ప్రపంచ వేదికపై ఆర్టీపీసీఆర్‌ కిట్‌ 'మేకిన్‌ ఏపీ'ని ప్రతిబింబిస్తోంది : సీఎం చంద్రబాబు - CM Inaugurates RT PCR kit

CM Chandrababu Inaugurates RT-PCR KIT : మంకీపాక్స్ వ్యాధి నిర్ధారణ కోసం పూర్తి స్వదేశీయంగా విశాఖ మెడ్ టెక్ జోన్​లో ఆర్టీపీసీఆర్ కిట్ అభివృద్ధి చేయడం అభినందనీయమని ముఖ్యమంత్రి చంద్రబాబు నాయుడు అన్నారు. సచివాలయంలో మొట్టమొదటి ఆర్టీపీసీఆర్ కిట్​ను ముఖ్యమంత్రి ఆవిష్కరించారు. విశాఖ మెడ్ టెక్ జోన్ సీఈఓ జితేంద్ర శర్మ, జోన్ ప్రతినిధులు సచివాలయంలో ముఖ్యమంత్రిని కలిశారు. ఈ సందర్భంగా ఆర్టీపీసీఆర్ కిట్​ను సీఎం చంద్రబాబు చేతుల మీదుగా ఆవిష్కరించారు. ఈ కిట్​ను తక్కువ ధరతో ప్రజలకు అందుబాటులోకి తెస్తామని మెడ్ టెక్ ప్రతినిధులు ముఖ్యమంత్రికి తెలిపారు. 

ఈ కిట్ తయారీకి ఐసీఎంఆర్, కేంద్ర ప్రభుత్వ సెంట్రల్ డ్రగ్స్ స్టాండర్డ్ కంట్రోల్ ఆర్గనైజేషన్ నుంచి అత్యవసర అంగీకారం లభించిందని సీఎం తెలిపారు. 'మేకిన్‌ ఏపీ' బ్రాండ్ రాష్ట్రానికి రావడానికి ఈ కిట్ దోహదపడుతుందన్నారు. ప్రభుత్వం నుంచి మెడ్ టెక్ జోన్​కు అన్ని విధాలా సహాయ, సహకారాలు అందిస్తామని హామి ఇచ్చారు. వినియోగదారులకు ఆర్థిక భారం లేకుండా త్వరలో సోలార్​తో నడిచే ఎలక్ట్రానికి వీల్ చైర్​ను రూపొందించనున్నట్లు మెడ్ టెక్ జోన్ ప్రతినిధులు ముఖ్యమంత్రి దృష్టికి తీసుకొచ్చారు. తక్కువ ఖర్చుతో మన్నిక గల వైద్య పరికరాలను తయారు చేయాలని ముఖ్యమంత్రి సూచించారు.