వైద్యుడిపై యాసిడ్ దాడి... ఆపై ఆత్మహత్యాయత్నం...!

ప్రేమించి మోసం చేశాడంటూ తిరుపతి కోర్టులో వైద్యుడిపై మహిళ యాసిడ్ దాడి చేసింది. అనంతరం ఆత్మహత్యాయత్నానికి ప్రయత్నించింది.

తిరుపతి కోర్టు హాలులో యాసిడ్ దాడి కలకలం రేపింది. విడాకుల కేసు కోసం న్యాయస్థానానికి వచ్చిన వైద్యుడు ఆదర్శ్ రెడ్డిపై అరుణ అనే యువతి యాసిడ్ దాడి చేసింది. ఈ ఘటనలో వైద్యుడికి స్వల్పగాయాలయ్యాయి. అరుణను తిరుపతి పోలీసులు అదుపులోకి తీసుకునేందుకు ప్రయత్నించగా...తన వెంట తెచ్చుకున్న పురుగుల మందు తాగి ఆత్మహత్యకు ప్రయత్నించింది. పోలీసులు ఆమెను రుయా ఆసుపత్రికి తరలించారు. ఆమె ప్రాణాలకు ప్రమాదం లేదని వైద్యులు తెలిపారు.

గతంలో ఓ ప్రైవేట్ ఆసుపత్రిలో నర్సుగా పనిచేస్తున్న సమయంలో ప్రేమించుకున్నామని... ఇప్పుడు మోసం చేశాడని అరుణ ఆరోపించింది. గతంలోనూ ఇదే విషయమై తిరుపతి తూర్పు పోలీస్ స్టేషన్ లో ఫిర్యాదు చేసినట్లు తెలిపింది.