స్మార్ట్​ఫీచర్లతో కొత్త హోండా యాక్టివా- దీని స్పెషాలిటీ ఏంటో తెలిస్తే కొనకుండా ఉండలేరుగా..!

ఫుల్ టెక్నాలజీ హోండా యాక్టివా వచ్చేసింది- ధర, ఫీచర్లు ఇవే..!

New Updated Honda Activa 125: ప్రముఖ టూ-వీలర్ తయారీ సంస్థ హోండా మోటార్​సైకిల్ తన పాపులర్ యాక్టివా 125 స్కూటర్​ అప్​డేటెడ్ వెర్షన్​ను లాంఛ్ చేసింది. మారుతున్న టెక్నాలజీకి అనుగుణంగా సరికొత్త అప్​డేట్లతో కంపెనీ దీన్ని తీసుకొచ్చింది. ఈ కొత్త యాక్టివా 125 సిగ్నేచర్ సిల్హౌట్‌తో వస్తుంది. సరికొత్త కాంట్రాస్టింగ్ బ్రౌన్ సీట్లు, లోపలి ప్యానెల్‌లతో ఇది ఆకర్షణీయంగా ఉంది. దీనిలోని వ్యూ మోడ్ కస్టమర్లను మరింత ఆకట్టుకుంటుంది. కంపెనీ దీని ఎంట్రీ-లెవెల్‌ వేరియంట్‌ రూ. 94,422(ఎక్స్‌-షోరూమ్‌) ధరతో తీసుకొచ్చింది.

న్యూ టచ్ ఫర్ హోండా యాక్టివా: ప్రస్తుతం హోండా యాక్టివా 125లో LCD డిస్​ప్లే ఉండగా.. ఈ కొత్త మోడల్​ 4.2-అంగుళాల TFT డిస్‌ప్లేను కలిగి ఉంది. దీని స్పెషాలిటీ ఏంటంటే.. ఈ స్కూటర్​ను 'హోండా రోడ్​సింక్'​ యాప్​కి కనెక్ట్ చేయొచ్చు. ఇది కాల్ అలర్ట్, నావిగేషన్ అసిస్ట్ వంటి ఫీచర్లతో వస్తుంది.

అంటే స్మార్ట్​ఫోన్​కు వచ్చే కాల్స్, టెక్స్ట్ మెసెజ్​లను కూడా ఈ స్క్రీన్​ ద్వారా తెలుసుకోవచ్చు. డ్రైవింగ్ చేస్తున్న సమయంలో మొబైల్​ ఫోన్​ను 'హోండా రోడ్ సింక్ యాప్'​కు కనెక్ట్ చేయడం ద్వారా ఈ ఫీచర్ల యాక్సెస్ పొందొచ్చు. వీటితోపాటు ఈ స్కూటర్​లో USB టైప్-సి ఛార్జింగ్ పోర్ట్ కూడా ఉంది. ఇక ప్రస్తుతం మార్కెట్లో ఈ TFT డిస్​ప్లేతో టాప్ స్మార్ట్ కనెక్ట్ వేరియంట్ 125cc ఏకైక స్కూటర్​ 'TVS జూపిటర్ 125'. దీని ధర రూ.90,721.

ఇంజిన్: అప్​డేటెడ్ OBD2B ఫీచర్లతో ఈ కొత్త హోండా స్కూటర్​ వస్తుంది. ఇది OBD2B స్టాండర్డ్ ఇంజిన్ కఠినమైన ఉద్గార నిబంధనలను కలిగి ఉంది. ఇది హోండా స్కూటర్​లో ఇడ్లింగ్ స్టాప్ సిస్టమ్​ ఫీచర్​ను కూడా అందిస్తుంది. దీని సాయంతో ట్రాఫిక్ సిగ్నల్స్ వద్ద మీ స్కూటర్​ ఇంజిన్ ఆటోమేటిక్​గా ఆఫ్ అయిపోతుంది. దీంతో వినియోగదారుల వెహికల్ ఇంధన సామర్థ్యం మెరుగవుతుందని కంపెనీ చెబుతోంది. ఇందులో 123.9cc ఫ్యూయల్ ఇంజెక్టెడ్ ఇంజిన్‌ అందించారు. ఇది 8.4hp పవర్, 10.5Nm టార్క్​ను ఉత్పత్తి చేస్తుంది. అంతేకాక ఈ స్కూటర్​లో మోటార్ స్టార్ట్-స్టాప్ సిస్టమ్ కూడా ఉంది.

వేరియంట్స్:

• DLX
• H-Smart

కంపెనీ ఈ కొత్త హోండాను ప్రస్తుతం రెండు వేరియంట్లలో మాత్రమే తీసుకొచ్చింది. భవిష్యత్తులో ఫ్రంట్ డ్రమ్ బ్రేక్‌ల వంటి ఫీచర్లతో మరిన్ని వెర్షన్లను ప్రారంభించొచ్చు.

కలర్ ఆప్షన్స్: ఈ స్కూటర్​ మార్కెట్లో 6 ఆకర్షణీయమైన కలర్ ఆప్షన్లలో అందుబాటులో ఉంది.

• బ్లాక్
• మ్యాట్ యాక్సిస్ గ్రే మెటాలిక్
• పర్ల్ డీప్ గ్రౌండ్ గ్రే
• పెర్ల్ సైరన్ బ్లూ
• రెబెల్ రెడ్ మెటాలిక్
• పెర్ల్ ప్రెషియస్ వైట్

ధర: మార్కెట్లో ఈ కొత్త స్కూటర్​ DLX వేరియంట్ ధర రూ. 94,442 నుంచి ప్రారంభమవుతుంది. అయితే కీ ఫోబ్, కీలెస్ ఇగ్నిషన్‌తో టాప్ H-స్మార్ట్ వేరియంట్ ధర రూ.97,146గా కంపెనీ నిర్ణయించింది. కొత్త యాక్టివా 125 ధర ప్రస్తుతం ఉన్న మోడల్ కంటే ఎక్కువగా ఉంటుంది. దీని పాత మోడల్​ను రూ. 80,256 ప్రారంభ ధరతో (ఎక్స్​-షోరూమ్) విక్రయిస్తున్నారు. కొత్త స్కూటర్​ ధర పెరిగేందుకు ఇందులో ఖరీదైన ఎమిషన్ మానిటరింగ్ టెక్నాలజీ కూడా ఉండటాన్ని మరొక కారణంగా చెప్పొచ్చు.