పుర, నగరపాలక సంస్థల్లో కొత్త ఆస్తి పన్ను విధానం మేరకు ఆస్తుల విలువను మదించి ఆ వివరాలతో ప్రత్యేక తాఖీదులు (స్పెషల్‌ నోటీసులు) సిద్ధం చేస్తున్నారు. 2021-22లో మొదటి అర్ధ సంవత్సరానికి వేసిన ఇళ్లు, దుకాణాలు, ఇతర సముదాయాల వారీగా వేసిన ఆస్తి పన్ను వివరాలతో ఈ తాఖీదులు జారీ చేయనున్నారు. వచ్చే నెలాఖరులోగా ఈ ప్రక్రియ పూర్తి చేయాలని అధికారులు భావిస్తున్నారు. కొత్త విధానంలో విధించిన పన్నులపై అభ్యంతరాలుంటే నోటీసులు అందిన 15 రోజుల్లోగా లిఖిత పూర్వకంగా తెలియజేయాల్సి ఉంటుంది. గడువులోగా అభ్యంతరాలు రానట్లైతే ప్రజలు సమ్మతిస్తున్నట్లుగా భావించి కొత్త పన్నులు వసూలు చేస్తారు.
పాలకవర్గ తీర్మానం మేరకు ఇళ్లు, దుకాణాలకు పన్నులు విధిస్తూ ప్రత్యేక తాఖీదుల జారీ చేయడం, వీటిపై వచ్చే అభ్యంతరాల పరిష్కారం, తుది డిమాండు నోటీసులిచ్చి పన్నుల వసూళ్ల కోసం సిబ్బందికి శిక్షణ ఇచ్చారు. ఇళ్లు, దుకాణాలకు వార్షిక అద్దె విలువ (ఏఆర్‌వీ) ఆధారంగా ఆరు నెలలకు ప్రస్తుతం అమలులో ఉన్న పన్ను, కొత్తగా విధించిన పన్ను, పాత పన్నుపై 15% మించకుండా పెంపుతో పెరుగుదల వివరాలను ప్రత్యేక తాఖీదుల్లో పేర్కొంటున్నారు. వీటిపై ఇళ్లు, దుకాణం ఫొటోలు కూడా ముద్రిస్తారు. వాటిని సిబ్బంది, వాలంటీర్ల సహకారంతో ప్రజలకు అందించనున్నారు.
పెరిగిన పన్నులు మార్చిలోగా వసూలు
కొత్త విధానంతో పెరిగిన ఆస్తి పన్నును రెండు దశల్లో 2022 మార్చిలోగా వసూలు చేయనున్నారు. ఆస్తి పన్నును ఆర్నెల్ల్లకోసారి పట్టణ స్థానిక సంస్థలు వసూలు చేస్తుంటాయి. ఆస్తి మూల ధన విలువ విధానంలో విధించే పన్ను 2021-22 నుంచే అమలులోకి వచ్చినట్లు పురపాలకశాఖ ఇది వరకే ప్రకటించింది. ప్రత్యేక తాఖీదులు జారీ చేశాక ప్రజల నుంచి వచ్చే అభ్యంతరాలు పరిశీలించి మొదటి అర్థ సంవత్సరానికి డిసెంబరులోగా డిమాండు నోటీసులివ్వాలని పుర, నగరపాలక సంస్థలు భావిస్తున్నాయి. పాత ధరల ప్రకారం ఇప్పటికే మొదటి అర్థ సంవత్సరం పన్ను చెల్లించిన వారుంటే ఆయా మొత్తాలను కొత్త డిమాండులో నుంచి మినహాయించి మిగిలిన మొత్తం వసూలు చేస్తారు. రెండో అర్ధ సంవత్సరం పన్ను మార్చిలోగా వసూలు చేయాలని అధికారులు భావిస్తున్నారు. కొత్త విధానంతో ఈ ఏడాది రూ.186 కోట్ల అదనపు పన్ను ఆదాయం వస్తుందని పురపాలకశాఖ మంత్రి బొత్స సత్యనారాయణ ఇప్పటికే వెల్లడించారు.
ఇదీ చూడండి:
BADVEL BY-POLL : నేడు బద్వేలు ఉపఎన్నిక పోలింగ్... ఏర్పాట్లు పూర్తి చేసిన అధికారులు
