విశాఖ ఫిషింగ్ హార్బర్లో ఉన్న 1500 బోట్లతో..ప్రత్యక్షంగా 15 వేల మంది పైగా జీవనోపాధి సాగిస్తున్నారు. చేపల వృద్ధి దృష్ట్యా ఏప్రిల్15 నుంచి జూన్ 15 వరకు చేపల వేటపై నిషేధిస్తారు. ఈ సమయంలో చేపల పిండోత్పత్తి జరుగుతుంది. ఇప్పుడు రెండు నెలల వేట విరామం తర్వాత బోట్లు సిద్ధం చేసుకున్న మత్స్యకారులు శుక్రవారం రాత్రి గంగమ్మ తల్లికి పూజలు చేసి చేపల వేటకు బయలుదేరారు. అయితే ఈసారి కేవలం 360 బోట్లు మాత్రమే చేపల వేటకు వెళ్లాయి. గత ప్రభుత్వం ఇస్తామన్న డీజిల్ సబ్సిడీ అందక కొందరు మత్స్యకారులు వేటకు వెళ్లలేదు. కొత్త ప్రభుత్వం సబ్సిడీ సొమ్ములు అందిస్తే..బోట్లు బాగు చేసుకుని రెండో విడతలో వేటకు వెళ్తామంటున్నారు.
ఒక బోటు వేటకు వెళ్లాలంటే 4 నుంచి ఐదు లక్షలు ఖర్చు అవుతుంది. బోటు వేటకు వెళ్లే ముందు డీజిల్, ఐస్, పది రోజులకు సరిపడ్డా ఆహారం తీసుకెళ్తారు. ప్రతి బోటుకు 5 నుంచి 10 మంది కలాసీలు ఉంటారు. చేపల వేటకు వెళ్లే ప్రతి బోటు అన్ని అనుమతులు కల్గి ఉండాలి. అనుమతులు లేని పక్షంలో కోస్టుగార్డ్, పోర్టు సెక్యూరిటీ విభాగాల నుంచి ఇబ్బందులు ఎదురవుతాయి.
చేపల వేట నిషేధ సమయంలో మత్స్యకారులు...బోట్లు మరముత్తు చేసుకోవడం, వలలు అల్లుకోవడం చేస్తారు. వేటలో రొయ్యలు ఎక్కువగా లభిస్తేనే వేటకు వెళ్లిన ఫలితం దక్కుతుంది. ఒక ఏడాదిలో విశాఖ ఫిషింగ్ హార్బర్ నుంచి రూ. 1200 కోట్ల మత్స్య లావాదేవీలు జరుగుతాయి. గత రెండేళ్లుగా సరైన రాబడి లేదని మత్స్యకారులు ఆవేదన చెందుతున్నారు. కనీసం ఈ ఏడాదైనా అన్ని అనుకూలిస్తాయన్న ఆశతో వేటకు బయలుదేరారు.
ఇదీ చదవండి : పిల్లలూ.. మామయ్యను వచ్చా: జగన్
