డీఎస్సీ అభ్యర్థులకు అలర్ట్ - ఎల్లుండి నుంచి హాల్​ టికెట్లు ఇక్కడ డౌన్​లోడ్​ చేసుకోండి - TG DSC Hall Tickets 2024

TG DSC Recruitment 2024 : తెలంగాణ డీఎస్సీ విషయంలో అటు రాష్ట్ర ప్రభుత్వం​, ఇటు అభ్యర్థులు ఎవరూ తగ్గటం లేదు. పరీక్షల విషయంలో గత కొంతకాలంగా తీవ్ర గందరగోళం నెలకొన్న విషయం తెలిసిందే. ఇప్పటికే పాఠశాల విద్యాశాఖ పరీక్షల షెడ్యూల్​ స్పష్టం​ చేయటమే కాకుండా, అందుకు తగ్గట్టు ఏర్పాట్లను సైతం చేస్తోంది. ఈ క్రమంలోనే ఎల్లుండి నుంచి అధికారిక వెబ్​సైట్​లో డీఎస్సీ హాల్‌టికెట్లను ఉంటాయని వెల్లడించింది.

TG DSC Hall Tickets 2024 : తెలంగాణలో నిర్వహించనున్న డీఎస్సీ పరీక్షకు హాల్‌టికెట్లు ఈనెల 11వ తేదీ సాయంత్రం నుంచి వెబ్‌సైట్​లో అందుబాటులో ఉంటాయని పాఠశాల విద్యాశాఖ సంచాలకుడు ఈవీ నర్సింహారెడ్డి తెలిపారు. ఈనెల 18 నుంచి ఆగస్టు 5 వరకు ఆన్‌లైన్‌ విధానంలో పరీక్షలు నిర్వహిస్తామని ఇటీవల విద్యాశాఖ షెడ్యూల్‌ను ప్రకటించింది.

డీఎస్సీ హాల్‌టికెట్లను www.schooledu.telangana.gov.in వెబ్‌సైట్‌ నుంచి డౌన్‌లోడ్‌ చేసుకోవచ్చని పేర్కొంది. ఈ ఏడాది ఫిబ్రవరి 29న మొత్తం 11,062 పోస్టుల భర్తీకి సర్కారు డీఎస్సీ నోటిఫికేషన్ ఇచ్చిన విషయం తెలిసిందే. ఈ మేరకు మార్చ్ 4 నుంచి జూన్ 20 వరకు దరఖాస్తులు స్వీకరించిన విద్యాశాఖ, ఈ నెల 18 నుంచి సీబీటీ బేసిడ్​ టెస్ట్​ నిర్వహించనుంది.

TJS Chief Kodandaram React on DSC Issue : పోటీ పరీక్షల అభ్యర్థులు ఎదుర్కొంటున్న సమస్యలను ప్రొఫెసర్ హరగోపాల్​తో కలిసి టీజీపీఎస్సీ కమిషన్ చైర్మన్ దృష్టికి తీసుకెళ్లామని టీజేఎస్​ అధ్యక్షుడు ఆచార్య కోదండరాం తెలిపారు. కమిషన్ ఛైర్మన్ మహేందర్​ రెడ్డి అన్ని విషయాలను సీరియస్​గా విన్నారని, విద్యార్థుల అవేదన, ఆందోళన గురించి వివరించామని చెప్పారు.

ఈ క్రమంలోనే గ్రూపు-1 జాబ్స్​ కోసం 1:100 నిష్పత్తిలో పిలవాలని కోరామని వెల్లడించారు. డీఎస్సీ, గ్రూపు -2 మధ్య సమయం తక్కువగా ఉందని, డీఎస్సీని, గ్రూపు-2ని వాయిదా వేసి ఈ రెండు పరీక్షల మధ్య కొంత వ్యవధి ఉంటే విద్యార్థులకు న్యాయం జరుగుతుందని వివరించినట్లు కోదండరాం పేర్కొన్నారు. మహేందర్ రెడ్డి అన్ని అంశాలను కూలంకషంగా చర్చించి నిర్ణయం తీసుకుంటామని చెప్పారన్నారు.

DSC Aspirants Protest in Hyderabad : మరోవైపు డీఎస్సీ పరీక్షలు వాయిదా వేయాలంటూ, సోమవారం డైరెక్టర్ అఫ్ స్కూల్ ఎడ్యుకేషన్ ఎదుట ఆందోళన చేపట్టిన అభ్యర్థులను, హైదరాబాద్‌లోని పేట్లబురుజులోని సీఏఆర్ హెడ్‌ క్వార్టర్స్​కు తరలించారు. రాత్రి అవుతున్నా విడుదల చేయకుండా, కనీసం తాగేందుకు నీరు కూడా ఇవ్వకుండా ఇబ్బందలకు గురిచేస్తున్నారంటూ అభ్యర్ధులు ఆందోళనకు దిగారు. అనంతరం వారిని 9గంటల సమయంలో విడిచిపెట్టారు. ఇదే సమయంలో బీఆర్ఎస్​ సోషల్ మీడియా కన్వీనర్ మన్నె క్రిషాంక్ అక్కడికి చేరుకోగా, స్వల్ప ఉద్రిక్తత చోటుచేసుకుంది.

పోలీసులు క్రిషాంక్​కు నచ్చజెప్పి అక్కడ నుంచి పంపించి వేశారు. అనంతరం డీఎస్సీ అభ్యర్ధులు ర్యాలీగా ఉస్మానియా యూనివర్సిటికి వెళ్లారు. ఆర్స్ట్ కళాశాల వద్ద, అర్ధరాత్రి వరకు శాంతియుత నిరసన చేపట్టారు. విద్యార్ధులకు మద్దతుగా బీఆర్ఎస్ నేత రాకేశ్​ రెడ్డి సంఘీభావం తెలిపారు. కాంగ్రెస్ ప్రభుత్వం ఇచ్చిన హామీలు నెరవేర్చకుండా ఉండటమే కాకుండా విద్యార్ధులు భవిష్యత్తుతో ఆడుకుంటుందని విద్యార్థి సంఘ నాయకులు, డీఎస్సీ అభ్యర్థులు ఆరోపించారు.