'కార్యాలయాలు వేరే జిల్లాకు మార్చడమెందుకు?'

విజిలెన్స్‌ కమిషన్‌, ఎంక్వైరీ కార్యాలయాలకు స్థలం సరిపోకపోతే ఇక్కడే వేరే కార్యాలయంలోకి వెళ్లాలి కాని.. మరో జిల్లాకు ఎందుకు తరలించాల్సి వచ్చిందో చెప్పాలని రాష్ట్ర ప్రభుత్వాన్ని హైకోర్టు ప్రశ్నించింది. ఈ కార్యాలయాలు వెలగపూడి సచివాలయంలో ఎంత విస్తీర్ణంలో ఉన్నాయి? కావాల్సిన విస్తీర్ణం ఎంత? అందులోని సిబ్బంది, వారి జీతభత్యాల వివరాలతో.. ముఖ్య కార్యదర్శి స్థాయి అధికారితో ప్రమాణ పత్రం దాఖలు చేయాలని ఆదేశించింది.

విజిలెన్స్‌ కమిషన్‌ కార్యాలయాన్ని ఎక్కడో ఏర్పాటు చేయడం వల్ల పర్యవేక్షణ ఎలా సాధ్యమవుతుందో తెలపాలని ప్రభుత్వాన్ని హైకోర్టు ప్రశ్నించింది. సాధారణ పరిపాలన శాఖకు విజిలెన్స్‌ కమిషన్‌కు సంబంధం ఏ విధంగా లేదో వివరించాలంది. పూర్తి వివరాలతో ప్రమాణపత్రం దాఖలు చేయడం కోసం విచారణను సోమవారానికి వాయిదా వేసింది. మరోవైపు రాజధాని వ్యవహారంలో దురుద్దేశంతో వ్యవహరించారని, న్యాయ ప్రతిష్ఠకు భంగం కలిగేలా వ్యాఖ్యలు చేశారని పేర్కొంటూ ముఖ్యమంత్రి, పలువురు మంత్రులు, ప్రభుత్వ సలహాదారులను ఓ పిల్‌లో ప్రతివాదులుగా చేర్చడంపై ధర్మాసనం అభ్యంతరం వ్యక్తంచేసింది. వివిధ అభ్యర్థులను ఒకే వ్యాజ్యంలో ఎందుకు కోరారని పిటిషనర్‌ రమేశ్‌ తరఫు న్యాయవాది మురళీధరరావును ఉద్దేశించి ధర్మాసనం వ్యాఖ్యానించింది.

న్యాయవ్యవస్థ హుందాతనం ఎలా కాపాడుకోవాలో తమకు తెలుసని హైకోర్టు స్పష్టం చేసింది. ఈ వ్యవహారంలో తమకు అధికారాలున్నాయని గుర్తుచేసింది. న్యాయ ప్రతిష్ఠను దెబ్బతీసేలా ఎవరు ఏమి మాట్లాడారో తెలుసని పేర్కొంది. ప్రతి అంశంపై విచారణ జరపాలని కోరితే ఎలా అని ధర్మాసనం ప్రశ్నించింది. రాజకీయ వ్యాఖ్యల విషయంలో వారిపై విచారణకు ఆదేశించలేమని పేర్కొంది. వారికి నోటీసులు ఇవ్వాల్సిన అవసరం లేదని స్పష్టంచేసింది. రాజధాని, కార్యాలయాల తరలింపు అంశానికే అభ్యర్థన పరిమితం కావాలని పిటిషనర్‌ రమేశ్‌ తరఫు న్యాయవాది మురళీధరరావుకు సూచించింది. అందుకు న్యాయవాది అంగీకరించారు. హైకోర్టు ప్రధాన న్యాయమూర్తి జస్టిస్‌ జేకే మహేశ్వరి, జస్టిస్‌ ఏవీ శేషసాయి, జస్టిస్‌ ఎం.సత్యనారాయణమూర్తితో కూడిన త్రిసభ్య ధర్మాసనం బుధవారం ఈ మేరకు ఆదేశాలు జారీ చేసింది.

విజిలెన్స్‌ కమిషనర్‌, కమిషనర్‌ ఆఫ్‌ ఎక్వైరీస్‌ కార్యాలయాలను కర్నూలుకు తరలించేందుకు జారీచేసిన జీవోతో పాటు, విశాఖలోని మిలీనియం టవర్స్‌-బీ నిర్మాణ పనుల కోసం రూ.19.73 కోట్లు మంజూరు చేస్తూ రాష్ట్ర ప్రభుత్వం ఇచ్చిన జీవోలను సవాలు చేస్తూ సాఫ్ట్‌వేర్‌ ఇంజినీర్‌ ఎం.రమేశ్‌ హైకోర్టులో ప్రజాహిత వ్యాజ్యం దాఖలు చేశారు. రాజధాని నిర్మాణ పనులను కొనసాగించాలని కోరారు. మరోవైపు కార్యాలయాల తరలింపును నిలువరించాలని ‘రాజధాని రైతు పరిరక్షణ సమితి’ కార్యదర్శి రామారావు, పాటిబండ్ల వెంకట సుధాకర్‌ తదితరులు వేర్వేరుగా అనుబంధ పిటిషన్లు దాఖలు చేశారు. అడ్వొకేట్‌ జనరల్‌(ఏజీ) ఎస్‌.శ్రీరామ్‌ వాదనలు వినిపిస్తూ.. విజిలెన్స్‌ కమిషన్‌ కార్యాలయం ఏర్పాటు కోసం మంగళగిరి వద్ద ఉన్న ఏపీఐఐసీ కార్యాలయాన్ని పరిశీలించామని, అక్కడ సరిపడ స్థలం లేదన్నారు. ఈ నేపథ్యంలో కర్నూలుకు తరలిస్తున్నామని తెలిపారు. ప్రస్తుతం ఉన్న భవనంలో స్థలం సరిపోకపోతే మరో కార్యాలయంలోకి మారాలి కాని.. మరో జిల్లాకు ఎందుకు మారుస్తున్నారని ధర్మాసనం ప్రశ్నించింది.

ఇదీ చదవండి: