పొదుపు చేసిన సొమ్ము మొత్తం శ్రీవారికి - రూ. 50 లక్షల విరాళం అందజేసిన మహిళ

ఉద్యోగ జీవితంలో పొదుపు చేసిన రూ. 50 లక్షల రూపాయలను శ్రీవారికి కానుకగా అందించిన మహిళ- పలు దేశాల్లో విపత్తులు, స్పందన విభాగాల్లోనూ సేవలు

A Woman Donates 50 Lakhs To TTD: భారత్‌ సహా పలు దేశాల్లో విపత్తులు, స్పందన విభాగంలో సేవలందించిన ఓ మహిళ తన ఉద్యోగ జీవితంలో పొదుపు చేసిన సొమ్మును శ్రీవారికి కానుకగా సమర్పించారు. తిరుమల తిరుపతి దేవస్థానానికి చెందిన విద్యాసంస్థల్లో చదువుతున్న అనాథ, పేద పిల్లల సంక్షేమానికి దీనిని వినియోగించాలని ఆమె ఈ సందర్బంగా కోరారు. రేణిగుంటకు చెందిన సి.మోహన అనే మహిళ ఉద్యోగ రీత్యా అల్బేనియా, యెమెన్, సౌదీ అరేబియా తదితర దేశాల్లో అభివృద్ధి - విపత్తు నిర్వహణ రంగాల్లో వివిధ హోదాల్లో సేవలందించారు. ఆమె ఎక్కడ పని చేస్తున్నా గోవిందుని నామస్మరణ మాత్రం మరిచిపోలేదు. ప్రత్యేకంగా పొదుపు చేస్తూ ఆ సొమ్మును శ్రీవారికి కానుకగా ఇవ్వాలని ఆమె సంకల్పించారు. ఈ మొత్తం రూ.50 లక్షల రూపాయలు కాగా సోమవారం తిరుమల తిరుపతి దేవస్థానం అదనపు ఈవో వెంకయ్య చౌదరిని కలిసి డీడీని అందజేశారు. మోహన ఇచ్చిన నగదు మొత్తం తిరుమల తిరుపతి దేవస్థానం శ్రీవేంకటేశ్వర సర్వశ్రేయస్‌ ట్రస్టుకు జమకానుంది.