎలక్ట్రానిక్‌ సిటీ, కేఆర్‌పురం, బొమ్మసంద్ర, హొంగసంద్ర, మైకోలేఔట్‌, శాంతలానగర తదితర ప్రాంతాల్లోని లోతట్టు ప్రాంతాలు జలమయమయ్యాయి. కొన్ని చోట్ల పునాదుల్లోకి నీరు చేరడంతో ఆరు భవంతుల ఉనికికి ముప్పు ఏర్పడినట్లు అధికారులు గుర్తించారు.

ఇవీ చదవండి...ఒక్క కథనం... 60 గ్రామాల ఇబ్బందిని తొలగించింది..!