'ఆర్థిక పెట్టుబడులకు ప్రాధాన్యం పెరిగింది. అదే సమయంలో కుటుంబానికి ఏ సమయంలోనైనా సరైన భరోసా కల్పించేందుకు బీమా పాలసీల అవసరాన్నీ ప్రజలు గుర్తిస్తున్నారు. దేశంలో డిజిటలీకరణ పెరగడంతో బీమా సేవలు కొత్త పుంతలు తొక్కుతున్నాయి. ఒకప్పటితో పోలిస్తే.. ప్రజలు బీమా పాలసీల అవసరాన్ని గుర్తించి, తామే కొనుగోలు చేసేందుకు ముందుకు వస్తున్నారు' అని అంటున్నారు ఎస్బీఐ లైఫ్ ఇన్సూరెన్స్ మేనేజింగ్‌ డైరెక్టర్‌(ఎండీ), సీఈఓ మహేశ్ శర్మ. కొవిడ్‌ తర్వాత బీమా రంగ ప్రాధాన్యత, బాధ్యత మరింత పెరిగాయని చెబుతున్నారు. 'ఈనాడు' ఇంటర్వ్యూలో ఆయన ఇంకా ఏమంటున్నారంటే..
కొవిడ్‌ అనంతర ప్రపంచంలో జీవిత బీమా ప్రాముఖ్యత పెరిగిందా? పాలసీదారుల ఆలోచనలు ఎలా ఉన్నాయి?
కరోనా సమయంలో ఉద్యోగాలు కోల్పోవడం, జీతాల కోతలతో పాటు చాలా కుటుంబాలు తమ ప్రియమైన వారిని కోల్పోయాయి. తగిన జీవిత బీమా ఉండాల్సిన అవసరాన్ని ఇవి తెలియజేశాయి. దీంతో చాలామంది జీవిత బీమా పాలసీల ప్రయోజనాలను అర్థం చేసుకున్నారు. కొత్త సాధారణ జీవితానికి సరిపోయేలా జీవిత బీమా, ఆరోగ్య, పింఛను పరిష్కారాలను ఆర్థిక ప్రణాళికలో భాగంగా చేసుకుంటున్నారు. ఇందుకు అనుగుణంగా బీమా పరిశ్రమలోనూ మార్పులొచ్చాయి. వినియోగదారుల అవసరాలకు ప్రాధాన్యం ఇస్తూ.. అందరికీ ఒకే బీమా అనే ధోరణిని కాకుండా.. వారికి సరిపోయే పాలసీలను ఇవ్వడానికి ప్రాధాన్యం ఇస్తున్నాయి.
అందరికీ బీమా పాలసీ ఉండాలన్న ఐఆర్‌డీఏఐ లక్ష్యంగా విధించుకుంది. దీన్ని ఎలా సాధించవచ్చని అనుకుంటున్నారు?
దేశంలో బీమాకు ఆదరణ ఉన్నా.. ఇతర దేశాలతో పోల్చి చూస్తే.. ఇక్కడ కేవలం 4.2% మంది మాత్రమే బీమా పరిధిలో ఉన్నారు. అందుకే, భారతీయ బీమా నియంత్రణ, అభివృద్ధి ప్రాధికార సంస్థ (ఐఆర్‌డీఏఐ) అందరినీ బీమా పరిధిలోకి తీసుకురావాలనే లక్ష్యాన్ని విధించుకుంది. ఇందుకోసం బీమా పాలసీలకు దూరంగా ఉన్నవారిని సార్వత్రిక బీమా కవరేజీ కిందకు తీసుకొచ్చేలా బీమా కంపెనీలు చర్యలు తీసుకోవాలి. బీమా అక్షరాస్యతను పెంచడం, గ్రామీణ మార్కెట్లోకి విస్తరించడం, డిజిటలైజేషన్‌, అందుబాటు ప్రీమియంలో పాలసీలను అందించడం.. ఇవి కీలకమైన అంశాలు. ప్రజలు జీవిత బీమా తమకు తప్పనిసరిగా అవసరం అని భావించి, తగిన పాలసీని కొనుగోలు చేయడమూ కీలకమే.
సాధారణంగా పాలసీదారులు పొదుపు, రాబడి హామీ పాలసీలపై ఆసక్తి చూపిస్తుంటారు. పూర్తి రక్షణ పాలసీలకు గిరాకీ ఎలా ఉంది?
నిజమే. గతంలో చాలామంది పొదుపు, హామీ పాలసీలపైనే మక్కువ చూపేవారు. కొవిడ్‌-19 తర్వాత పాలసీదారుల ఆలోచనలు మారాయి. బీమాను దీర్ఘకాలిక ఆర్థిక భద్రతను అందించే రక్షణ సాధనంగా చూస్తున్నారు. దీంతో రక్షణ ప్రధాన బీమా పాలసీలు అధికంగా వెలుగులోకి వచ్చాయి. వీటితోపాటు పింఛను అందించే యాన్యుటీ, సంపదను సృష్టించే బీమా పరిష్కారాల కోసం గిరాకీ పెరిగింది.
బీమా పరిశ్రమకు కొత్త సవాళ్లు ఎదురవుతున్నాయి. వీటిని ఎస్బీఐ లైఫ్ ఎలా ఎదుర్కొంటోంది?
వ్యూహాత్మక రిస్క్‌ అసెస్‌మెంట్‌, మూలధన ప్రణాళిక, గవర్నెన్స్‌ ఇలా అనేక అంశాల్లో మేము దృష్టి సారించాం. డిజిటల్‌, డిస్ట్రిబ్యూషన్‌ నెట్‌వర్క్‌ బలంగా ఉండటంతో పోటీలో ముందు ఉంటున్నాం. క్లెయింల పరిష్కారంలోనూ ఎలాంటి ఇబ్బందులు లేకుండా చూస్తున్నాం. వినియోగదారుల అవసరాల మేరకు రక్షణ, దీర్ఘకాలిక ఉత్పత్తులపైనా దృష్టి కేంద్రీకరిస్తున్నాం.
ఆర్థికంగా సురక్షితంగా ఉండేందుకు మీ సలహాలేమిటి?
జీవితం వివిధ దశల్లో ఆర్థిక అవసరాలూ మారిపోతాయి. వివాహం, పిల్లలు, వారి చదువులు, పదవీ విరమణ ఇలా ఏ దశలోనైనా హాయిగా గడిపేందుకు మీకు డబ్బు అవసరం. అందరికీ ఒకే ఆర్థిక సూత్రం వర్తించకపోయినా.. కొన్ని కీలకాంశాలను మర్చిపోకూడదు. మీ ఆదాయ-వ్యయాల కోసం బడ్జెట్‌ వేసుకోవాలి. దీనికి లోబడి ఉండాలి. దీర్ఘకాలిక పెట్టుబడులకు ప్రాధాన్యం ఇవ్వాలి. ప్రతి ఒక్కరూ తగినంత మొత్తానికి జీవిత బీమా కలిగి ఉండాలి.
