'శ్రీవారి నిధులను స్వాహా చేసేందుకే వారధి పొడిగింపు నిర్ణయం'

శేషాచలం అటవీ ప్రాంతానికి ఆలవాలమైన అలిపిరి గరుడ సర్కిల్-కపిలతీర్థం రహదారిలో వారధిని నిర్మించాలనుకోవటం అర్థం లేని చర్య అని జనసేన పార్టీ తిరుపతి నియోజకవర్గ ఇంఛార్జి కిరణ్ రాయల్ వ్యాఖ్యానించారు. తిరుపతి ప్రెస్​క్లబ్​లో ఆయన మీడియాతో మాట్లాడారు.

గరుడ వారధిని కపిలతీర్థం నుంచి అలిపిరికి పొడిగించాలన్న తితిదే నిర్ణయాన్ని జనసేన పార్టీ తిరుపతి నియోజకవర్గ ఇంఛార్జి కిరణ్ రాయల్ తప్పుబట్టారు. ఎన్నో పురాతన వృక్షాలు, నిలువెత్తు చెట్లతో ఆహ్లాదాన్ని కలిగిస్తూ పచ్చదనానికి నిలయంగా ఉన్న అలిపిరి-కపిలతీర్థం రహదారిలో ఫ్లైఓవర్ రావాలని తిరుపతి వాసులు ఎవరూ కోరుకోవటం లేదన్నారు. అటవీ ప్రాంతంలో అభివృద్ధి పనులు చేపట్టకూడదంటూ చట్టాలున్నా... తితిదే అధికారులు అర్థంపర్థం లేని నిర్ణయాలు తీసుకోవటం సరికాదన్నారు. కేవలం శ్రీవారి నిధులను స్వాహా చేసేందుకు ఈ వారధి పొడిగింపు నిర్ణయం తీసుకున్నట్లు భావిస్తున్నామన్నారు. ముందు తిరుచానూరు మార్కెట్ యార్డు వరకూ ఉన్న మొదటి దశ పనులను పూర్తి చేసేందుకు నగరపాలక సంస్థకు తితిదే సహకరించాలని జనసేన తరపున కిరణ్ రాయల్ డిమాండ్ చేశారు.

ఇదీ చదవండీ... LIVE VIDEO: ఉప్పాడ తీరంలో బోటు బోల్తా.. రక్షించిన మత్స్యకారులు