రాష్ట్ర మంత్రివర్గ సమావేశం ముగిసింది. సీఎం జగన్ అధ్యక్షతన జరిగిన సమావేశంలో పలు కీలక నిర్ణయాలకు ఆమోదముద్ర వేసింది. ఈ మేరకు రాష్ట్ర సమాచార శాఖ మంత్రి పేర్ని నాని వివరాలను వెల్లడించారు. బుధవారం మధ్యాహ్నం 12 తర్వాత బస్సులు, ఆటోలు నడపకూడదని నిర్ణయించింది. ఉదయం 11 గంటల వరకే కళాశాలలు నిర్వహించాలని స్పష్టం చేసింది.
ఆస్పత్రుల్లో ఆక్సిజన్ సమస్య పరిష్కారానికి ప్రత్యేక చర్యలు చేపట్టామని మంత్రి పేర్ని నాని చెప్పారు. తమిళనాడు, కర్ణాటక, ఒడిశా నుంచి ఆక్సిజన్ రప్పిస్తున్నామని తెలిపారు. రైతుల ఖాతాల్లో ఇన్పుట్ సబ్సిడీ జమ చేశామని.. గత ప్రభుత్వం బకాయిలు పెట్టిన ఇన్పుట్ సబ్సిడీ సైతం అందిస్తున్నామని వివరించారు. వైఎస్ఆర్ మత్స్యకార భరోసా కింద కుటుంబానికి రూ.10 వేలు పరిహారం అందిస్తున్నామని... నాటుపడవలపై వేటకు వెళ్లే అందరికీ మత్స్యకార భరోసా పథకం అమలు చేస్తున్నామని పేర్కొన్నారు. ఈ నెల 13న రైతుభరోసా తొలివిడత జమ చేయాలని మంత్రివర్గం నిర్ణయించిందని చెప్పారు. రూ.4,050 కోట్లు విడుదల చేస్తామని.. 54 లక్షల మందికి లబ్ధి పొందునున్నారని వెల్లడించారు.
'2020 ఖరీఫ్ ఉచిత పంటలబీమాను ఈ నెల 8న జమ చేయాలని నిర్ణయించాం. మత్స్యకార భరోసా కింద ఈ నెల 18న రూ.10 వేలు చెల్లిస్తాం. నాటుపడవలు, తెప్పల్లో వేటకు వెళ్లే మత్స్యకారులకు పథకం వర్తింపజేయాలని నిర్ణయం తీసుకున్నాం'- పేర్నినాని, రాష్ట్ర సమాచార శాఖ మంత్రి
ఏడో తరగతి విద్యార్థులకు సీబీఎస్ఈ అమలు కోసం సీబీఎస్ఈతో ఒప్పందం కుదుర్చుకోవాలని కేబినెట్ నిర్ణయం తీసుకుందని మంత్రి వెల్లడించారు. 2024-25 బ్యాచ్ పదోతరగతి విద్యార్థులు సీబీఎస్ఈ పరీక్షలు రాస్తారని చెప్పారు.
ఈ రెండేళ్లలో సర్కారు బడుల్లో 6.12 లక్షల మంది పెరిగారు. 44,639 పాఠశాలల్లో సీబీఎస్ఈ సిలబస్ ప్రవేశపెడుతున్నాం. ప్రపంచ బ్యాంకు నుంచి రూ.1,860 కోట్లు తీసుకునేందుకు ఆమోదం తెలిపాం. ఎయిడెడ్ పాఠశాలలను అప్పగిస్తే తీసుకునేందుకు ప్రభుత్వం సిద్ధంగా ఉంది. ప్రైవేట్ వర్సిటీ చట్టంలో మార్పు చేయాలని మంత్రివర్గం నిర్ణయం తీసుకంది. ప్రైవేట్ వర్సిటీల్లో 35 శాతం సీట్లు కన్వీనర్ కోటాలో భర్తీకి నిర్ణయించాం. ఏపీ డెయిరీ డెవలప్‌మెంట్‌కు చెందిన ఆస్తులు అమూల్‌కు లీజుకు ఇవ్వడంతో పాటు..వచ్చే ఏడాదికి అన్ని గ్రామాలకు అమూల్ విస్తరణకు కేబినెట్ నిర్ణయం తీసుకుంది. ప్రకాశం పాల ఉత్పత్తి సంస్థ అప్పులు తీర్చడం పునరుద్దరణకు రూ.69 కోట్లు మంజూరుకు ఆమోదముద్ర వేసింది. - పేర్నినాని, రాష్ట్ర సమాచార శాఖ మంత్రి
గౌరవ వేతనాలు పెంపు...
ఎ-కేటగిరీ ఆలయాల్లోని అర్చకుల గౌరవ వేతనం రూ.15 వేలు.. బి-కేటగిరీ ఆలయాల్లోని అర్చకుల గౌరవ వేతనం రూ.10 వేలకు పెంపునకు కేబినెట్ ఆమోదం తెలిపింది. ఇమామ్‌లకు రూ.5 వేల నుంచి 10 వేలు, మౌజమ్ లకు 3 వేల నుంచి 5 వేలు, పాస్టర్లకు 5 వేలు గౌరవ వేతనం ఇవ్వాలని నిర్ణయించింది. 176 మండలాల్లో పీహెచ్ సీలు ఏర్పాటు 511 కోట్ల నిధులు మంజూరు చేస్తూ మంత్రివర్గం నిర్ణయించింది. ప్రతి మండలంలో రెండు ప్రాథమిక ఆరోగ్య కేంద్రాలు ( పీహెచ్ సీలు) ఉండేలా చర్యలు తీసుకోవాలని.. రెండు పీహెచీసీలకు కలిపి నలుగురు డాక్టర్లు ఉండాలని నిర్ణయం తీసుకుంది.
కేబినెట్ నిర్ణయాలు:
- కడప స్టీల్‌ ప్లాంట్‌ను ఎస్సార్‌ స్టీల్స్‌కు అప్పగించాలని కేబినెట్ నిర్ణయం
- కృష్ణపట్నం పోర్టులో మౌలిక వసతులకు రూ.1448 కోట్లు మంజూరుకు పచ్చజెండా
- పల్నాడు కరవు నివారణకు రూ.2740 కోట్లు రుణం తీసుకొనేందుకు ఆమోదం
- బుధవారం మధ్యాహ్నం 12 గంటల తర్వాత ఆర్టీసీ, సహా ప్రైవేటు వాహనాల రాకపోకలపై నిషేధం. అంతర్రాష్ట్ర సర్వీసులతో పాటు, దూర ప్రాంతాలకు వెళ్లే వాహనాల సేవలు కూడా రద్దు
- ఆస్పత్రుల్లో ఆక్సిజన్ సమస్య పరిష్కారానికి ప్రత్యేక చర్యలు. తమిళనాడు, కర్ణాటక, ఒడిశా నుంచి ఆక్సిజన్ రప్పించేందుకు చర్యలు
- బీసీల రిజర్వేషన్లు మరో పదేళ్లు పెంపు.
- ఈనెల 13న రైతు భరోసా తొలి విడత జమ. 54 లక్షల మంది రైతుల ఖాతాల్లో రూ.4వేల 40 కోట్లు జమ. మే 25న 38లక్షల మంది రైతుల ఖాతాల్లో రూ.2,805 కోట్లు జమ
- వైఎస్ఆర్ మత్స్యకార భరోసా కింద కుటుంబానికి రూ.10వేలు పరిహారం. 2021 మే 18న మరో 1లక్షా 460మందికి అందజేత
- రాష్ట్రంలోని 44,639 ప్రభుత్వ పాఠశాలల్లో సీబీఎస్ఈ విధానం అమలు
- ఏపీలో మూసేసిన సహకార డెయిరీలను అమూల్‌కు లీజుకిస్తున్నాం. మొత్తం 708 గ్రామాల్లో అమూల్ సేవలు
- అర్చకులకు రూ.10వేల నుంచి రూ.15వేల గౌరవ వేతనం పెంపు. బి కేటగిరి ఆలయాల్లో రూ.5వేల నుంచి రూ.10వేల గౌరవ వేతనం
- ఇమామ్‌లకు రూ.5వేల నుంచి రూ.10వేల గౌరవ వేతనం పెంపు. మౌజమ్‌లకు రూ.3వేల నుంచి రూ.5వేల గౌరవ వేతనం
- 45ఏళ్లు పైబడిన వారికి వ్యాక్సినేషన్‌ పూర్తయిన తర్వాతే 18-44ఏళ్ల వారికి వ్యాక్సిన్‌ వేయాలని నిర్ణయం
- ప్రైవేటు వర్సిటీ చట్టం మారుస్తూ మంత్రివర్గ నిర్ణయం. ప్రైవేటు వర్సిటీల్లో 35శాతం సీట్లు ప్రభుత్వానికి కేటాయించేలా చట్టంలో మార్పు
ఇదీ చదవండి:
