'అవినీతి చేసిన వాళ్లను వదిలేసి.. ప్రశ్నించిన వారిపై కేసులు'

రాష్ట్రంలో పోలీసు రాజ్యం నడుస్తోందని, సాక్షాత్తూ కేంద్ర హోంశాఖ సహాయమంత్రి కిషన్ రెడ్డే పేర్కొనడం వైకాపా అకృత్యాలకు రుజువని తెలుగుదేశం అధినేత చంద్రబాబు మండిపడ్డారు. కరోనా కష్ట సమయంలోనూ వైకాపా ప్రభుత్వం కుంభకోణాలు, కక్ష సాధింపు చర్యలు చేపట్టడం గర్హనీయమని ధ్వజమెత్తారు. ప్రశ్నించే గొంతు నొక్కడం, ప్రజాదరణ గల ప్రతిపక్ష నాయకులపై తప్పుడు ఆరోపణలతో అక్రమ కేసులు పెట్టి వేధించడం వైకాపా ప్రతీకార ధోరణికి ప్రత్యక్ష సాక్ష్యాలని చంద్రబాబు ఆక్షేపించారు.

తెలుగుదేశం అధినేత చంద్రబాబు పార్టీ ముఖ్య నాయకులతో వీడియో కాన్ఫరెన్స్ నిర్వహించారు. రాష్ట్రంలోని ప్రస్తుత పరిస్థితులపై నాయకులతో చర్చించారు. పోలీసులు దౌర్జన్యాలకు పాల్పడుతూ.. కేసులు పెట్టి వేధిస్తున్నారని కేంద్ర సహాయమంత్రి కిషన్ రెడ్డి చేసిన వ్యాఖ్యలు వైకాపా పాలనకు నిదర్శనమని దుయ్యబట్టారు. రాష్ట్రంలో అధికార పార్టీ ఎంపీ ప్రాణాలకే భద్రత లేదని ధ్వజమెత్తారు. తన ప్రాణాలకు ముప్పు ఉందని, కేంద్ర బలగాలతో భద్రత కల్పించాలని వైకాపా ఎంపీ రఘురామకృష్ణరాజు లేఖ రాయడం రాష్ట్రంలో క్షీణించిన శాంతిభద్రతలకు నిదర్శనమన్నారు.

తన ప్రాణాలకు హాని ఉందని, బెదిరింపు కాల్స్ వస్తున్నాయని, కేంద్ర భద్రత కావాలని రాష్ట్ర ఎలక్షన్ కమిషనర్ గతంలోనే లేఖ రాసిన విషయాన్ని ప్రస్తావించారు. ప్రతిపక్షాల నేతలను ఇదే అంశంపై గతంలో లేఖలు పంపారని, వీటన్నింటినీ పరిశీలిస్తే రాష్ట్రంలో వైకాపా ఎంత భయోత్పాతం సృష్టిస్తుందో అర్ధమవుతోందని చంద్రబాబు అన్నారు.

అన్నింటిలోనూ అవినీతే..

ఇంటింటికీ 3 మాస్కులు అందిస్తామని చెప్పి మాట తప్పారని విమర్శించారు. మాస్కుల తయారీలో వైకాపా నాయకులు అవినీతికి పాల్పడ్డారని ఆరోపించారు. కరోనా కిట్లు, బ్లీచింగ్ కొనుగోళ్లలోనూ కుంభకోణాలేనని ధ్వజమెత్తారు. చివరికి అంబులెన్సుల విషయంలోనూ రూ. 307 కోట్ల అవినీతికి పాల్పడ్డారని దుయ్యబట్టారు. అంబులెన్సుల కాంట్రాక్ట్ ఇచ్చిన సంస్థ విజయసాయి రెడ్డి అల్లుడిది కాదా అని ప్రశ్నించారు. సరస్వతి పవర్ సొంత కంపెనీ అవునా ? కాదా ? దానికి నీళ్లు, గనులు ఎలా కేటాయిస్తారని అడిగితే సెక్రటరీతో నోటీసులిస్తారా అని చంద్రబాబు నిలదీశారు. అవినీతికి పాల్పడిన వాళ్లను వదిలేసి.. అక్రమాలను ప్రశ్నించిన వాళ్లను తప్పుడు కేసులతో వేధింపులకు గురి చేస్తారా అని ఆగ్రహం వ్యక్తం చేశారు.

మేం చేసిన దాంట్లో సగం కూడా చేయలేదు

బీసీ వర్గాల కోసం వైకాపా ఏడాదిలో చేసిన ఖర్చు కేవలం రూ. 2,200 కోట్లు మాత్రమేనని చంద్రబాబు అన్నారు. తెదేపా హయాంలో బీసి సబ్ ప్లాన్​కు రూ. 10వేల కోట్లు ఖర్చు చేశామని గుర్తు చేశారు. వైకాపా అధికారంలోకి రాగానే బీసీ రిజర్వేషన్లలో కోత పెట్టటంతో పాటు అమాయకులపై తప్పుడు కేసులు పెట్టి భూములు బలవంతంగా లాక్కున్నారని విమర్శించారు. ఎస్సీ సబ్ ప్లాన్​కు తాము చేసిన ఖర్చు రూ. 9వేల కోట్లయితే.. వైకాపా రూ. 3,370 కోట్లు మాత్రమే ఖర్చు చేసిందని ఆక్షేపించారు. కాపులకు తెదేపా వెయ్యి కోట్లు ఖర్చు చేస్తే... వైకాపా కేవలం రూ. 400 కోట్లే కేటాయించిందని తెలిపారు. తెదేపా హయాంలో కేపిటల్ ఎక్స్​పెండేచర్ కింద రూ. 20వేల కోట్లు ఖర్చు చేస్తే వైకాపా అందులో సగం కూడా ఖర్చుచేయలేదని విమర్శించారు. వీటన్నింటినీ ప్రజల్లోకి తీసుకెళ్లాలని.. వైకాపా ప్రభుత్వ అవినీతి, అరాచకాలను ఎండగట్టాలని చంద్రబాబు పిలుపునిచ్చారు.

పార్టీ సానుభూతిపరులను అక్రమంగా అరెస్టు చేస్తున్నారని చంద్రబాబు మండిపడ్డారు. నిన్న నందిగామలో కృష్ణను, విశాఖలో 70ఏళ్ల కిశోర్​ను అరెస్ట్ చేయడాన్ని తప్పుబట్టారు. సామాజిక మాధ్యమాల్లో పోస్టులు పెట్టారని వృద్ధులు, దళితులను కూడా వదలడం లేదని అక్షేపించారు. ఇంత అధికార దుర్వినియోగం 64ఏళ్ల రాష్ట్ర చరిత్రలో లేదన్న చంద్రబాబు ఇప్పటికైనా దుష్ట ప్రవర్తన మార్చుకోవాలని హితవు పలికారు. ఇష్టారాజ్యంగా చేస్తే ప్రజలే తిరగబడతారని హెచ్చరించారు.

ఇవీ చదవండి... : కరోనా ఉద్ధృతి పెరిగింది.. డిగ్రీ, వృత్తి విద్య పరీక్షలు రద్దు చేయండి: పవన్