Dilkhush Kumar Rodbez : దిల్లీ గల్లీల్లో రిక్షా నడిపాడు.. వీధుల్లో తిరుగుతూ కూరగాయలు అమ్మాడు... కట్ చేస్తే ఇప్పుడు రూ.10 కోట్లు విలువైన సంస్థకు అధిపతి. ఆడీ, హోండా లాంటి లగ్జరీ కార్లలో తిరుగుతున్నాడు. ఇంటర్ మాత్రమే చదవిన ఆ యువకుడు.. ఐఐటీ, ఐఐఎమ్ లాంటి దిగ్గజ సంస్థల విద్యార్థులు సహా ఎంతో మందికి జీవనోపాధిని కల్పిస్తున్నాడు. అతడే.. బిహార్ సహర్సా జిల్లాలోని బంగావ్ గ్రామానికి చెందిన దిల్ఖుశ్కుమార్. మొబైల్ యాప్ ద్వారా క్యాబ్ సేవలు అందించే 'రోడ్బెజ్' అనే అంకుర సంస్థ వ్యవస్థాపకుడు.
"ఇంటర్ తర్వాత దిల్లీకి వెళ్లాను. అక్కడికి వెళ్లిన కొత్తలో నాకు ఎవరూ పని ఇవ్వలేదు. డ్రైవర్గా ప్రయత్నించగా.. నీకు ఇక్కడ రూట్, ట్రాఫిక్ నిబంధనలు తెలియవని చెప్పి ఎవరూ ఉద్యోగం ఇవ్వలేదు. దీంతో 15 రోజుల పాటు రిక్షా నడిపాను. ఆ తర్వాత నా ఆరోగ్యం సహకరించకపోవడం వల్ల తిరిగి ఇంటికి వచ్చేశాను. అప్పుడే సొంతంగా కంపెనీ పెట్టాలని నిర్ణయం తీసుకున్నాను. చిన్నచిన్న సంస్థలను మొదలుపెట్టి విఫలమయ్యాను. ఆ తర్వాత ఆర్యగో కంపెనీ స్థాపించి విజయవంతం అయ్యాను."
--దిల్ఖుశ్ కుమార్, రోడ్బెజ్ సంస్థ యజమాని
2016లో 'ఆర్యగో' అనే సంస్థను ప్రారంభించాడు దిల్ఖుష్. అది విజయవంతమైన తర్వాత 2022 జులైలో 'రోడ్బెజ్' అనే మరో స్టార్టప్ను మొదలుపెట్టాడు. పట్నా, సహర్సాతో పాటు పొరుగు జిల్లాలకూ వీటి సేవలను విస్తరించాడు. సుమారు రూ. 70 లక్షలతో 'రోడ్బెజ్'ను ప్రారంభించగా.. కేవలం 2 నెలల్లోనే రూ.4 కోట్లకు ఎదిగింది. ప్రస్తుతం ఈ కంపెనీ మార్కెట్ విలువ రూ.10 కోట్లకు చేరింది. రుకాన్పుర కేంద్రంగా పనిచేస్తున్న ఈ సంస్థ ద్వారా 19 మంది సిబ్బందితో పాటు అనేక మంది డ్రైవర్లు ఉపాధి పొందుతున్నారు. ఇప్పటివరకు 'రోడ్బెజ్' యాప్ను లక్ష మందికి పైగా యూజర్లు డౌన్లోడ్ చేసుకున్నారు. ఇందులో 50 వేల డౌన్లోడ్లు గత 4 నెలల్లో జరిగినవే కావడం విశేషం.
"మిగతా సంస్థలు రాకపోకల ఇంధన ఛార్జీలు లెక్కించి ధరను నిర్ణయిస్తాయి. కానీ మేము తిరిగి వచ్చే ఛార్జీని లెక్కించము. అందువల్ల సుమారు 40 శాతం ధర తగ్గుతుంది. ఇది వన్ వే ట్యాక్సీ. అదే ట్యాక్సీ పూల్లో అయితే సుమారు 60 శాతం వరకు ధర తగ్గుతుంది. ఏదైనా ట్యాక్సీ ఒక ప్రాంతానికి వెళ్లి.. తిరిగి ఖాళీగా వస్తుంటే దానికి సంబంధించిన వారి వివరాలు మా దగ్గర ఉంటాయి. అదే సమయంలో ఎవరైతే ఆ ప్రాంతం నుంచి వస్తుంటారో వారిని కనెక్ట్ చేస్తాం. దీంతో పాటు మా వాహనాన్ని బుక్ చేసుకున్న ప్రయాణికుడు.. ఏదైనా కారణం వల్ల రైలు, బస్సు ఎక్కలేకపోతే.. ఆ ప్రయాణానికి అయ్యే ఖర్చులను మొత్తం సంస్థ భరిస్తుంది. ఇది మా బాధ్యత."
--దిల్ఖుశ్ కుమార్, రోడ్బెజ్ సంస్థ యజమాని
కొన్ని సంస్థలు పండగలతో పాటు రద్దీ సమయాల్లో రేట్లు పెంచుతాయని.. కానీ తమ కంపెనీ ఛార్జీల్లో మాత్రం ఎలాంటి మార్పులు ఉండవని దిల్ఖుశ్ తెలిపాడు. ప్రస్తుతం తమ అధీనంలో 60 వాహనాలు నడుస్తుండగా.. ఈ ఏడాది చివరి వరకు ఈ సంఖ్యను 100 పెంచడమే లక్ష్యంగా పెట్టుకున్నామని చెప్పాడు. వీటితో పాటు అనేక ట్యాక్సీలు సైతం తమ యాప్ ద్వారా సేవలు అందిస్తున్నాయని దిల్ఖుశ్ చెబుతున్నాడు.
ఇంటిపైన ల్యాండ్ అయ్యే 'ఈ-ప్లేన్' ట్యాక్సీ.. ఒకసారి ఛార్జ్ చేస్తే 100 కి.మీ జర్నీ
చెత్తతో కారు తయారు చేసిన రైతు- ఒకసారి ఛార్జ్ చేస్తే 100 కిలోమీటర్లు జర్నీ
