Telangana Secretariat Gate Close: తెలంగాణ సచివాలయంలో ప్రధాన గేట్లు, రోడ్లలో కీలక మార్పులు చేస్తున్నారు. తూర్పు వైపు ఉన్న బాహుబలి గేటుగా పిలిచే ప్రధాన గేటును పూర్తిగా మూసివేయాలని నిర్ణయించారు. ఈశాన్యం వైపు ఇప్పుడున్న గేటు పక్కన మరోగేటు నిర్మించనున్నారు. సుమారు రూ. 3.20 కోట్లతో మార్పులకు ప్రభుత్వం శ్రీకారం చుట్టింది. సచివాలయానికి ప్రస్తుతం నాలుగు వైపుల ప్రధాన గేట్లు ఉన్నాయి. తూర్పు వైపు లుంబినీ పార్క్ ఎదురుగా ఉన్న బాహుబలి గేటు నుంచి మాజీ సీఎం కేసీఆర్ రాకపోకలు జరిపే వారు. ఆ గేటు నుంచి సచివాలయం లోపల ప్రధాన ద్వారం వరకు రాకపోకలు కొంతకాలంగా నిలిపివేశారు. ఆ మార్గంలోనే తెలంగాణ తల్లి విగ్రహంతో పాటు చుట్టూ లాన్, ఫౌంటెయిన్లు ఏర్పాటు చేస్తున్నారు.
వాస్తు కోసమేనా?: ఇక తూర్పు గేటును శాశ్వతంగా మూసివేయనున్నారు. పశ్చిమాన మింట్ కాంపాండ్ వైపున ఉన్న 3వ గేటును కొన్ని సందర్భాల్లో తక్కువగా ఉపయోగిస్తున్నారు. అటువైపు ఎలాంటి మార్పులు చేయడం లేదు. మెయిన్ రోడ్డు వైపు ఉండే సౌత్-ఈస్ట్ గేటు నుంచి సచివాలయం సిబ్బంది, సాధారణ ప్రజల రాకపోకలు యథావిధిగా కొనసాగుతాయి. ముఖ్యమంత్రి, మంత్రులు, సీనియర్ అధికారులు ప్రస్తుతం ఈశాన్యం వైపు గేటును ఉపయోగిస్తున్నారు. ఆ గేటు పక్కనే మరో గేటు నిర్మించనున్నారు. ఒక గేటు నుంచి లోనికి వెళ్లి మరో గేటు నుంచి బయటకు వేళ్లేలా ప్రణాళిక చేశారు. ఈశాన్యం, ఆగ్నేయం గేట్లను కలుపుతూ ఒక రోడ్డు కూడా నిర్మిస్తున్నారు. తెలంగాణ తల్లి విగ్రహం ఏర్పాటు, వాస్తు కారణంగా ఈ మార్పులు చేర్పులు చేస్తున్నట్లు తెలుస్తోంది.
గేటు మార్చేందుకు రూ.4 కోట్లా?: సచివాలయంలో వాస్తు దోషం ఉందని ఒక్క గేట్ మార్చేందుకు నాలుగు కోట్ల రూపాయలు ఖర్చు పెడుతున్నారని మాజీమంత్రి, బీఆర్ఎస్ శాసనసభ్యుడు హరీష్ రావు ఆక్షేపించారు. సచివాలయంలో మార్పులపై ఆయన ఎక్స్ వేదికగా స్పందించారు. గ్రీన్ టెక్నాలజీతో ఫైర్ సేఫ్టీతో దేశానికే తలమానికమైన కొత్త సచివాలయం నిర్మించినట్లు పేర్కొన్నారు. అప్పుడు వాస్తు పిచ్చి అని రేవంత్ రెడ్డి గాయ్ గాయ్, గత్తర గత్తర చేశారని గుర్తు చేశారు. ఇప్పుడు సీఎంగా సచివాలయానికి పూటకో మార్పు చేస్తున్నారని హరీష్ రావు ఎద్దేవా చేశారు. వాస్తు దోషం ఉందని ఒక్క గేట్ మార్పు చేయడానికి నాలుగు కోట్లు ఖర్చు పెడుతున్నారని అన్నారు. ఇది కదా అసలు సిసలైన కాంగ్రెస్ మార్కు 'మార్పు' అని హరీష్ రావు వ్యాఖ్యానించారు.
అమరావతి ఐకానిక్ నిర్మాణాలకు త్వరలోనే టెండర్లు - డిజైన్ల విషయంలో ప్రభుత్వం కీలక నిర్ణయం
