Yedlapati Venkatrao: మాజీ ముఖ్యమంత్రి కొణిజేటి రోశయ్య, రాజ్యసభ మాజీ సభ్యుడు యడ్లపాటి వెంకట్రావు లాంటి వ్యక్తుల కోసం అసెంబ్లీలో తీర్మానం చేసి వారి మృతికి సంతాపం తెలపాల్సిన అవసరం ఉందని తెదేపా నేత అయ్యన్నపాత్రుడు ప్రభుత్వానికి సూచించారు. వైకాపా ఎమ్మెల్యేలు కూడా ఇలాంటి వ్యక్తుల కోసం పార్టీలకతీతంగా పోరాడాలని తెలిపారు.
రోశయ్య, యడ్లపాటి వెంకట్రావు.. వ్యక్తిగత విమర్శలకు పోకుండా పరిపూర్ణమైన రాజకీయాలు చేసిన వ్యక్తులని కొనియాడారు. ప్రస్తుతమున్న రాజకీయాలను ప్రశ్నిస్తే.. కేసులు పెట్టడం ఆనవాయితీగా మారిందన్నారు. ఈ విధానాలన్నీ తిప్పికొట్టాలని పిలుపునిచ్చారు. తమపై ఇప్పటికే తొమ్మిది కేసులు ఉన్నాయని.. దానిలో అత్యాచారం కేసు కూడా ఉండటం బాధాకరమని అయ్యన్నపాత్రుడు అన్నారు.
Yedlapati Venkatrao: తెలుగుదేశం పార్టీ సీనియర్ నేత, రాజ్యసభ మాజీ సభ్యుడు యడ్లపాటి వెంకట్రావు ఆత్మీయ సంస్మరణ సభ గుంటూరు జిల్లా తెనాలి ఆయన స్వగ్రామంలో ఘనంగా నిర్వహించారు. యడ్లపాటి వెంకట్రావు ఆత్మీయులు, సన్నిహితులు.. విరివిగా పాల్గొని ఆయన చిత్రపటానికి పూలమాలలు వేసి నివాళులర్పించారు. ప్రపంచవ్యాప్తంగా ప్రసిద్ధి చెందిన సూర్య శిల్పశాల నిర్వాహకులు కాటూరి. రవిచంద్ర, వెంకటేశ్వరరావులు రూపొందించిన విగ్రహాన్ని అక్కడ ప్రదర్శనకు ఉంచారు. ఆ విగ్రహానికి పూలమాలలు వేసి నివాళులర్పించారు.
Yedlapati Venkatrao: ఈ కార్యక్రమానికి భాజపా ఎంపీ సుజనా చౌదరి, నరసరావుపేట పార్లమెంటు సభ్యుడు లావు శ్రీకృష్ణదేవరాయలు, భాజపాా రాష్ట్ర అధ్యక్షుడు సోము వీర్రాజు, తెదేపా నేత మాజీ మంత్రులు అయ్యన్నపాత్రుడు, ఆలపాటి రాజేంద్రప్రసాద్, కామినేని శ్రీనివాస్, నక్కా ఆనందబాబు, ప్రత్తిపాటి పుల్లారావు, జనసేన పార్టీ పిఎసిఎస్ చైర్మన్ నాదెండ్ల మనోహర్, వైకాపా ఎమ్మెల్యే కరణం బలరాం, మహిళా కమిషన్ మాజీ చైర్పర్సన్ నన్నపనేని రాజకుమారి తదితరులు హాజరయ్యారు.
Yedlapati Venkatrao: యడ్లపాటి వెంకట్రావుతో తమకు ఉన్న సత్సంబంధాలను ఈ సందర్భంగా నేతలు గుర్తు చేసుకున్నారు. గత రాజకీయాలకు, ప్రస్తుత రాజకీయాలు పూర్తి భిన్నంగా ఉన్నాయని చెప్పారు. యడ్లపాటి వెంకట్రావు ఎమ్మెల్యేగా ఉన్న సమయాల్లో అసెంబ్లీలోగానీ, బహిరంగ ప్రదేశాలలోగానీ రాజకీయపరమైన సబ్జెక్టునే మాట్లాడేవారే తప్ప.. వ్యక్తిగత విమర్శలు చేసే వారు కాదని తెలిపారు. ఆయన పదవులకే వన్నె తెచ్చిన వ్యక్తి అని కొనియాడారు. పార్టీలకు అతీతంగా వెంకట్రావుని ప్రతి ఒక్కరూ ఆదర్శంగా తీసుకోవాలని నాయకులు సుచించారు. ఆయన జీవితం రాజకీయంగా, వ్యక్తిగతంగా పరిపూర్ణమైన జీవితాన్ని పూర్తిచేసుకున్న గొప్ప వ్యక్తి వెంకట్రావు అని ప్రశంసించారు.
ఇది చదవండి: వైకాపా ఎమ్మెల్సీ అభ్యర్థిగా.. ఎండీ రహుల్లా నామినేషన్ దాఖలు
