కరోనా ప్రభావంతో కేజీ టూ పీజీకి సంబంధించి... విద్యా బోధనలో అనేక మార్పులు సంతరించుకున్నాయి. తప్పనిసరి పరిస్థితుల్లో ఆన్లైన్ పాఠాలు మొదలుపెట్టిన విద్యా సంస్థలు... వాటికి ఆధునికతను జోడిస్తున్నాయి. విద్యా సంస్థలు ప్రారంభమైన అనంతరం ఉపయోగపడేలా... డిజిటల్ కంటెంట్ను సమకూర్చుకుంటున్నాయి. దీనికి అనుగుణంగా నూతన సాంకేతిక పరిజ్ఞానంతో.. పిల్లలకు డిజిటల్ పాఠ్యాంశాలను రూపొందిస్తున్నాయి.
- నూతన పద్ధతుల్లో బోధన...
ప్రస్తుతం బ్లాక్ బోర్డు ఆధారంగా బోధిస్తున్న పాఠాలను... కెమెరా లేదా మొబైల్ ఫోన్లో వీడియో చిత్రీకరించి.. విద్యార్థులకు చేరవేస్తున్నారు. జూమ్, గూగుల్ మెట్, వెబెక్స్ వంటి యాప్స్ ద్వారా ప్రత్యక్షంగా బోధిస్తున్నప్పుడు.. మధ్యలో అవసరమైన వీడియోలను ప్రదర్శిస్తున్నారు. ఐతే... వీడియోలు ప్రదర్శించినప్పడు... ఉపాధ్యాయుడు కనిపించడం లేదు. ముందుగా ప్రదర్శించి.. ఆ తర్వాత ఉపాధ్యాయుడు వాటి గురించి వివరిస్తున్నారు. వీటిని అధిగమించేందుకు నూతన పద్ధతులను వెతుకుతున్నామని నిపుణులు చెబుతున్నారు.
- మరింత సమర్థవంతంగా...
ఆన్లైన్ తరగతులను మరింత సమర్థవంతంగా నిర్వహించేలా.. టూడీ, త్రీడీ యానిమేషన్, గ్రాఫిక్స్ జోడించి పాఠ్యాంశాలను డిజిటల్ కంటెంట్గా రూపొందిస్తున్నారు. పాఠాల్లోని జంతువులు, మొక్కల వంటివన్నీ విద్యార్థులకు కళ్ల ముందే కదులుతున్నట్లుగా తయారు చేస్తున్నారు. క్లౌడ్ కంప్యూటింగ్, ఆర్టిఫియల్ ఇంటిలిజెన్స్, మెషీన్ లెర్నింగ్ వంటి సాంకేతిక పరిజ్ఞానాన్ని ఉపయోగించి... పాఠ్యాంశాలను సిద్ధం చేస్తున్నారు.
- బోధనే కాదు... పరీక్షలు కూడా...
సాధారణంగా యూట్యూబ్లో ఎవరో చెబుతున్న పాఠాలు విద్యార్థులకు పూర్తిస్థాయిలో అర్థం కాకపోవచ్చు. అదే డిజిటల్రూపంలో.. రోజూ పాఠశాల లేదా కళాశాలలో బోధించే ఉపాధ్యాయుడే చెప్పేలా తీర్చిదిద్దుతున్నారు. కేవలం బోధనకే పరిమితం కాకుండా...ఆన్లైన్లో పరీక్షలు నిర్వహించి.. మూల్యాంకనం చేసే విధంగా ఏర్పాట్లు చేస్తున్నారు. విద్యార్థుల హాజరు సైతం డిజిటల్ తెరల ద్వారా నమోదు చేసే సాంకేతికతను అందుబాటులోకి తీసుకువస్తున్నారు.
విద్యా సంస్థలు ప్రారంభమయ్యాక సైతం డిజిటల్ తరగతులను ప్రోత్సహించాలని కేంద్ర, రాష్ట్ర ప్రభుత్వాలు భావిస్తున్నాయి. దీనికి అనుగుణంగా కంటెంట్ రూపొందించేందుకు పరిశోధనలు సాగుతున్నాయి.
ఇవీ చదవండి
