రోడ్లపై వాహనాలు పార్కింగ్​ -​ భారీగా ట్రాఫిక్ జామ్​ - సీఎం పర్యటనతో ప్రజలకు తిప్పలు

Traffic Jam due to CM Jagan Meeting: గుంటూరు జిల్లాలో ముఖ్యమంత్రి జగన్​ పర్యటన సాధారణ ప్రజలకు తీవ్ర ఇక్కట్లు తెచ్చిపెట్టింది. వాలంటీర్లకు వందనం (Volunteerlaku Vandanam Program) సభ కోసం ముఖ్యమంత్రి ఈ రోజు ఫిరంగిపురం వచ్చారు. ఆ సభ కోసం తెనాలి, వేమూరు నియోజకవర్గాల నుంచి జనాలను తరలించారు. ఆర్టీసీ బస్సులతో పాటు స్కూల్ బస్సులు, ప్రైవేటు వాహనాల్లో భారీగా తరలింపు చేపట్టారు. ఆ వాహనాలను తెనాలి మండలం అంగలకుదురు - సంగం జాగర్లమూడి మధ్య ఆపివేశారు. అక్కడ వారందరికీ భోజనాలు ఏర్పాటు చేయటంతో వాహనాలన్నింటినీ రోడ్డుపైనే ఆపివేశారు. 

People Face Problems with Jagan Tour: దీంతో ఆ మార్గంలో ఇతర వాహనాలన్నీ ఆగిపోయి 2 కిలో మీటర్ల మేర ట్రాఫిక్ జాం ఏర్పడింది. ట్రాఫిక్ జాంలో ఓ అంబులెన్స్ (Ambulance) కూడా ఇరుక్కుపోయింది. వాహనాలు ఆ ప్రాంతంలో గంటకు పైగా ఆగిపోయినా పోలీసులు పట్టించుకోలేదు. దీంతో వాహనదారులే వీలు చూసుకుని ముందుకు కదిలారు. భోజనాలు ఏర్పాటు చేసిన ప్రాంతంలో పార్కింగ్​కు కూడా ఏర్పాట్లు చేసుకుంటే సమస్య వచ్చేది కాదని ప్రయాణికులు మండిపడుతున్నారు. అధికారులు జనాల్ని తరలించటంతో చూపిన శ్రద్ధ సాధారణ పౌరులకు కలిగే ఇబ్బందులపై దృష్టి పెట్టకపోవటంతో సమస్య తలెత్తిందని ఆగ్రహం వ్యక్తం చేస్తున్నారు.