తెలంగాణ వ్యాప్తంగా విస్తారంగా వర్షాలు కురుస్తున్నాయి. రానున్న మూడు రోజులూ భారీ వానలు నమోదు కానున్నట్లు వాతావరణ శాఖ అధికారులు పేర్కొన్నారు. ఈ నేపథ్యంలో అధికార యంత్రాంగం అప్రమత్తమైంది.
ఉమ్మడి ఖమ్మం జిల్లా వ్యాప్తంగా వర్షం బీభత్సం సృష్టించింది. రాత్రి నుంచి జోరుగా కురుస్తున్న వానలతో జనజీవనం అతలాకుతలమైంది. జిల్లా వ్యాప్తంగా వందలాది ఎకరాల్లో పంటలు దెబ్బతిన్నాయి. వైరా, సత్తుపల్లి పరిధిలోని గ్రామాల్లో కుండపోత వానతో.. పలు ఇళ్లు కూలిపోయాయి. పంట పొలాలు నీట మునిగాయి. వరదలో చిక్కుకున్న వస్తువులను కాపాడుకునేందుకు ప్రజలు నానా అవస్థలు పడ్డారు.
ఆ చీరలు నీటిపాలు..
తల్లాడ మండలం కుర్నవల్లి ఉన్నత పాఠశాల జలమయమైంది. పాఠశాలలో నిల్వ చేసిన బతకమ్మ చీరలు, రేషన్‌ బియ్యం నీటి పాలయ్యాయి. తల్లాడలో ఇళ్లు కూలిన ఘటనలో 20 గొర్రెలు, మేకలు మృత్యువాత పడ్డాయి. అశ్వారావుపేట, దమ్మపేట, ముల్కలపల్లిలో విద్యుత్‌ సరఫరాకు తీవ్ర అంతరాయం కలిగింది.
బొగ్గు ఉత్పత్తికి అంతరాయం..
ముల్కలపల్లి మండలం పొగుళ్లపల్లి వద్ద వాగు ఉద్ధృతికి ఓ ద్విచక్రవాహనం కొట్టుకుపోయింది. వాగులో కొట్టుకుతున్న వ్యక్తిని స్థానికులు కాపాడారు. ముల్కలపల్లి మండలం నరసాపురం, తోగూడెం గ్రామాలకు రాకపోకలు నిలిచిపోయాయి. ఇల్లెందు, కోయగూడెం ఉపరితల గనుల్లో పనులు నిలిచిపోయాయి. కిష్టారం గనుల్లో 25 వేల మెట్రిక్‌ టన్నుల బొగ్గు ఉత్పత్తికి అంతరాయం ఏర్పడింది.
రోగులు అవస్థలు..
మధిర పట్టణంలో కుండపోత వర్షానికి ఇళ్లలోకి వరదనీరు చేరింది. మధిర ప్రభుత్వ ఆస్పత్రిలోకి మోకాలి లోతు వరద నీరు చేరింది. ప్రసూతి వార్డులోకి సైతం పెద్ద ఎత్తున నీరు చేరగా.. బాలింతలు, చిన్నారులు తీవ్ర ఇబ్బందులకు గురయ్యారు. ఇప్పటికే శిథిలావస్థకు చేరిన ఆస్పత్రి భవనంలో.. ఎడతెరిపి లేకుండా కురుస్తున్న వర్షానికి రోగులు బిక్కుబిక్కుమంటూ కాలం గడుపుతున్నారు.
ఉమ్మడి వరంగల్ వ్యాప్తంగా..
ఉమ్మడి వరంగల్ జిల్లా వ్యాప్తంగా పల్లెలు, పట్టణాలన్నీి తడిసి ముద్దవుతున్నాయి. వరంగల్, కాజీపేట, హన్మకొండ ప్రాంతాల్లో ఉదయం మోస్తరుగా కురిసినా.. ఆ తర్వాత జోరందుకుంది. రహదారులు జలమయం కావడం వల్ల వాహనదారులు తీవ్ర ఇక్కట్ల పాలయ్యారు. మహబూబాబాద్ జిల్లా గూడురు, కొత్తగూడ, గంగారం, బయ్యారం, గార్ల మండలాల్లో ఎడ తెరిపిలేకుండా వాన కురిసింది.
ఎడతెరిపి లేని వానలతో..
వరంగల్ గ్రామీణ జిల్లా, ములుగు, జయశంకర్ భూపాలపల్లి జిల్లాలోనూ ఎడతెరపిలేని వానలతో.. జనజీవనం స్తంభించింది.
సూర్యాపేట జిల్లాలో..
సూర్యాపేట జిల్లా దొండపాడులో ఎర్ర వాగు పొంగగా.. రాకపోకలకు తీవ్ర అంతరాయం ఏర్పడింది. వాగు ఉద్ధృతికి పంటలు పెద్ద ఎత్తున దెబ్బతిన్నాయి.
