ఆకాశంలో సైకిల్ తొక్కొచ్చు - పక్షిలా ఎగరొచ్చు - విశాఖలో ఇవి అస్సలు మిస్ కావద్దు

విశాఖలో సందర్శకులను అలరిస్తోన్న స్కై సైకిలింగ్, జిప్‌లైనర్‌ - జల విన్యాసాల కోసం ఆహ్వానిస్తోన్న రుషికొండ బీచ్‌

SKY CYCLING AT KAILASAGIRI: ఆంధ్రప్రదేశ్‌ పర్యాటక రాజధానిగా విశాఖపట్నంను తీర్చిదిద్దాలనే ప్రభుత్వ ఆలోచనల మేరకు సిటీ అందంగా ముస్తాబవుతోంది. పర్యాటక శాఖ ఉన్నతాధికారులు ఒక్కో అడ్వెంచర్‌ను స్పెషల్ అట్రాక్షన్​తో అందుబాటులోకి తెస్తున్నారు. కైలాసగిరి వద్ద స్కై సైకిలింగ్ (Sky cycling), జిప్‌లైనర్‌ (ZIPLINER) సందర్శకులను ఎంతగానో ఆకర్షిస్తోంది. సముద్రంలో జల విన్యాసాల కోసం ఎంతో అందమైన, ఆహ్లాదకరంగా ఉండే రుషికొండ బీచ్‌ పర్యాటకులను కట్టిపడేస్తోంది.

రయ్‌రయ్​మంటూ దూసుకుపోవచ్చు: చాలా కాలం తర్వాత మళ్లీ పునఃప్రారంభమైన స్కూబా డైవింగ్‌ (Scuba Diving)కు పలువురు పర్యాటకులు ఆసక్తి చూపుతూ వాటిలో పాల్గొని సరదాగా గడుపుతున్నారు. కొన్ని రోజుల క్రితమే పారామోటార్‌ (Para Motor)ని కూడా అందుబాటులోకి తీసుకువచ్చారు. దీని సాయంతో ఆకాశంలో ఓ పక్షిలాగా విహరిస్తూ ఆ పచ్చటి కొండల మీదుగా విశాఖ నగర అందాలను ఎంచక్కా వీక్షించొచ్చు. సముద్ర అలలపై స్పీడ్‌ బోట్‌ (Speed Boat)తో రయ్‌రయ్​మంటూ దూసుకెళ్లొచ్చు.

ఆ ఫీలింగ్​ మాటల్లో వర్ణించలేం: విశాఖ నగరానికి దేశంలోని వివిధ ప్రాంతాల నుంచి రోడ్డు, రైలు, విమాన మార్గాల్లో సులభంగా చేరుకోవచ్చు. కావాలంటే మంచి అనూభూతి కోసం చెన్నై నుంచి సముద్ర మార్గంలో ప్రయాణించే క్రూయిజ్​ షిప్​లోనూ రావచ్చు. విశాఖకు చేరుకున్న తరువాత మొదటగా ఆర్కే బీచ్ చేరుకొని అక్కడ తెల్లవారుజామున ఉదయించే సూర్యుడిని చూస్తే ఆ ఫీలింగ్​ని మాటల్లో వర్ణించలేము. అలా అలలను చూస్తూ ఎంతసేపైనా అక్కడే చెట్లకింద కూర్చోవాలి అనుపిస్తూ ఉంటుంది. సముద్రం లోపల నుంచి సూర్యుడు జన్మిస్తున్నాడా అన్నట్లు ఉండే ఆ అందమైన విజువల్స్​ని జీవితాంతం గుర్తుండేలా మొబైల్​లో బంధించకుండా ఉండలేరు. లేలేత కిరణాలు కొత్త అనుభూతిని కలిగిస్తాయి.

ఆర్కే బీచ్​ దగ్గరలోనే ఐఎన్‌ఎస్‌ కుర్‌సుర సబ్‌మెరైన్‌ మ్యూజియం (INS Kursura Submarine Museum) ఉంటుంది. దానికి ఎదురుగానే ఎయిర్‌ క్రాఫ్ట్‌ మ్యూజియాన్ని సైతం చూడొచ్చు. ఈ రెండూ భారత నేవీ, ఎయిర్‌ఫోర్స్‌లో విశిష్ట సేవలు అందించాయి. ఈ మ్యూజియాలను వీక్షించడం ద్వారా అనేక విషయాలు తెలుసుకోవచ్చు. ఇవి అసలు మన రక్షణ దళాలకు ఏ విధంగా సేవలు అందించాయి, వీటిని ఎలా వాడుతారు వంటి వాటిని అందులో ఉండే గైడ్ ఎంతో చక్కగా వివరిస్తారు.

ఇదే బీచ్​ రోడ్డులో ప్రయాణిస్తుంటే ఫిషింగ్ హార్బర్ సైతం చూడొచ్చు. విశాఖకు చేరుకున్న రోజే ఆర్టీసీ బస్టాండ్, జగదాంబ సెంటర్, ఆర్​కే బీచ్‌కి దగ్గర్లో ఎక్కడైనా బస ఉండేందుకు హోటల్​ తీసుకుంటే అన్ని ప్రదేశాలు తిరగడానికి సౌకర్యంగా ఉంటుంది. ఇలా ఒక్క రోజే దగ్గరలోని పలు ప్రదేశాలను చుట్టి రావొచ్చు.