జూన్ 18, 2012న రాజశేఖర్ తన లైసెన్స్ రెన్యువల్ చేయించుకోగా.. దాని వాలిడిటీ జూన్ 17, 2017తో ముగిసింది. ఆ తర్వాత మళ్లీ ఆయన రెన్యువల్‌కి దరఖాస్తు చేసుకోలేదు. ఇదే క్రమంలో ఔటర్ రింగ్ రోడ్డుపై నిర్లక్ష్యంగా డ్రైవింగ్ చేసి ప్రమాదానికి గురయ్యాడు. టోలీచౌకీ ఆర్టీఏ అధికారులు నవంబర్ 29,2019 నుంచి మే 28, 2020 వరకు రాజశేఖర్ లైసెన్స్ రద్దు చేశారు.
ఈ నేపథ్యంలో అధికారులు ఆయన డ్రైవింగ్ లైసెన్స్ గురించి ఆరా తీయగా అసలు విషయం బయటపడింది. డ్రైవింగ్ లైసెన్స్ లేకుండానే డ్రైవింగ్ చేస్తున్నాడని తేలడం వల్ల మోటారు వాహనాల చట్టం 181 సెక్షన్‌ కింద ఆయనపై కేసు నమోదు చేయాలని అధికారులు నిర్ణయించారు.
ప్రమాదానికి గురైన రాజశేఖర్ కారుపై మొత్తం 21 ట్రాఫిక్ ఉల్లంఘనల కేసులు ఉన్నాయన్నారు. వీటిల్లో 19 కేసులు అతివేగానికి సంబంధించినవే అని తెలిపారు. అయితే వచ్చే ఏడాది మే 28 వరకు ఆయన లైసెన్స్‌ను ఆర్టీఏ రద్దు చేయడం వల్ల అప్పటివరకు ఆయన డ్రైవింగ్‌కి దూరంగా ఉండాల్సిందేనని పోలీసులు పేర్కొన్నారు. లేనిపక్షంలో ఆయనపై చట్టపరమైన చర్యలు తప్పవని హెచ్చరించారు.
