పది రోజుల్లో వివాహం జరగాల్సిన ఆ ఇంట విషాదం నెలకొంది. కుమార్తె వివాహానికి బంగారం, నూతన వస్త్రాలు కొనేందుకు బయలుదేరిన ఆ కుటుంబం ఇంటికి తిరిగిరాలేదు. ఎన్నో ఆశలతో బిడ్డ పెళ్లి చేసేందుకు ఆరాటపడగా.. అంతలోనే కానరాని లోకాలకు వెళ్లిపోయారు. లారీ రూపంలో దూసుకొచ్చిన మృత్యువు... పెళ్లిబాజాలు మోగాల్సిన ఇంట్లో ఆర్తనాదాలను మిగిల్చింది.
కుటుంబ సభ్యులంతా కలిసి...
తెలంగాణ రాష్ట్రం మహబూబాబాద్ జిల్లా గూడూరు మండలం ఎర్రకుంట తండాకు చెందిన జాటోత్ కస్నా నాయక్.. కల్యాణి దంపతులకు ఇద్దరు కుమారులు.. ఓ కుమార్తె. అల్లారుముద్దుగా పెంచుకున్న తమ కుమార్తెను డిగ్రీ వరకూ చదివించారు. తమ గారాల పట్టికి డోర్నకల్ మండలానికి చెందిన యువకునితో పెళ్లి నిశ్చయించారు. ఫిబ్రవరి 10న ఉదయం తమ ఇంట జరగనున్న పెళ్లికోసం అందరూ ఆతృతగా ఎదురుచూస్తున్నారు. పెళ్లి పనుల్లో బీజీ అయ్యారు. పెళ్లి తేదీ దగ్గరపడింది. ఆభరణాలు, దుస్తులు కొనేందుకు ఓ ఆటో మాట్లాడుకుని పెండ్లి కుమార్తె ప్రమీల, తల్లి కల్యాణి, సోదరుడు ప్రదీప్, చిన్నమ్మ బాబాయ్ ప్రసాద్, లక్ష్మిలతో కలిసి వరంగల్కు బయలుదేరారు.
దూసుకొచ్చిన మృత్యువు...
బిడ్డ పెళ్లి తలచుకుని ఆ తల్లి.. సోదరి మనువు ఎంతో వైభవంగా జరిపించాలని సోదరుడు.. అయినవాళ్ల ఇంట వివాహ వేడుకలో తామో చెయ్యివేస్తున్నామన్న ఆనందంలో ఉన్న బాబాయి పిన్ని.. ఎంతో ఉల్లాసంతో ప్రయాణిస్తున్నారు. ఇంటి నుంచి బయలు దేరి 20 నిమిషాలే గడిచింది. ఇంతలో దారికాచిన మృత్యువు లారీ రూపంలో దూసుకొచ్చింది. రెప్పపాటులో తమ ఆటోను ఢీకొని ఈడ్చుకుని పోయింది. ఏమైందో తెలుసుకునేలోగానే లారీ కింద నలిగిన వారి దేహాలు ఛిద్రమయ్యాయి. క్షణాల వ్యవధిలోనే ఆరుగురి ఊపిరి అనంత వాయువుల్లో కలిసిపోయింది. ఆటోలో చిక్కుకున్న మృతదేహాలను ప్రొక్లెయిన్ సహాయంతో బయటకు తీయాల్సి వచ్చిందంటే.. ప్రమాద తీవ్రత ఏ స్థాయిలో ఉందో అవగతమవుతోంది.
పెళ్లి వస్త్రాలు కొనేందుకు..
పెళ్లి వస్త్రాలు కొనేందుకు వెళ్లినవారి కోసం ఇంటి వద్ద ఎదురు చూస్తున్న తండ్రి, సోదరుడికి తమ వారి మరణ వార్త తీవ్ర విషాదం మిగిల్చింది. ప్రమాద స్థలిలో గుర్తుపట్టలేనంతగా ఛిద్రమైన వారి మృతదేహాలను చూసి కన్నీరు ఏరులై పారింది. తమ బిడ్డ మనువు కోసం ముద్రించిన ఆహ్వాన పత్రికలు ఎవరికి పంచాలి... పట్టు చీరతో పెళ్లి పీటలెక్కాల్సిన తమ కుమార్తెను పాడెపై పెట్టి కర్మభూమికి ఎలా సాగనంపాలని రోదిస్తున్న ఆ తండ్రి వేదన చూపరులకు కంటతడి పెట్టించింది. ప్రమాదంలో భార్యా బిడ్డల్ని కోల్పోయిన ఆ తండ్రిని ఓదార్చటం ఎవరి తరం కాలేదు.
గ్రామస్థుల ఆందోళన..
సమాచారం అందుకున్న పోలీసులు... హుటాహుటిన ఘటనా స్థలికి చేరుకుని సహాయక చర్యలు చేపట్టారు. మృతదేహాలను మహబూబాబాద్ ఏరియా ఆసుపత్రికి తరలించే సమయంలో... బొద్దుగొండ వద్ద కుటుంబ సభ్యులు, గ్రామస్థులు ఆందోళన చేపట్టారు. మృతుల కుటుంబాలకు న్యాయం చేయాలని డిమాండ్ చేశారు.
బాధిత కుటుంబాలను ఆదుకుంటాం..
ఘటనపై తెలంగాణ ముఖ్యమంత్రి కేసీఆర్ దిగ్భ్రాంతి వ్యక్తం చేశారు. మృతుల కుటుంబాలకు.. సానుభూతి తెలిపారు. మంత్రులు ఎర్రబెల్లి దయాకరరావు, సత్యవతి రాఠోడ్ ప్రమాదానికి కారణాలపై ఆరా తీశారు. బాధితుల కుటుంబాలకు ప్రభుత్వం అండగా ఉంటుందని తెలిపారు. ఒకే కుటుంబానికి చెందిన వారు.. పెళ్లి వేడుకలు జరుపుకోవాల్సింది పోయి.. రెప్పపాటులో దుర్మరణం పాలవ్వడం ఎర్రగుంట తండాలో విషాదఛాయలు నింపింది.
ఇదీ చూడండి: కారు, ద్విచక్రవాహనం ఢీ... ఇద్దరికి తీవ్రగాయాలు
