టెలికాం సేవలు మరింత ప్రియం కానున్నాయి. ఈ ఏడాది మధ్యలో టారిఫ్ ఛార్జీలు స్వల్పంగా పెరిగే అవకాశం ఉన్నట్లు భారతీ ఎయిర్టెల్ సీఈఓ సునీల్‌ భారతీ మిత్తల్‌ తెలిపారు. టెలికాం పరిశ్రమ వ్యాపారంలో మూలధన రాబడి తక్కువగా ఉన్నందున టారిఫ్ ఛార్జీలను స్వల్పంగా పెంచే అవకాశం ఉందని ఆయన చెప్పారు. వివిధ వస్తువులపై ప్రజలు చేస్తున్న ఖర్చుతో పోలిస్తే ఇది తక్కువే ఉంటుందన్నారు. దేశానికి బలమైన టెలికాం సంస్థ అవసరమన్న మిత్తల్‌.. భారత్‌ డిజిటల్‌-ఆర్థికవృద్ధి కల సాకారమైనట్లు వివరించారు. భారతీ ఎయిర్టెల్ గత నెలలో కనీస రీఛార్జ్ ధరను 57శాతం పెంచగా.. త్వరలోనే టారిఫ్ ధరలు పెంచేందుకు సిద్ధమవుతోంది.
10 మిలియన్లు దాటిన యూజర్లు..
భారతీయ ఎయిర్టెల్ 5జీ యూజర్లు 10 మిలియన్లు దాటినట్లు కంపెనీ వర్గాలు వెల్లడించాయి. మార్చి 2024 చివరినాటికి 5జీ సేవలు దేశంలోని ప్రతీ గ్రామీణ, పట్టణ ప్రాంతాలకు చేరువయ్యేటట్లు ప్లాన్ చేస్తున్నామని భారతీ ఎయిర్టెల్ పేర్కొంది. ఎయిర్టెల్ దేశంలో 5జీ సేవలను 2022 అక్టోబరు 1న ప్రారంభించింది.
ఎయిర్టెల్ టారీఫ్ పెంపు..
2023 జనవరిలో ప్రముఖ టెలికాం కంపెనీ భారతీ ఎయిర్టెల్ టారిఫ్లు పెంచింది. 28 రోజుల కాలపరిమితి కలిగిన బేస్‌ ప్లాన్ ధరను 57 శాతం పెంచి రూ.155కు చేర్చింది. అప్పటికి ఎయిర్టెల్ నెలవారీ రీచార్జ్ ప్లాన్ రూ.99 రూపాయలుగా ఉండేది. ఇందులో 200 మెగాబైట్ల డేటా, రూ.99 టాక్టైక్ (రూ.2.5/సెకను) 28 రోజుల వ్యాలిడిటీతో అందిస్తున్నారు. ప్రయోగాత్మకంగా దీన్ని తొలుత హరియాణా, ఒడిశా సర్కిళ్లలో గతేడాది నవంబరులోనే ప్రవేశపెట్టినట్లు కంపెనీ వర్గాలు తెలిపాయి. ఈ ఏడాది జనవరిలో దేశవ్యాప్తంగా అమలు చేసింది ఎయిర్టెల్.
ఎయిర్టెల్ 2021లోనూ ఇలాగే రూ.79తో ఉన్న కనీస ప్లాన్‌ను ఉపసంహరించుకొని దాని స్థానంలో రూ.99 ప్లాన్‌ను తీసుకొచ్చింది. అప్పుడు కూడా తొలుత కొన్ని సర్కిళ్లలో ప్రారంభించి తర్వాత దేశవ్యాప్తంగా అమలు చేసింది.
