తెలంగాణలో దారుణం.. ప్రేమించి పెళ్లి చేసుకున్నాడని కత్తితో దాడి

వారిద్దరూ ప్రేమించుకున్నారు. పెద్దలు అంగీకరించకున్నా పెళ్లి చేసుకున్నారు. ఈ విషయాన్ని జీర్ణించుకోలేని కుటుంబ సభ్యులు వారిపై పగబట్టారు. ఊరికి రమ్మని పిలిచి అబ్బాయి గొంతు కోశారు. తెలంగాణలోని వనపర్తి జిల్లాలో ఈ దారుణం జరిగింది.

తెలంగాణలోని వనపర్తి జిల్లా అచ్యుతాపురం గ్రామానికి చెందిన కళ్యాణ్ 20 రోజుల క్రితం ఓ యువతిని ప్రేమించి పెళ్లి చేసుకున్నాడు. పెద్దలు ఒప్పుకోనందున హైదరాబాద్​కి మకాం మార్చారు. ఇంటికి రమ్మని ఇరు కుటుంబ పెద్దలు ఫోన్ చేయటంతో ఊరెళ్లారు. పెద్దలు పంచాయితీ పెట్టించి మాట్లాడుతుండగా... ఇరు కుటుంబ సభ్యుల మధ్య వాగ్వాదం జరిగింది. కళ్యాణ్​పై అమ్మాయి పెద్ద నాన్న కొడుకు రవి కత్తితో దాడి చేశాడు. ఈ ఘటనలో కళ్యాణ్​ గొంతు భాగంలో తీవ్ర గాయాలయ్యాయి. అపస్మారక స్థితిలోకి చేరుకున్న బాధితుడిని వనపర్తి జిల్లా ప్రభుత్వాసుపత్రికి తరలించారు. చికిత్స చేసిన వైద్యులు 17 కుట్లు వేసి పరిశీలనలో ఉంచారు. సమాచారం అందుకున్న పోలీసులు ఘటనా స్థలానికి చేరుకుని.. నిందితుడిని అదుపులోకి తీసుకున్నారు. బాధితుడి కుటుంబ సభ్యులు ఫిర్యాదు మేరకు కేసు నమోదు చేసి దర్యాప్తు చేస్తున్నారు.

ఇవీ చూడండి: