కీలక నిర్ణయం... జనవరి 2 నుంచి ఇంటికే ఇసుక..!

ఇసుక కష్టాలను తీర్చేందుకు ప్రభుత్వం కీలక నిర్ణయం తీసుకుంది. జనవరి 2 నుంచి ఇంటి వద్దకే ఇసుక తరలించే కార్యక్రమం ప్రారంభించనుంది. ఇసుక విధానం అమలు తీరుపై సీఎం జగన్ జరిపిన సమీక్షలో ఈ నిర్ణయం తీసుకున్నారు.

అధికారంలోకి వచ్చాక నూతన ఇసుక విధానాన్ని అమలు చేస్తున్న రాష్ట్ర ప్రభుత్వం... ఇంటి వద్దకే ఇసుక పంపిణీ చేసే కార్యక్రమానికి శ్రీకారంచుట్టనుంది. ఇసుక విధానం, అమలవుతున్న తీరుపై సీఎం జగన్... క్యాంపు కార్యాలయంలో సమీక్ష నిర్వహించారు. జనవరి 2 నుంచి కృష్ణా జిల్లాలో పైలట్ ప్రాతిపదికన ఇసుక డోర్ డెలివరీ విధానాన్ని అమలు చేయాలని నిర్ణయించారు.

జనవరి 20లోపు అన్ని జిల్లాలోనూ..
జనవరి ఏడో తేదీ నుంచి ఉభయగోదావరి, కడప, జనవరి 20లోపు అన్ని జిల్లాల్లోనూ ఈ విధానం అమలు చేయాలని ముఖ్యమంత్రి జగన్ ఆదేశించారు. మద్యం, ఇసుక అక్రమ రవాణాను అడ్డుకోవడానికి ఏర్పాటవుతున్న చెక్‌ పోస్టులపైనా ఆయన ఆరా తీశారు. వచ్చే నెల 20లోపు చెక్‌పోస్టుల ఏర్పాటు, సీసీ కెమెరాల లైవ్‌ స్ట్రీమింగ్... ఇసుక డోర్‌ డెలివరీ ప్రారంభం కావాలని స్పష్టం చేశారు.

ఇప్పటికే 349 చెక్‌పోస్టులు ఏర్పాటు చేశామని అధికారులు సీఎంకు వివరించారు. మిగిలినవి వీలైనంత త్వరలో ఏర్పాటు చేస్తామన్నారు. ఇసుక సరఫరా వాహనాలకు జీపీఎస్ వ్యవస్థ ఏర్పాటుపై సీఎం ఆరా తీశారు. ఇసుక సరఫరా చేసే 9వేల వాహనాలకు జీపీఎస్ అమర్చామని అధికారులను ఆదేశించారు.

ప్రస్తుతం రాష్ట్రవ్యాప్తంగా రోజుకు 80 వేల మెట్రిక్ టన్నుల ఇసుక వెలికి తీస్తున్నామని పంచాయతీరాజ్‌శాఖ మంత్రి పెద్దిరెడ్డి రామచంద్రారెడ్డి తెలిపారు. 155 స్టాక్ యార్డుల్లో 13 చోట్ల ఇసుక త్వరగా అయిపోతోందని... అందుకే డోర్ డెలివరీ విధానాన్ని తీసుకోస్తున్నామన్నారు. ప్రభుత్వం తర్వాత రవాణా ఛార్జీలు చెల్లించేలా ఈ విధానం ఉంటుందని తెలిపారు.

ఇళ్ల పట్టాలపైనా సమీక్ష

ఉగాది నాటికి ఇళ్లపట్టాలు ఇచ్చే కార్యక్రమం త్వరితగతిన జరిగేందుకు బృందాలు ఏర్పాటు చేయాలని సీఎం జగన్ అధికారులను ఆదేశించారు. పేదలకు ఇళ్లపట్టాల పంపిణీపై ఆయన సమీక్షించారు. ఇళ్లపట్టాల కోసం భూముల గుర్తింపు ప్రక్రియ వేగంగా పూర్తిచేయాలని... జిల్లాల వారీగా ఉన్నతాధికారులు పర్యటించి సమీక్ష చేయాలని సీఎం స్పష్టం చేశారు.

ఇదీ చదవండి : 'ఇష్టానుసారం మాట్లాడితే నాలుక తెగ్గోస్తాం'