చంద్రబాబు హామీలకు మళ్లీ మోసపోవద్దు: జగన్

నెరవేరని హామీలతో ప్రజలను ప్రలోభపెట్టడానికి చంద్రబాబు మళ్లీ ప్రయత్నిస్తున్నారని వైకాపా అధ్యక్షుడు జగన్ ఆరోపించారు. తెదేపా మోసపూరిత హామీలు నమ్మవద్దన్న జగన్... వైకాపా అవినీతిలేని పాలన అందిస్తుందన్నారు.

ఐదేళ్ల చంద్రబాబు పాలన రాష్ట్రాన్ని అవినీతికూపంగా మార్చేసిందని వైకాపా అధినేత జగన్​మోహన్ రెడ్డి ఆరోపించారు. కృష్ణా, పశ్చిమగోదావరి జిల్లాల్లో పర్యటించిన ఆయన తెదేపా పాలనపై విమర్శలు చేశారు. ప్రజాసంకల్ప పాదయాత్ర ఏలూరు మీదుగా సాగిందని గుర్తు చేసిన జగన్​.. ఆ రోజున ప్రజలు తనకు చెప్పుకున్న సమస్యలను తొందరలోనే పరిష్కరిస్తానని హామీ ఇచ్చారు.

ఏలూరు రోడ్ షో లో జగన్

పేదవారి కోసం కట్టించే ఇళ్ల నిర్మాణాలలో భారీగా అవినీతి జరిగిందని వైకాపా అధినేత ఆరోపించారు. మూడు లక్షల రూపాయల విలువ చేయని ఇళ్లను పేదవారికి 6 లక్షలకు అమ్ముతున్నారన్నారు. కేంద్ర, రాష్ట్ర ప్రభుత్వాలు కేవలం లక్షన్నర మాత్రమే ఇస్తున్నాయన్నారు. మిగిలిన అప్పును తీర్చడానికి సుదీర్ఘకాలం పడుతుందన్నారు.

అధికారంలోకి రాగానే ఏలూరులో భూగర్భ డ్రైనేజీ వ్యవస్థను మెరుగుపర్చే ప్రణాళికలను రూపొందిస్తామన్నారు. డ్రైనేజీ వ్యవస్థను బాగు చేసేందుకు వైయస్ రాజశేఖర్ రెడ్డి హయంలో నిధులు మంజూరైనా తెదేపా నేతలు ఆ నిధులను దుర్వినియోగం చేశారన్నారు.

"2014లో చంద్రబాబు ఇచ్చిన హామీలలో ఏ ఒక్క హామీ అయినా నెరవేరిందా అని ప్రశ్నిస్తున్నా? రుణమాఫీ, ఇళ్ల నిర్మాణం, పోలీసు వ్యవస్థ పటిష్ఠ, ఇంటికో ఉద్యోగం..ఇలాంటి హామీలతో 2014లో చంద్రబాబు అధికారంలోకి వచ్చారు. మళ్లీ తిరిగి అవే హామీలతో చంద్రబాబును ప్రచారానికి వస్తున్నారు" ---వైకాపా అధ్యక్షుడు వైఎస్ జగన్

మద్యం, డబ్బులతో ఓట్లను కొనాలని ప్రయత్నిస్తున్న తెదేపా నేతలను తరిమికొట్టాలని జగన్ అన్నారు. అధికారంలోకి రాగానే అమ్మఒడి కార్యక్రమంతో సంవత్సరానికి రూ.15 వేలు వేస్తామన్నారు. అధికారంలోకి రాగానే డ్వాక్రా రుణాలను నాలుగు దశల్లో మాఫీ చేస్తామని హామీ ఇచ్చారు.

మచిలీపట్నం రోడ్ షో

వైకాపా అధికారంలోకి వస్తే మచిలీపట్నం ఓడరేవును కేవలం 4 వేల 800 ఎకరాల్లోనే నిర్మిస్తామని వైకాపా అధ్యక్షుడు వైఎస్ జగన్ అన్నారు. తెదేపా ప్రభుత్వం 33 వేల ఎకరాల్లో పోర్టు నిర్మాణానికి రాత్రికి రాత్రి నోటిఫికేషన్ ఇవ్వడం దారుణమైన చర్యగా జగన్ అభివర్ణించారు. ఈ నిర్ణయంతో రైతులు, పేదలు తమ పొలాలను అమ్ముకోలేక అవస్థలు పడుతున్నారని జగన్ ఆరోపించారు.

"రైతుల భూములు ప్రభుత్వం తీసుకోవడం అన్యాయం. అభివృద్ధి ఆటంకం లేకుండా, రైతులకు నష్టం కాకుండా మచిలీపట్నం పోర్టు నిర్మిస్తాం. కృష్టా జిల్లాను చంద్రబాబు నిర్లక్ష్యం చేశారు. మేము అధికారంలోకి రాగానే కృష్ణా జిల్లా రైతులను ఆదుకునే ప్రణాళిక రూపొందిస్తాం "----వైకాపా అధినేత వైఎస్ జగన్.

ఇవీ చూడండి : వీవీ ప్యాట్లు లెక్కించకపోతే.. ప్రజాస్వామ్యానికే ప్రమాదం: సీఎం