వైఎస్సార్​సీపీ శ్రేణులు రెచ్చగొట్టినా సంయమనం పాటించాలి: చంద్రబాబు

Chandrababu asked about YSRCP Provocative Actions and Attacks: రాష్ట్రంలో ఎన్నికల ఫలితాల అనంతరం అక్కడక్కడా జరుగుతున్న వైఎస్సార్​సీపీ నేతల కవ్వింపు చర్యలు, దాడులపై తెలుగుదేశం అధినేత చంద్రబాబు ఆరా తీశారు. కొన్ని చోట్ల వైఎస్సార్​సీపీ, టీడీపీ శ్రేణుల మధ్య నెలకొన్న ఉద్రిక్తతలు, ఘర్షణల విషయంపై ఆయన పార్టీ నేతల ద్వారా సమాచారం అడిగి తెలుసుకున్నారు. వైఎస్సార్​సీపీ కవ్వింపు చర్యల పట్ల అప్రమత్తంగా ఉండాలని తెలుగుదేశం పార్టీ క్యాడర్​కు చంద్రబాబు సూచించారు. నాయకులు సైతం అప్రమత్తంగా ఉండి, ఎటువంటి దాడులు, ప్రతి దాడులు జరగకుండా చూడాలని ఆదేశించారు. ఈ విషయంలో పార్టీ క్యాడర్ పూర్తి సంయమనంతో ఉండాలని ఆయన పిలుపునిచ్చారు. వైఎస్సార్​సీపీ కార్యకర్తలు రెచ్చగొట్టే చర్యలకు పాల్పడినా పూర్తి సంయమనం పాటించాలన్నారు. పోలీసు అధికారులు సైతం శాంతి భద్రతలు అదుపులో ఉండేలా చర్యలు తీసుకోవాలని చంద్రబాబు సూచించారు.