పదినెలల చిన్నారిని తండ్రికి అప్పగించడానికి నిరాకరించిన హైకోర్టు

అనారోగ్యంతో తల్లి కన్నుమూశాక.. అమ్మమ్మ, తాతయ్య సంరక్షణలో ఉంటున్న పదినెలల చిన్నారిని తండ్రికి అప్పగించడానికి హైకోర్టు నిరాకరించింది. అమ్మమ్మ, తాతయ్య వద్ద ఆ చిన్నారి ‘అక్రమ నిర్బంధం’లో ఉందని పాప తండ్రి రుజువు చేయడంలో విఫలమయ్యారని పేర్కొంది. ఈ వ్యవహారాన్ని అక్రమ నిర్బంధంగా ప్రకటించలేమని తెలిపింది.

అనారోగ్యంతో తల్లి కన్నుమూశాక.. అమ్మమ్మ, తాతయ్య సంరక్షణలో ఉంటున్న పదినెలల చిన్నారిని తండ్రికి అప్పగించడానికి హైకోర్టు నిరాకరించింది. అమ్మమ్మ, తాతయ్య వద్ద ఆ చిన్నారి అక్రమ నిర్బంధంలో ఉందని పాప తండ్రి రుజువు చేయడంలో విఫలమయ్యారని పేర్కొంది. పాప పుట్టుక నుంచి ఆలనాపాలనా తాతయ్య, అమ్మమ్మ చూసుకున్నారని, దురదృష్టవశాత్తు అనారోగ్యంతో తల్లి మరణించిందని గుర్తు చేసింది. సహజసిద్ధమైన సంరక్షకుల హక్కులను నిర్ణయించే ముందు.. చిన్నారుల సంక్షేమాన్ని దృష్టిలో పెట్టుకోవాల్సిన అవసరం న్యాయస్థానాలపై ఉందని తెలిపింది.

పాపను తనకు అప్పగించాలని తండ్రి సివిల్‌ కోర్టును ఆశ్రయించవచ్చని పేర్కొంది. అప్పటివరకూ అమ్మమ్మ, తాతయ్య వద్ద ఉన్న శిశువును చూసుకునేందుకు ప్రతి ఆదివారం తండ్రి వెళ్లవచ్చని స్పష్టం చేసింది. హైకోర్టు న్యాయమూర్తులు జస్టిస్‌ యూ. దుర్గాప్రసాదరావు, జస్టిస్‌ బీవీఎల్​ఎల్​ చక్రవర్తితో కూడిన ధర్మాసనం ఈ మేరకు తీర్పు ఇచ్చింది. అత్తమామల అక్రమ నిర్బంధంలో ఉన్న 10 నెలల కుమార్తెను తనకు అప్పగించేలా పోలీసులను ఆదేశించాలని కోరుతూ.. బాపట్ల జిల్లాకు చెందిన గోపి అనే వ్యక్తి హైకోర్టులో హెబియస్‌ కార్పస్‌ పిటిషన్‌ వేశారు. ఇరువురి వాదనలు విన్న ధర్మాసనం.. వ్యాజ్యాన్ని కొట్టేసింది.

2021 అక్టోబర్‌ 15న తన భార్య కె.మౌనిక.. పాపకు జన్మనిచ్చారన్నారు. అనారోగ్యంతో 2022 ఏప్రిల్‌ 03న కన్నుమూశారన్నారు. అత్తమామలు పాపను అక్రమంగా నిర్బంధంలో ఉంచారని గోపి హైకోర్టును ఆశ్రయించారు. ఆయన తరఫు న్యాయవాది వాదనలు వినిపిస్తూ.. పిటిషనర్‌ భార్య కన్నుమూయడంతో వచ్చే ఆర్థిక ప్రయోజనాల్లో అత్తమామలు వాటా కోసం బెదిరిస్తున్నారన్నారు. రావాల్సిన సొమ్ము అందకుండా అవరోధం కలిగిస్తున్నారన్నారు. బలవతంగా పాపను తీసుకెళ్లారన్నారు. పాప సంక్షేమం కోసం ఖర్చు చేసే స్థోమత ఉందన్నారు.

ఓ నిర్మాణ సంస్థలో సివిల్‌ ఇంజనీర్‌గా పనిచేస్తున్నారన్నారు. పాప అక్రమ నిర్బంధంపై పోలీసులకు ఫిర్యాదు చేసినా చర్యలు లేవన్నారు. అమ్మమ్మ, తాతయ్య తరఫు న్యాయవాది వాదనలు వినిపిస్తూ.. ప్రసవం దగ్గర్నుంచి చిన్నారి బాగోగులు చూసుకున్నారన్నారు. తండ్రివద్ద ఏనాడూ లేదన్నారు. తన కుమార్తె మరణానంతరం వచ్చే ఆర్థిక ప్రయోజనాలను దురుద్దేశంలో పొందాలని చూస్తున్నారన్నారు. ఇరువైపు వాదనలు విన్న ధర్మాసనం.. అత్తమామల అక్రమ నిర్బంధంలో చిన్నారి ఉందని, ఆ శిశువు సంక్షేమాన్ని వారు చూసుకోవడం లేదని పిటిషనర్‌ రుజువు చేయలేకపోయారని తెలిపింది. వ్యాజ్యాని కొట్టేసింది. సివిల్‌ కోర్టును ఆశ్రయించాలని తండ్రికి సూచించింది.

ఇవీ చదవండి: