ఎంపికైనట్లు చెప్పి... వెంటనే అనర్హులన్నారు

ఉద్యోగాలకు ఎంపికైనట్టు నియామక పత్రాలు ఇచ్చి వెంటనే విధుల్లో చేరాలని చెప్పటంతో వారు ఆనందపడ్డారు. అయితే రోజుల వ్యవధిలోనే ఆ ఉద్యోగానికి అనర్హులని చెప్తూ నిరాశపరిచారు. గ్రామ, వార్డు సచివాలయాల్లోని కొన్ని పోస్టుల నియామకంలో విద్యార్హత విషయంలో గందరగోళం తలెత్తటం వలన పదుల సంఖ్యలో అభ్యర్థులు నైరాశ్యంలో కూరుకుపోతున్నారు.

వార్డు సంక్షేమ అభివృద్ధి కార్యదర్శి ఉద్యోగాల ఎంపిక ప్రక్రియ గందరగోళంగా మారింది. కడప జిల్లాలో ఈ ఉద్యోగాలకు ఎంపికైన వారిలో 50మంది అనర్హులుగా అధికారుల నుంచి సమాచారం అందటంతో వారు నిర్ఘాంతపోయారు. నియామక పత్రాలు అందుకున్న రెండు రోజులకే బీకాం అర్హత ఉన్న వారు ఈ పోస్టుకు అర్హులు కాదని అధికారులు వారికి సమాచారమందించారు. ఉద్యోగానికి రాజీనామా చేయాలని తమకు జిల్లా అధికారులు సూచిస్తున్నట్టు బాధితులు వాపోతున్నారు. రాష్ట్రవ్యాప్తంగా ఈ పోస్టుకు అనర్హులుగా అధికారులు చెప్తున్నవారి సంఖ్య 800 మంది వరకూ ఉండొచ్చంటున్నారు.

నోటిఫికేషన్‌లో పేర్కొన్న విద్యార్హతల్లో బీకాం కూడా భాగమేనని ఇప్పుడు ఆ డిగ్రీ ఉన్నవారు అనర్హులనడమేంటని అభ్యర్థులు ప్రశ్నిస్తున్నారు. ప్రభుత్వం తమకు న్యాయం చేయాలని కోరుతున్నారు. నియామక పత్రాలు అందినవారిని అనర్హులుగా ఓ వైపు ప్రకటిస్తున్నా ఇంకా చాలా మందికి నియామక పత్రాలూ అందలేదని కొందరు అభ్యర్థులు వాపోతున్నారు.