సీఎంతో రాష్ట్రస్థాయి బ్యాంకర్ల సమావేశం ముఖ్యమంత్రి వైఎస్ జగన్ మోహన్రెడ్డి అధ్యక్షతన 208వ రాష్ట్రస్థాయి బ్యాంకర్ల సమావేశం(ఎస్ఎల్బీసీ) జరిగింది. సచివాలయం మొదటి బ్లాక్లో నిర్వహించిన ఈ సమావేశంలో ఆర్థిక మంత్రి బుగ్గన రాజేంద్రనాథ్ రెడ్డి, వ్యవసాయశాఖ మంత్రి కురసాల కన్నబాబు, వివిధ బ్యాంకుల ఉన్నతాధికారులు పాల్గొన్నారు. రాష్ట్ర ప్రభుత్వం కొత్తగా తెచ్చిన పంట సాగుదారుల హక్కు చట్టం 2019 ప్రకారం కౌలు రైతులకు పెట్టుబడి సాయం, రైతు రుణాల పెండింగ్ అంశాలపై సమావేశంలో ప్రధానంగా చర్చించారు. ప్రస్తుత ఖరీఫ్ సీజన్కు రూ.24వేల కోట్ల రుణాలు ఇవ్వాలని ప్రభుత్వం లక్ష్యంగా పెట్టుకుంది. ఈ రుణ లక్ష్యానికి అనుగుణంగా బ్యాంకులు అందించాల్సిన సాయంపై సమావేశంలో చర్చించినట్లు సమాచారం. వచ్చే నెల 15వ తేదీ నుంచి ప్రభుత్వం ప్రతిష్టాత్మకంగా ప్రారంభించనున్న వైఎస్సార్ రైతు భరోసా అమలుపైనా ఎస్ఎల్బీసీ సమావేశంలో బ్యాంకర్లకు సీఎం సూచనలు చేసినట్టు తెలుస్తోంది. రైతు భరోసా కింద రాష్ట్ర ప్రభుత్వం చెల్లించే రూ.6,500 నగదును ఇతర రుణాలకు జమ చేయవద్దని ముఖ్యమంత్రి జగన్ బ్యాంకర్లకు స్పష్టం చేసినట్లు తెలుస్తోంది.
రుణాల పంపిణీ లక్ష్యానికి చేరువలో : సీఎం
ప్రభుత్వం, బ్యాంకర్లు కలిసి పనిచేస్తేసే విశ్వసనీయత నిలబడుతుందని సీఎం జగన్ అన్నారు. వివిధ వర్గాల ప్రజలకు చేయూత అందించేందుకు అనేక సంక్షేమ పథకాలు ప్రారంభించామన్న సీఎం... సంక్షేమ పథకాలు నేరుగా లబ్ధిదారులకు చేరాలని స్పష్టం చేశారు. వడ్డీలేని రుణాల కింద డబ్బును ప్రభుత్వం ఎప్పటికప్పుడు చెల్లిస్తుందన్నారు. ఈ విషయంలో బ్యాంకర్లు ఏం కోరినా చేయడానికి సిద్ధంగా ఉన్నామని తెలిపారు. వడ్డీలేని రుణాల కింద ఇవ్వాల్సిన డబ్బును నిర్దేశించిన సమయానికి చెల్లిస్తామని హామీ ఇచ్చిన జగన్... ముద్ర పథకం రుణాల పంపిణీ విస్తృతపరచడంపై దృష్టి పెట్టాలని బ్యాంకర్లకు సూచించారు. చిన్నచిన్న దుకాణాలు, తోపుడు బండ్ల చిరువ్యాపారులకు గుర్తింపు కార్డులు అందిస్తామని సీఎం అన్నారు. ఖరీఫ్‌లో రుణాల పంపిణీ లక్ష్యానికి చేరువగా ఉందని బ్యాంకర్లు చెప్పడం సంతోషకరమని ముఖ్యమంత్రి అన్నారు.
ఇదీ చదవండి :
సచివాలయంలో బ్యాంకర్ల సదస్సు ప్రారంభం
