Telugu Language Day అయ్యా.. మీ పాదములంటి అడుగుతున్నాను. ఈసారికి నన్ను మన్నించండి. తెలుగు భాషా దినోత్సవ కార్యక్రమానికి వస్తాను. మీ పలుకులు వింటా. కానీ, వేదిక ఎక్కను. సత్కారం స్వీకరించను. మన గడ్డపై మన బిడ్డలకు అన్ని పాఠశాలల్లో మాతృభాషలోనే ప్రాథమిక విద్య అందేవరకు ప్రభుత్వం నుంచి సన్మానం, సహకారం స్వీకరించకూడదని ‘తెలుగుదండు’ ప్రతిజ్ఞ. ఇది రాజకీయాలతో, వ్యక్తిగతాలతో సంబంధం లేని ఉద్యమ నియమం. -ప్రభుత్వ సన్మానాన్ని తిరస్కరిస్తూ పరవస్తు ఫణిశయన సూరి చేసిన విన్నపం
రాష్ట్ర ప్రభుత్వ ఉత్తర, ప్రత్యుత్తరాలు ఆంగ్లంలోనే ఎందుకు సాగించాలి? సామాన్యుడికి అర్థమయ్యేలా తెలుగులో సరళంగా ఇస్తే వచ్చే ఇబ్బందులేంటీ? అంతర్గత సమావేశాల్లోనూ అధికారులంతా దాదాపు ఆంగ్లంలోనే మాట్లాడుతున్నారు. అధికార భాషా సంఘం అధ్యక్షుడి నియామక ఉత్తర్వు మినహా మిగతా ఉత్తర్వులన్నీ ఆంగ్లంలోనే వస్తున్నాయి. చివరికి తెలుగు భాషాభివృద్ధి ప్రాధికార సంస్థ తాత్కాలిక అధ్యక్షుడి నియామక ఉత్తర్వునైనా మన భాషలో ఇవ్వలేదు. అఖిల భారత సర్వీసు అధికారులంతా యూపీఎస్సీ నిర్వహించే తెలుగు పరీక్షలో ఉత్తీర్ణులైనవారే. కంప్యూటర్‌ వాడకానికి అనుగుణంగా తెలుగు అక్షరాలు(ఫాంట్స్‌) ఇప్పటికే అందుబాటులోకి వచ్చాయి. అయినా... వాడకంపై చొరవ చూపడంలేదు. ‘ఉప-పరిచ్ఛేదము(20) తరువాత, ఈ క్రింది ఉప-పరిచ్ఛేదమును చొప్పించవలెను, అదేదనగా’ ‘ప్రధాన చట్టము యొక్క 11వ పరిచ్ఛేదములోని, ఉప-పరిచ్ఛేదము(2)లో, ఖండము(13) తరువాత ఈ క్రింది ఖండమును చేర్చవలెను, అదేదనగా’... ఇది తెలుగు భాషే. మీకేమైనా అర్థమవుతుందా? ఆంధ్రప్రదేశ్‌ శాసనసభలో బిల్లుల రూపకల్పన, సవరణలో వాడుతున్న పదాలివి. ఉభయసభల్లో తెలుగులోనే చర్చలు సాగుతున్నా.. సభ్యులకిచ్చే సమాచారంలో వాడుతున్న తెలుగు పదాలు ఎవ్వరికీ మింగుడుపడడం లేదు.
ప్రాధికార సంస్థకు కార్యవర్గమేదీ?: అధికార భాషా సంఘం ఉన్నా... దాని పరిధి తెలుగు అమలుకు సలహాలివ్వడం వరకే పరిమితమైంది. మాతృభాష ప్రేమికుల పోరాటాల నేపథ్యంలో చట్టం ద్వారా తెలుగు భాషాభివృద్ధి ప్రాధికార సంస్థను 2018లో తీసుకొచ్చారు. తెలుగును అమలు చేయకుంటే జరిమానాలు, శిక్షలు విధించే అధికారం ఈ సంస్థకుంది. కానీ, ఇంతవరకు దీనికి కార్యవర్గాన్ని నియమించలేదు. 2022 జులై 5న తాత్కాలిక అధ్యక్షుడిగా ఆచార్య యార్లగడ్డ లక్షీ¨్మప్రసాద్‌ను నియమించారు. రాష్ట్ర, జిల్లా స్థాయులలో కార్యవర్గాలను ఏర్పాటు చేయలేదు. తెలుగు భాష, సాహిత్యం, పరిపాలన రంగాల్లో విశిష్ట అనుభవమున్న ముగ్గురు సభ్యులతో కూడిన శోధన బృందం(సెర్చ్‌ కమిటీ) నియమించాలి. దీని సిఫార్సుల మేరకు అధ్యక్షుడు, సభ్యులను నియమించాలి. ఇంతవరకు బృందమే ఏర్పాటు కాలేదు. అలాగే... అధికార భాషగా తెలుగు అమలుపై, విద్యారంగంలో వాడకంపై, ఈ-తెలుగు అభివృద్ధిపై, అనువాదాలు, ప్రచురణలపై, అంతర్జాతీయ తెలుగు అభివృద్ధిపై బృందాలను వేయాల్సి ఉంది. వీటి ఊసే లేదు.
కీలక స్థాయిలో పెద్దదెబ్బ
రాష్ట్రంలోని ప్రభుత్వ, ప్రభుత్వేతర బడుల్లో తెలుగు మాధ్యమం పూర్తిగా కనుమరుగైంది. ఒక పాఠ్యాంశంగా తెలుగు ఉండాలనే నిబంధన ఉన్నా సీబీఎస్‌ఈ పాఠశాలలు, ఇంటర్‌లో ఇది అమలవడం లేదు. సీబీఎస్‌ఈ, ఇంటర్‌లలో భాష ఎంపిక ఐచ్ఛికం కావడంతో మార్కుల కోసం చాలామంది హిందీ, ఉర్దూ, సంస్కృతం ఎంచుకుంటున్నారు. తెలుగును ఎంచుకున్నా వారిలో చాలామంది స్పష్టంగా చదవలేకపోతున్నారు. అక్షర దోషాలు లేకుండా రాయడమూ లేదు. భవిష్యత్తులో మనభాషలో రాసేవారు, చదివేవారు ఉండకపోవచ్చనే ఆందోళన నెలకొంది.
ఆ దేశాల్లో మాతృభాష
ఆర్థికంగా, సాంకేతికంగా ఎంతో పురోభివృద్ధి సాధించిన, సాధిస్తున్న దేశాలు మాతృభాషను కాదని ఆంగ్లం వెంట పరుగులు తీయడం లేదు. రష్యా, జపాన్‌, జర్మనీ, ఫ్రాన్స్‌, ఇటలీ, బ్రెజిల్‌, తైవాన్‌, డెన్మార్క్‌, టర్కీ తదితర దేశాల్లోని పిల్లలు ప్రాథమిక విద్యను మాతృభాషలో చదువుతారు. చైనా, జపాన్‌, జర్మనీ, రష్యావంటి దేశాలు విజ్ఞాన శాస్త్రాల్ని వారి మాతృభాషలోనే బోధిస్తాయి. కొన్నిచోట్ల ఆంగ్లాన్ని ఒక సబ్జెక్టుగానే నేర్పుతున్నారు. మన నూతన జాతీయ విద్యా విధానం-2020 సైతం ప్రాథమిక విద్య మాతృభాషలోనే సాగాలని సూచించింది.
