పామాయిల్ పరిశ్రమలో అగ్నిప్రమాదం - బయటపడ్డ నిర్వహణ లోపాలు - Palm Oil Factory Fire Accident

Nellore Palm Oil Factory Fire Accident: అనకాపల్లి జిల్లాలోని అచ్యుతాపురం సెజ్‌లో జరిగిన ప్రమాదం నుంచి కోలుకోక ముందే బుధవారం రాత్రి నెల్లూరు జిల్లా ముత్తుకూరు మండలం పంటపాలెంలో పామాయిల్ పరిశ్రమలో పేలుడు జరగడం తీవ్ర ఆందోళన రేపింది. ప్రాణ నష్టం లేనప్పటికీ, పరిశ్రమల నిర్వహణ లోపాలు బయటపడ్డాయి. నెల్లూరు జిల్లా ముత్తుకూరు మండలం పంటపాలెం సమీపంలోని 3F పామాయిల్ పరిశ్రమలో రాత్రి భారీ అగ్నిప్రమాదం జరిగింది. పామాయిల్ ఫ్యాక్టరీలో బాయిలర్లలో నైట్రోజన్ ట్రాన్స్ పేలడంతో భారీగా మంటలు చెలరేగాయి. పరిశ్రమ చుట్టూ మంటలు వ్యాపించాయి. 

పరిశ్రమలో పని చేస్తున్న కార్మికులు భయాందోళనకు గురై బయటకు పరుగులు తీయడంతో ప్రాణనష్టం జరగలేదు. మూడు ఫైర్ ఇంజన్ల సహాయంతో మంటలు అదుపులోకి తెచ్చారు. ఘటన స్థలాన్ని నెల్లూరు రూరల్ డీఎస్పీ శ్రీనివాసరావు పరిశీలించారు. ప్రమాదానికి గల కారణాలు తెలియాల్సి ఉందని డీఎస్సీ తెలిపారు. అయితే ఇదే ఘటన పగటిపూట జరిగి ఉంటే ప్రమాద తీవ్రత ఎక్కువగా ఉండేదని కార్మికులు ఆందోళన వ్యక్తం చేస్తున్నారు. గత కొంతకాలంగా పామాయిల్ పరిశ్రమలలో నిర్వహణ లోపం ఉందని కార్మికులు తెలుపుతున్నారు. దీనిపై మరింత సమాచారం మా ప్రతినిధి రాజారావు అందిస్తారు.