గుజరాత్ అహ్మదాబాద్లోని కంటోన్మెంట్లో సైనికుల కోసం తొలి 3డీ ప్రింటెడ్ గృహ సముదాయాన్ని ప్రారంభించినట్లు కేంద్ర రక్షణ మంత్రిత్వ శాఖ తెలిపింది. మికాబ్ ప్రైవేట్ లిమిటెడ్ అనే సంస్థతో కలిసి మిలిటరీ ఇంజినీరింగ్ సర్వీసెస్.. ఈ త్రీడీ నిర్మాణాలను చేపట్టినట్లు పేర్కొంది.
71 చదరపు మీటర్ల విస్తీర్ణంలో ఉన్న ఈ ఇళ్ల నిర్మాణానికి కేవలం 12 వారాలు పట్టినట్లు అధికారులు తెలిపారు. స్లాబ్లు, గోడలతో పాటు పునాదులను సైతం త్రీడీ ప్రింటింగ్ టెక్నాలజీతోనే రూపొందించినట్లు చెప్పారు. భూకంపాలు, ఇతర ప్రకృతి విపత్తులను తట్టుకునే విధంగా ఈ నిర్మాణాలు చేపట్టినట్లు పేర్కొన్నారు. త్రీడీ నిర్మాణాల కోసమే ప్రత్యేకంగా రూపొందించిన కాంక్రీట్ను ఇందులో వినియోగించినట్లు వివరించారు.
ఆత్మనిర్భర్ భారత్ అభియాన్ను ప్రోత్సహించడంలో సైన్యం నిబద్ధతను ఈ నిర్మాణాలు చాటి చెబుతాయని అధికారులు పేర్కొన్నారు. 3డీ టెక్నాలజీ ద్వారా తక్కువ సమయంలో నిర్మాణాలు చేపట్టవచ్చని వెల్లడించారు. ఇప్పటికే.. అత్యాధునిక 3డీ ప్రింటింగ్ టెక్నాలజీని ఉపయోగించి తూర్పు లద్దాఖ్లో వాస్తవాధీన రేఖ వెంబడి పలు నిర్మాణాలు చేపట్టినట్లు సైనిక వర్గాలు తెలిపాయి. దీని వల్ల పెద్ద ఎత్తున సమయం ఆదా అయిందని పేర్కొన్నాయి.
