చిత్రపట పరిశ్రమపై కరోనా ప్రభావం..కొనుగోళ్లు లేక మూతపడ్డ దుకాణాలు

భగవంతుడు మనుషుల్ని సృష్టించి..భోగ భాగ్యాలు కలిగిస్తాడని భక్తుల విశ్వాసం. మరి దేవుణ్నే తయారుచేసే మనుషుల పరిస్థితి ఏంటి? బొమ్మ గీసి...పటం కట్టి.....దేవతలకే ఓ రూపం ఇచ్చేవారంతా ఇప్పుడు అర్ధాకలితో అల్లాడుతున్నారు. కరోనా మహమ్మారి ప్రభావంతో తిరుమలకు వచ్చే భక్తులు సంఖ్య తగ్గింది. భక్తులు లేక చిత్రపటాల తయారీ, విక్రయ వ్యాపారమంతా కుదేలైంది. రాష్ట్రంలో అతిపెద్ద చిత్రపటాల తయారీ పరిశ్రమగా పేరుగాంచిన తిరుపతిలో.... కొనేవారు లేక చిత్రకారులు, వ్యాపారస్తులు అవస్థలు పడుతున్నారు.

అఖిలాండ కోటి బ్రహ్మాండ నాయకుడు వేంకటేశ్వరస్వామి దర్శనాన్ని భక్తులు పరమ పవిత్రంగా భావిస్తారు. కొండల్లో నెలకొన్న కోనేటి రాయుడి కోసం కళ్లు కాయలు కాచేలా ఎదురుచూసి..ఆ దివ్యమంగళ స్వరూపాన్ని నయనాందకరంగా వీక్షిస్తారు. దర్శనం తర్వాత తిరుమలలో లభ్యమయ్యే స్వామి వారి చిత్రపటాలు కొనుగోలు చేసి ఇంటికి తీసుకెళ్తుంటారు. ముగ్ధమనోహరమైన వర్ణాల నడుమ...కళ్లు మిరుమిట్ల గొలిపే రీతిలో....చిత్రపటాల రూపంలో కొలువు తీరిన శ్రీనివాసుని కొనుగోలు చేయటం భక్తులు అత్యంత ప్రీతిపాత్రంగా భావిస్తారు. దేశవిదేశాల నుంచి వచ్చే భక్తుల కోసం...వారి అభిరుచికి తగినట్లుగా విభిన్న రూపాల్లో దేవతా మూర్తులను తయారు చేయటం తిరుపతిలో అతి ముఖ్యమైన పరిశ్రమల్లో ఒకటి. ఇప్పుడు వారంతా కొండంత కష్టాల్లో కూరుకుపోయారు.

దిక్కుతోచని స్థితిలో 1200 కుటుంబాలు

ప్రపంచ దేశాల్ని గజగజవణికిస్తున్న కరోనా మహమ్మారి... చిన్నా, పెద్ద అని తేడాలేకుండా ప్రతీ వ్యాపార రంగాన్ని చిన్నాభిన్నం చేసింది. చిత్రపటాల తయారీ పరిశ్రమపై ఆధారపడి తిరుపతి, తిరుచానూరు ప్రాంతాల్లో సుమారు 1200 కుటుంబాలు ఉన్నాయి. దేవుళ్ల ప్రతిరూపాలను చేతితో అందంగా తీర్చిదిద్దటం, ప్రింట్ చేయటం, ఫ్రేమ్ తయారు చేయటం, మనోహరమైన వర్ణాలు అద్దడం, అందమైన రాళ్లతో అలంకరించటం, లైటింగ్ సెట్ చేయటం, ఫ్రేమ్ ఫిట్టింగ్, ప్యాకింగ్ ఇలా వివిధ దశల్లో కొన్ని వేల మంది తిరుపతి పరిసర ప్రాంతాల్లో ఈ పరిశ్రమపై ఆధారపడి జీవనం సాగిస్తున్నారు.

ప్రింటింగ్​ ప్రెస్​లు, ఫ్రేమ్ వర్క్స్, చిత్రపటాల విక్రయ దుకాణాలు ఇలా ప్రతీవారిపై... కరోనా ప్రభావం పడింది. సుమారు రెండున్నర నెలలుగా వ్యాపారాలు లేక కుటుంబ పోషణ భారమైందని చిత్రకారులు, దుకాణదారులు వాపోతున్నారు. సడలింపుల తర్వాత దుకాణాలు తెరిచినా.....చిత్రపటాల విక్రయాలు కొనుగోళ్లు లేకపోవటంతో దిక్కుతోచని పరిస్థితిలో ఉన్నామని అంటున్నారు.

పది శాతానికి పడిపోయిన ఆదాయం

గతంలో తిరుమల శ్రీవారి దర్శనం కోసం రోజుకు కనీసం లక్ష మంది భక్తులు వచ్చేవారు. వారంతా స్వామి వారి దర్శనం తర్వాత...అక్కడే ఏర్పాటు చేసిన దుకాణాల్లో దేవతా మూర్తుల పటాలను కొనుగోలు చేసేవారు. గతంలో నెలకు సుమారు రూ. 40 లక్షల వ్యాపారం జరిగేదని, ఒక్కో కుటుంబం 30 నుంచి 40 వేల రూపాయల ఆదాయాన్ని ఆర్జించేవారని దుకాణదారులు అంటున్నారు. తిరుపతి నగరంలో సుమారు 35 వేల నుంచి 40వేల మంది చిత్రపట పరిశ్రమపై ఆధారపడి జీవిస్తున్నారు.

చిత్తపటాలను తమిళనాడులోని చెన్నై, తంజావూరు, కర్ణాటకలోని బెంగళూరు, హైదరాబాద్​లకు ఎగుమతి చేసేవారు. పెళ్లిళ్లు, శుభకార్యాలకు ఇక్కడి నుంచి చిత్రపటాలను కొనుగోలు చేసి బహుమతులుగా ఇచ్చేవారు. వీఐపీలకు తిరుపతి నుంచి తీసుకువెళ్లిన స్వామి వారి పటాలను అందించటం పరిపాటి. కానీ కరోనా మహమ్మారి ప్రభావంతో ఇప్పుడదంతా పూర్తిగా మారిపోయింది. చెన్నై లాంటి ప్రధాన మార్కెట్ లాక్​డౌన్​లో ఉండటంతో ఎగుమతులు నిలిచిపోయాయి. ఆర్డర్లు లేకపోవటంతో చాలా దుకాణాలు మూతపడ్డాయి. గతంతో పోలిస్తే కనీసం 10 శాతం వ్యాపారం జరగడంలేదని వ్యాపారులు అంటున్నారు.

యాత్రికులు, భక్తులపైనే ఆధారపడి జీవించే తామంతా కరోనా ప్రభావంతో...గతంలో ఎన్నడూ చూడని సంక్షోభాన్ని ఎదుర్కొంటున్నామని చిత్రపటాల తయారీ, విక్రయదారులు వాపోతున్నారు. తరతరాలుగా ఇదే వ్యాపారంలో కొనసాగుతున్నందున దుకాణాలను వదులుకోలేని పరిస్థితిలో ఉన్నారు. మంచిరోజుల వస్తాయన్న ఆశతో బతుకు వెళ్లదీస్తున్నామని ఆవేదన వ్యక్తం చేస్తున్నారు.

ఇదీ చదవండి : 'పార్టీ ప్రచారం కోసం ప్రజాధనాన్ని దుర్వినియోగం చేశారు'