ప్రభుత్వ ఉత్తర్వులను వెబ్సైట్లో ఉంచొద్దంటూ ప్రభుత్వం తీసుకున్న నిర్ణయాన్ని సవాల్ చేస్తూ ఏపీ జర్నలిస్ట్ ఫోరం (ఏపీజెఎఫ్) అధ్యక్షుడు కృష్ణాంజనేయులు హైకోర్టులో వ్యాజ్యాన్ని దాఖలు చేశారు. ఏపీ ప్రభుత్వ జీవోలను ఆన్లైన్లో ఉంచడం 1990 నుంచి కొనసాగుతోందని వ్యాజ్యంలో తెలిపారు. సమాచార హక్కు చట్టంలో పేర్కొన్న అంశాలకు అనుగుణంగా 2008 నుంచి పూర్తి స్థాయిలో పారదర్శకంగా జీవోలను ఆన్లైన్లో ఉంచుతున్నారన్నారు. గత ప్రభుత్వం సైతం ఈ విధానాన్ని కొనసాగించిందని తెలిపారు. ప్రస్తుత ప్రభుత్వం జీవోలను వెబ్ సైట్లో ఉంచకూడదని నిర్ణయించిందన్నారు. ఈ వ్యవహారమై అన్ని శాఖలకు జీఏడీ ముఖ్యకార్యదర్శి నోట్ను పంపించారని చెప్పారు. మరో నోట్ పంపుతూ జీవోల విషయమై మూడు రిజిస్టర్లను నిర్వహించాలని చెప్పినట్లు గుర్తుచేశారు. సహచట్టం సెక్షన్ 4 (1)(బి) ప్రకారం ప్రభుత్వ సమాచారాన్ని విస్తృతంగా ప్రజా బాహుళ్యంలో ఉంచాల్సిన అవసరాన్ని స్పష్టం చేస్తోందన్నారు. ప్రజాసంస్థలకు ఈ విషయంలో బాధ్యతలను విధించింది. తమకు తాముగా ప్రజాసంస్థలు వివరాలు వెల్లడి చేయాలని తెలిపిందన్నారు. భద్రత, నిఘా తదితర వ్యవహారాలకు సంబంధించిన అంశాలు తప్ప ఇతర ఏ జీవోలైనా ప్రజాపత్రాలే, సహ చట్టం సైతం ఆ పత్రాలన్నింటిని ప్రజలకు అందుబాటులో ఉంచాలని స్పష్టం చేస్తోందన్నారు. ఆగస్టు నుంచి ప్రభుత్వం బ్లాంక్ ఆర్డర్లను వెబ్ సైట్లో ఉంచడం ప్రారంభించిందని వ్యాజ్యంలో తెలిపారు. ఈ విధంగా 60 జీవోలు ఇచ్చారన్నారు. ఆగస్టు 17 నుంచి వెబ్ సైట్లో జీవోలను అప్లోడ్ చేయడం పూర్తిగా నిలిపేశారని తెలిపారు.
జీఏడి ముఖ్యకార్యదర్శి ఇచ్చిన ప్రొసీడింగ్స్ను రద్దు చేయాలని అభ్యర్థించారు. జీవోలన్నింటినీ వెబ్ సైట్లో అప్లోడ్ చేసేలా అధికారులను ఆదేశించాలని కోరారు. జీవోలను వెబ్సైట్లో ఉంచేలా అధికారులను ఆదేశించాలని కోరారు.
ఇదీ చదవండి: jagan cbi case: అక్రమాస్తుల కేసులో తన పేరు తొలగించాలని.. సీఎం జగన్ డిశ్చార్జ్ పిటిషన్
