Zero Hour Discussion in Assembly: ఏపీ శాసనసభ జీరో అవర్లో కీలకమైన అంశంపై చర్చ చోటు చేసుకుంది. అసభ్యకరమైన పోస్టులు పెడుతున్న సామాజిక మాధ్యమాలపై చర్యలు తీసుకోవాలంటూ టీడీపీ శాసనసభ్యులు డిమాండ్ చేశారు. ఆర్గనైజ్డ్ క్రైమ్ సిండికేట్గా మారిపోయిందని రాజమహేంద్రవరం సిటీ శాసనసభ్యుడు ఆదిరెడ్డి శ్రీనివాసు అన్నారు. గతంలో తన సతీమణి, మాజీ ఎమ్మెల్యే ఆదిరెడ్డి భవానీతో పాటు తన కుటుంబ సభ్యులపై తీవ్రస్థాయిలో ట్రోలింగ్ చేశారని ఆక్షేపించారు. దీనిపై మాజీ శానసభా స్పీకర్ తమ్మినేని సీతారాంకు ఫిర్యాదు చేసినా పట్టించుకోలేదని అన్నారు.
చట్టబద్దత లేని చట్టాన్ని అమలు చేసేలా దిశ పోలీసు స్టేషన్ ఏర్పాటు చేసి అదే మహిళా పోలీసు స్టేషన్లో ఓ శాసన సభ్యురాలిపైనే తొలికేసు నమోదు చేయించారని ఆరోపించారు. మహిళ రక్షణ కోసం రూపొందించిన దిశ యాప్ను పురుషుల మొబైళ్లలోనూ డౌన్ లోడ్ చేయించారని అన్నారు. అమల్లో లేని దిశ చట్టానికి, పోలీసు స్టేషన్లకు నిధులు కేటాయించటంపై విచారణ చేయించాలని ఆదిరెడ్డి శ్రీనివాస్ అభ్యర్ధించారు.
మరోవైపు సామాజిక మాధ్యమాల్లో అసభ్య పోస్టులు పెట్టి అరెస్టైన వారు బెయిల్పై బయటకు వచ్చి మళ్లీ కొనసాగిస్తున్నారని మరో ఎమ్మెల్యే గౌతు శిరీష అన్నారు. జగన్ జిల్లాకు ఓ ఇన్ఛార్జిని పెట్టి సామాజిక మాధ్యమాల ద్వారా అసభ్యకరమైన పోస్టింగ్లు పెట్టించేలా ప్రోత్సహిస్తున్నారని ఆరోపించారు. సామాజిక మాధ్యమాల్లో అసభ్యకర పోస్టులపై మాటల్లో కాదని చేతల్లో చూపించాలన్నారు.
MLA Kuna Ravi Kumar on Zero Hour: శాసనసభ జీరో అవర్లో సభ్యుల మధ్య వాదోపవాదాలు జరిగాయి. జీరో అవర్ డ్రైవర్ లేని కారులా తయారైందని ఆమదాలవలస ఎమ్మెల్యే కూన రవికుమార్ ఆరోపించారు. సభ్యులు ప్రస్తావించిన సమస్యలను మంత్రులెవరు రాసుకుంటున్నారో తెలియడం లేదన్నారు. దీనిపై స్పందించిన వ్యవసాయశాఖ మంత్రి అచ్చెన్నాయిడు సమస్యలు రాసుకుంటున్నామని, పరిష్కరించిన తర్వాత సభ్యులకు సమాచారమిస్తామన్నారు. ఈ క్రమంలో కూన రవికుమార్ ఆఖరి వరుసలో కూర్చవడం వల్ల ముందు ఏం జరుగుతోందో తెలియడం లేదని స్పీకర్ అయ్యన్న పాత్రుడు చమత్కరించారు.
గత పాలకులు ప్రజల ఆదాయం పెంచలేదు - అప్పులు పెంచారు : సీఎం చంద్రబాబు
త్వరలో రైతుల ఖాతాల్లో డబ్బులు జమ - 159.20 కోట్ల నిధులు మంజూరు
