Students Walked 18 km And Complained to The Collector On Principal : తెలంగాణలోని జోగులాంబ గద్వాల జిల్లా ఎర్రవల్లి మండలం బీచుపల్లిలోని ప్రభుత్వ బాలుర గురుకుల పాఠశాల విద్యార్థులు 200 మంది ఆందోళన బాట పట్టారు. ప్రిన్సిపల్ శ్రీనివాస్‌ తమను వేధిస్తున్నారని, ఆయనపై చర్యలు తీసుకోవాలని కలెక్టర్ సంతోష్‌కు ఫిర్యాదు చేశారు. ఈ నేపథ్యంలో వారు మంగళవారం పాఠశాల, కళాశాల ప్రహరీ దూకి కాలినడకన బీచుపల్లి నుంచి గద్వాలలోని కలెక్టరేట్‌కి 18 కి.మీ. పాదయాత్ర ద్వారా చేరుకుని సమస్యలు విన్నవించుకున్నారు.
అ తర్వాత విద్యార్థులు (students) తాము ఎందుకు ఇలా బయటకు వచ్చింది చెప్తూ మీడియాతో మాట్లాడారు. ఈ క్రమంలో ప్రిన్సిపాల్ నిత్యం క్రమశిక్షణ పేరుతో విద్యార్థులను వేధిస్తూ కొడుతున్నారని ఆరోపించారు. స్టడీ మెటీరియల్‌ కూడా పంపిణీ చేయలేదని, విద్యాబోధన సక్రమంగా లేదన్నారు. గురుకులంలో విద్యార్థులందరికి మరుగుదొడ్లు సరిపడా లేకపోవడంతో వారు బహిర్భూమికి చెట్లు, గుట్టల్లోకి పోతున్నామని విద్యార్థులు వాపోయారు. తమకు రోజూ మెనూ ప్రకారం భోజనం పెట్టడం లేదని ఆరోపించారు. తమ సమస్యలు అన్నింటినీ కలెక్టర్ దృష్టికి తీసుకురావడానికే విద్యార్థులంతా పాదయాత్రగా ఇక్కడి వచ్చామని తెలిపారు.
అంతే కాకుండా తమ పాఠశాల ప్రిన్సిపల్ 6వ తరగతిలో మిగిలిన సీట్లను అమ్ముకున్నారని, తమ వద్ద ఆధారాలు ఉన్నాయని విద్యార్థులు వివరించారు. విద్యార్థులను గద్వాల ఎమ్మెల్యే కృష్ణమోహన్‌రెడ్డి వీరాపురం స్టేజీ వద్ద కలిసి, సమస్యలు తెలుసుకుని కలెక్టర్‌తో ఫోన్‌లో మాట్లాడారు. మధ్యలో ఇటిక్యాల పోలీసులు, రెవెన్యూ సిబ్బంది వారించి వివరాలు తెలుసుకునేందుకు ప్రయత్నించినా విద్యార్థులు ర్యాలీ కొనసాగించారు. సుమారు 200 మంది ర్యాలీగా (Rally) వెళ్తుండటంతో పోలీసులు బందోబస్తుగా వెళ్లారు.
విద్యార్థులను ఇబ్బంది పెట్టలేదు : ప్రిన్సిపల్ శ్రీనివాస్‌ను దీనిపై వివరణ కోరగా విద్యార్థులు ఉపాధ్యాయుల అనుమతిలేకుండా బయటకు వెళ్లి చెడు అలవాట్లు చేసుకుంటుండటంతో హెచ్చరించానన్నారు. అందులో భాగంగానే ఓ విద్యార్థికి టీసీ ఇచ్చి పంపించామన్నారు. అంతే కానీ విద్యార్థులను ఎటువంటి ఇబ్బందులు పెట్టలేదని వివరించారు.
'టీచర్లు బూతులు తిడుతున్నారు- అమ్మాయిలను అసభ్యంగా పిలుస్తున్నారు' - Students Complaint on Teacher
