Fraud Telephone exchange Bengaluru: చట్టవిరుద్ధంగా టెలిఫోన్ ఎక్స్ఛేంజీలు ఏర్పాటు చేసి భారత టెలికమ్యూనికేషన్స్ శాఖను మోసం చేసిన నిందితులను బెంగళూరు క్రైమ్ బ్రాంచ్ పోలీసులు అరెస్టు చేశారు. నిందితులను రవిచంద్ర, సుబేర్, మను, ఇస్మాయిల్ అబ్దుల్లా, సాహిర్, జోహార్ షరీఫ్గా గుర్తించారు. ఏడు ల్యాప్టాప్లు, 204 సిమ్కార్డులు, 14 సిమ్ బాక్సులు, ఇంటర్నెట్ వైఫై రూటర్లు, 9 మొబైల్ ఫోన్లు సీజ్ చేసినట్లు తెలిపారు. కేరళకు చెందిన వీరంతా అంతర్జాతీయ కాల్స్ను స్థానిక కాల్స్గా మార్చుతూ డబ్బులు సంపాదిస్తున్నట్లు తెలిపారు. ఐకాన్ టూర్స్ అండ్ ట్రావెల్స్ పేరుతో నిందితులు ఈ తతంగం నడిపిస్తున్నట్లు గుర్తించారు.
పోలీసుల కథనం ప్రకారం..
నిందితులు కర్ణాటకలోని మహదేవపుర్కు చెందిన ఓ వ్యక్తిని సంప్రదించి ఎయిర్టెల్ ట్రంక్ కాల్ డివైజ్ను సంపాదించారు. ఇలాంటి పరికరాలను కాల్సెంటర్లకు ఇస్తుంటారు. ఐకాన్ టూర్స్ అండ్ ట్రావెల్స్ పేరు మీద కంపెనీ రికార్డులను ఏర్పాటు చేశారు. అనంతరం, ఇంటర్నెట్ ప్రోటోకాల్ ద్వారా చేసే వాయిస్(వీఓఐపీ) కాల్స్ను జీఎస్ఎం కాల్స్గా మార్చడం ప్రారంభించారు. సిమ్బాక్స్ అనే పరికరాల సాయంతో అంతర్జాతీయ కాల్స్ను స్థానిక కాల్స్గా మార్చారు. సిమ్బాక్స్ పరికరాల ద్వారా ఉత్తర్ప్రదేశ్, మధ్యప్రదేశ్, బంగాల్ వంటి పలు రాష్ట్రాల్లో బీఎస్ఎన్ఎల్ సిమ్లను సంపాదించారు. ఇదంతా నిర్వహించేందుకు చిక్కసంద్ర మెయిన్ రోడ్ ప్రాంతంలో ఓ ఇంటిని అద్దెకు తీసుకున్నారు. మొత్తం టెలిఫోన్ లైన్నే అక్రమంగా నిర్మించారని నగర పోలీస్ కమిషనర్ ప్రతాప్ రెడ్డి తెలిపారు.
ఎంత సంపాదించారంటే..
అంతర్జాతీయ కాల్ చేయాలంటే నిమిషానికి రూ.10 ఖర్చవుతుంది. అదే వీరి అక్రమ పద్ధతుల్లో అయితే రూ.1తో పని పూర్తవుతుంది. ఈ చట్టవిరుద్ధమైన పనితో నిందితులు నెలకు రూ.17లక్షలు సంపాదించారు. దీన్నిబట్టి చూస్తే ప్రభుత్వానికి ఇంతకన్నా పది రెట్లు ఎక్కువ నష్టం జరిగినట్లే. అంతర్జాతీయ కాల్స్ ద్వారా నిందితులు బెదిరింపులకు సైతం పాల్పడుతున్నట్లు పోలీసులు తేల్చారు. దుబాయిలో ఉండే పుత్తూరు వాసి గతంలో ఈ విషయంపై కేసు నమోదు చేసినట్లు గుర్తించారు.
ప్రక్రియ ఎలా?
fraud telephone calls scam: డార్క్ వెబ్ ద్వారా కాల్స్ వెళ్తాయి. కాల్ చేసిన వ్యక్తి ఫోన్ నెంబర్ ఇతరులకు తెలియదు. కాల్ స్వీకరించిన వ్యక్తికి వేరే నెంబర్ నుంచి కాల్ వచ్చినట్లు కనిపిస్తుంది. అందువల్ల కేసు పెట్టినా దీనిపై పోలీసులకు ఎలాంటి సమాచారం లభించేది కాదు. ఇలా సాంకేతికతను ఉపయోగించి నేరాలకు పాల్పడుతున్నారని పోలీసులు తెలిపారు.
ఇదీ చదవండి:
