వాహన తుక్కు విధానం అమలును ప్రభుత్వ వాహనాలతోనే ప్రారంభించాలని కేంద్ర ప్రభుత్వం యోచిస్తోంది. కాలం చెల్లిన ప్రభుత్వ వాహనాల వినియోగాన్ని నిలిపివేసే దిశగా ప్రతిపాదనలు సిద్ధం చేసింది. ఈ మేరకు నిబంధనలు సవరించడంపై ప్రభుత్వ యంత్రాంగాలు తమ అభిప్రాయాలను తెలియజేయాలని కోరుతూ కేంద్ర రోడ్డు రవాణా, రహదారుల శాఖ నోటిఫికేషన్‌ జారీ చేసింది. ఒకవేళ ఈ ప్రతిపాదనలు ఖరారైతే.. ఇటు కేంద్రంతో పాటు రాష్ట్ర, కేంద్రపాలిత ప్రాంత ప్రభుత్వ శాఖలు, స్వంతంత్ర సంస్థలు, ప్రభుత్వ రంగ సంస్థలు, స్థానిక పాలనా యంత్రాంగంలో 15 సంవత్సరాలు పైబడిన వాహనాల రిజిస్ట్రేషన్‌ను పునరుద్ధరించుకునే అవకాశం ఉండదు. ఈ నిబంధనలు ఏప్రిల్‌ 1, 2022 నుంచి అమల్లోకి తీసుకురావాలని భావిస్తున్నట్లు ప్రతిపాదనల్లో పేర్కొన్నారు.
స్వచ్ఛంద వాహన తుక్కు విధానాన్ని ఈసారి బడ్జెట్‌లో ఆర్థిక మంత్రి నిర్మలా సీతారామన్‌ ప్రకటించిన విషయం తెలిసిందే. దీని కింద.. 20 ఏళ్ల తర్వాత వ్యక్తిగత వాహనాలు; 15 ఏళ్ల తర్వాత వాణిజ్య వాహనాలకు సామర్థ్య పరీక్షలు నిర్వహిస్తారు. ఈ విధానం వల్ల ఇంధన సామర్థ్యం మెరుగు పడటం సహా పర్యావరణహిత వాహనాలకు ప్రోత్సాహం లభిస్తుందని సీతారామన్‌ అన్నారు.
ఇదీ చదవండి : త్వరలో బ్యాంకులకు రూ.14,500 కోట్ల నిధులు
