ఆస్ట్రేలియా హై కమిషనర్ ఓ ఫారెల్ నేతృత్వంలోని ప్రతినిధి బృందం గవర్నర్ బిశ్వభూషణ్ హరిచందన్‌ను రాజ్ భవన్‌లో కలిశారు. ప్రధాని నరేంద్ర మోదీ తీసుకున్న అనేక కార్యక్రమాల వల్ల ఆస్ట్రేలియా, భారత్ల మధ్య సంబంధాలు చాలా బలంగా ఉన్నాయని ఫారెల్ గవర్నర్కు తెలియజేశారు. కరోనా మహమ్మారి తీవ్రతరం అవుతున్న వేళ 2020 మే నెలలో తాను బాధ్యతలు స్వీకరించానని..,పరిస్థితులను అధిగమించడానికి భారత్ చేపడుతున్న చర్యలను నిశితంగా గమనించానని ఆయన తెలిపారు. గవర్నర్ బిశ్వభూషణ్ మాట్లాడుతూ...కేంద్ర ప్రభుత్వం ప్రారంభించిన కొవిడ్ -19 టీకా కార్యక్రమం వల్ల ప్రజలు తమ సాధారణ కార్యకలాపాలను కొనసాగించడానికి అవసరమైన ఉపశమనాన్ని పొందగలిగారన్నారు. ఆర్థిక వ్యవస్థ కూడా పునరుత్తేజ దశలో ఉందన్నారు.
భారత్‌లో వాణిజ్య సంబంధాలను ప్రోత్సహించడానికి, ఏపీలో పెట్టుబడులకు అవకాశాలను పరిశీలించటానికి తన పర్యటన ఉపకరిస్తుందని ఫారెల్ గవర్నర్కు వివరించారు. విశాఖపట్నంలో ఏపీ మెడ్‌టెక్ జోన్, బొగ్గు గనులు, సౌర ఫలకాలు, వాహనాలు, బ్యాటరీల తయారీ, ఖనిజాల అన్వేషణ, ఎలక్ట్రిక్ రంగాలలో పెట్టుబడులను విస్తరించడానికి ఆస్ట్రేలియా ఇప్పటికే రాష్ట్రంతో ఒప్పందాలు కుదుర్చుకుందని హై కమిషనర్ తెలిపారు. ఆస్ట్రేలియా సందర్శించాలని గవర్నర్ను ఓ ఫారెల్ ఆహ్వానించారు. ఈ సందర్భంగా మెమెంటో, శాలువాతో ఫారెల్ను గవర్నర్ సత్కరించారు. ఈ కార్యక్రమంలో చెన్నై కాన్సుల్ జనరల్ సారా కిర్లేవ్‌, ఇండస్ట్రీస్ అండ్ కామర్స్ స్పెషల్ చీఫ్ సెక్రటరీ కరికల్ వలవన్, ఏపీ ఎకనామిక్ డెవలప్మెంట్ బోర్డ్ సీఈవో సుబ్రమణ్యం, గవర్నర్ కార్యదర్శి ముఖేష్ కుమార్ మీనా తదితరులు పాల్గొన్నారు.
ఇదీచదవండి
విశాఖ ఉక్కు అమ్మేస్తాం.. రామాయపట్నం పోర్టుకు డబ్బులివ్వలేం: కేంద్రం
