రోడ్ల విస్తరణకు ప్రాజెక్టు:
రాష్ట్రంలో రహదారులను డబుల్ లైన్గా మార్చేందుకు గ్రామీణ ప్రాంతాలను, మండల కేంద్రాలతో అనుసంధానం చేసేందుకు రెండు వేర్వేరు ప్రాజెక్టులను రాష్ట్రప్రభుత్వం చేపట్టనుంది. ఇందుకోసం న్యూ డెవలప్మెంట్ బ్యాంకుతో ఒప్పందం కుదుర్చుకుంది. 1600 కిలోమీటర్ల మేర రాష్ట్ర హైవేలను డబుల్లైన్గా మార్చడంతో పాటు.. గ్రామీణ ప్రాంతాలను మండల కేంద్రాలతో అనుసంధానం చేసే ప్రాజెక్టు కోసం రాష్ట్ర ప్రభుత్వం ఈ ఒప్పందాన్ని కుదుర్చుకుంది.
రాష్ట్ర రహదారులకు రూ.2,100 కోట్ల కేటాయింపు :
రూ.2,100 కోట్లు చొప్పున రెండు వేర్వేరు ప్రాజెక్టుల నిర్మాణం కోసం ఒప్పందం కుదిరింది. రాష్ట్ర రహదారుల నెట్వర్క్ లోని 1600 కిలోమీటర్ల మేర డబుల్ లైన్ వేయడం, దెబ్బతిన్న వంతెన మార్గాల అభివృద్ధి కోసం ఈ మెుత్తాన్ని ఖర్చు చేయనున్నారు.
గ్రామీణ ప్రాంతాలను మండల కేంద్రాలతో అనుసంధానం:
రెండో ప్రాజెక్టుగా గ్రామీణ ప్రాంతాలను మండల కేంద్రాలకు అనుసంధానం చేసేందుకు 1400 కిలోమీటర్ల మేర రహదారుల నిర్మాణం డబుల్ లేన్ కోసం, అలాగే దెబ్బతిన్న వంతెనలను బాగు చేసేందుకు మరో రూ.2,100 కోట్ల రుణాన్ని న్యూ డెవలప్మెంట్ బ్యాంక్ అందించేందుకు అవగాహన ఒప్పందం కుదిరింది. ఈ ఒప్పందంపై ఏపీ రహదారులు భవనాల శాఖ ముఖ్య కార్యదర్శి కృష్ణ బాబు, కేంద్ర ప్రభుత్వం తరఫున బలదేవ్ పురుషార్ధ సంతకాలు చేశారు. మొత్తం 32 ఏళ్లలో రెండు రుణాలను తీర్చేందుకు న్యూ డెవలప్మెంట్ బ్యాంకు అవకాశం కల్పించింది. ప్రభుత్వం తీసుకున్న రుణానికి ఐదేళ్లపాటు చెల్లింపులపై మారటోరియం లభిస్తుందని ఒప్పందంలో పేర్కొంది.
టోల్ వసూలుతో ఆదాయం:
రాష్ట్రంలోని వేర్వేరు రహదారులను డబుల్ లైన్ చేయడం ద్వారా 15 వేల వాహనాల రాకపోకలకు వీలు కల్పించవచ్చని ప్రభుత్వం భావిస్తోంది. మరోవైపు ఈ రహదారుల నుంచి టోల్ వసూలు ద్వారా కొంత మొత్తం ఆదాయాన్ని ఆర్జించవచ్చని ప్రభుత్వం ఆలోచన చేస్తోంది. ఇప్పటికే రాష్ట్రంలోని కొన్ని డబుల్ లేన్ మార్గాల్లో టోల్ గేట్లను ఏర్పాటు చేసి వాహన రాకపోకలకు రుసుము వసూలు చేయాలని నిర్ణయించారు.
ఇదీ చదవండి:
