ఎన్నికల ప్రచారానికి జనసేన సిద్ధం - 14 నుంచి కోస్తాలో పవన్ పర్యటన

Janasena Chief Pawan Kalyan Election Tour : జనసేన పార్టీ అధినేత పవన్ కల్యాణ్ ఎన్నికల పర్యటన ఖరారైంది. ఈ నెల 14 నుంచి పవన్​ రాష్ట్రంలో పర్యటించనుండగా ఆయా వివరాలను పార్టీ నేతలు మీడియాకు వెల్లడించారు. ఉభయగోదావరి జిల్లాల్లో జనసేన అధినేత పవన్‌ కల్యాణ్ ఈ నెల 14 నుంచి 17 వరకు పర్యటిస్తారని ఆ పార్టీ నేత పంతం నానాజీ వెల్లడించారు. 14న భీమవరం, 15 తేదీన అమలాపురం, 16న కాకినాడ, 17 రాజమహేంద్రవరంలో పార్టీ స్థానిక నేతలతో సమావేశం అవుతారని చెప్పారు. పవన్ కల్యాణ్ పర్యటనకు భద్రత కల్పించాలని కలెక్టర్, ఎస్పీలను కోరినట్లు తెలిపారు. 

ఎన్నికల మ్యానిఫెస్టో (Election Manifesto) తమ అధినేత ఈ పర్యటనలోనే ప్రకటిస్తారని నానాజీ స్పష్టం చేశారు. తెలుగుదేశం-జనసేన గెలుపే లక్ష్యంగా పని చేసేందుకు తామంతా సంసిద్ధంగా ఉన్నామన్నారు. ఎన్నికల పర్యటన నేపథ్యంలో ఉభయ గోదావరి జిల్లాలకు చెందిన జనసేన (janasena) నాయకులతో పవన్ సమావేశం అవుతారని, ఈ సారి ప్రచారం క్రియాశీలకం కానున్న తరుణంలో ముఖ్య నాయకులందరితో మాట్లాడి  సూచనలు, సలహాలు తీసుకుంటామని నానాజీ స్పష్టం చేశారు. పవన్ పర్యటనలో మేనిఫెస్టో విడుదల, పొత్తులో భాగంగా జనసేనకు కేటాయించిన సీట్ల ప్రకటన ఉంటుందని తెలిపారు.