వీడియోకాన్ వ్యవస్థాపకుడు వేణుగోపాల్ ధూత్కు బొంబాయి హైకోర్టు శుక్రవారం మధ్యంతర బెయిల్ మంజూరైంది. ఐసీఐసీఐ బ్యాంక్ నుంచి మోసపూరితంగా రూ.3,250 కోట్ల రుణం తీసుకున్నారనే ఆరోపణతో.. వేణగోపాల్ ధూత్ను 2022 డిసెంబర్ 26న సీబీఐ అరెస్ట్ చేసింది. ఐసీఐసీఐ బ్యాంక్ మాజీ సీఈఓ, ఎండీ చందా కొచ్చర్, ఆమె భర్త దీపక్ కొచ్చర్ను కూడా డిసెంబర్ నెలలోనే సీబీఐ అరెస్ట్ చేసింది. అయితే కొన్ని రోజుల క్రితం కొచ్చర్ దంపతులకు హైకోర్ట్ బెయిల్ మంజూరు చేసింది. దీంతో ధూత్ కూడా బెయిల్ కోసం కోర్టును ఆశ్రయించారు. బొంబాయి హైకోర్టులోని డివిజన్ బెంచ్ ఆయనకు లక్షరూపాయల పూచీకత్తుతో బెయిల్ ఇచ్చింది.
ధూత్ అప్పీల్ కోసం సుప్రీంకోర్టును ఆశ్రయించడానికి వీలులేకుండా స్టే విధించాలన్న సీబీఐ అభ్యర్థనను కూడా ధర్మాసనం తిరస్కరించింది. ఇదే కేసులో అరెస్ట్ అయి.. బెయిల్పై బయటకు వచ్చిన కొచ్చర్ దంపతుల బెయిల్ ఉత్తర్వులను రీకాల్ చేయాలను కోరుతూ.. ఓ న్యాయవాది చేసిన ధరఖాస్తును కూడా కోర్టు కొట్టిపడేసింది. ఆ న్యాయవాదికి రూ.25,000 జరిమానా విధించింది.
ఈ కేసులో ధూత్ విచారణకు సహరించినందున ఆయన అరెస్ట్ అనవసరమని న్యాయవాది సందీప్ లడ్డా కోర్టులో వాదించారు. "క్రిమినల్ ప్రొసీజర్ కోడ్ ప్రకారం ముందుగా విచారణకు హాజరుకావాలని సీబీఐ నోటీసులు పంపాలి. అత్యవసరమైతే తప్ప అరెస్ట్ చేయకూడదు. కానీ, సీబీఐ ఏకపక్షంగా వ్యవహరించి చట్టవిరుద్ధంగా ప్రవర్తించింది" అని ధూత్ తరఫు న్యాయవాది కోర్టుకు తెలిపారు. అయితే.. ధూత్ ఈ విచారణ నుంచి తప్పించుకోవడానికి ప్రయత్నించారని.. అందుకే ఆయన్ను అరెస్ట్ చేసినట్లు సీబీఐ వాదించింది. జనవరి 13న ఇరువురి వాదనలు విన్న కోర్ట్ శుక్రవారం తన వాదనలో.. ఏకపక్షంగా వ్యవహరించిన సీబీఐను మందలిస్తూ ధూత్కు మధ్యంతర బెయిల్ను మంజూరు చేసింది.
అసలేంటా కేసు..?
వీడియోకాన్ గ్రూపునకు రుణాలు మంజూరు చేయడంలో అవకతవకలు, అవినీతికి పాల్పడినట్లు నమోదైన కేసులో విచారణ జరిపిన సీబీఐ.. 71 ఏళ్ల దూత్తో పాటు కొచ్చర్ దంపతులను అరెస్ట్ చేసింది. వీడియోకాన్ గ్రూపునకు అనుకూలంగా వ్యవహరించారనే ఆరోపణలతో ఐసీఐసీఐ బ్యాంక్ సీఈఓగా 2018లో చందా కొచ్చర్ వైదొలిగిన విషయం తెలిసిందే. ఈ నేపథ్యంలో 2012లో బ్యాంకు సీఈవో హోదాలో రూ. 3,250 కోట్ల రుణం మంజూరు చేయగా.. అది ఎన్‌పీఏగా మారింది. తద్వారా కొచ్చర్ కుటుంబం లబ్ధి పొందినట్లు సీబీఐ ఆరోపించింది. వేణుగోపాల్ దూత్ స్థాపించిన నూపవర్ రెన్యూవబుల్స్ కంపెనీలో దీపక్ కొచ్చర్ పెట్టుబుడులు పెట్టారని సీబీఐ ఆరోపించింది.
