పేర్ని నాని గోడౌన్​లో రేషన్ బియ్యం మాయం కేసు - దూకుడు పెంచిన పోలీసులు

పేర్ని నాని భార్య గోదాములో రేషన్ బియ్యం మాయం కేసులో పోలీసుల దూకుడు - నిందితులను కస్టడీకి ఇవ్వాలని కోరిన పోలీసులు

Police Custody Petition in Perni Nani Ration Rice Case: మాజీ మంత్రి పేర్ని నాని కుటుంబానికి చెందిన గోడౌన్‌లో రేషన్ బియ్యం మాయం కేసులో పోలీసులు దూకుడు పెంచారు. ఈ కేసులో అరెస్టు చేసిన నలుగురు నిందితులను 5 రోజులు కస్టడీకి కావాలంటూ మచిలీపట్నం జిల్లా కోర్టులో పోలీసులు పిటిషన్ దాఖలు చేశారు. ఈ క్రమంలో పిటిషన్​పై విచారించిన న్యాయస్థానం తదుపరి విచారణను ఈ నెల 6వ తేదీకి వాయిదా వేసింది. ప్రస్తుతం జిల్లా జైలులో ఏ2 మానస్‌ తేజ్, ఏ3 కోటిరెడ్డి, ఏ4 మంగారావు, ఏ5 బాలాంజనేయులు రిమాండ్​లో ఉన్నారు. నిందితులను న్యాయస్థానం కస్టడీకి అనుమతి ఇస్తే కేసులో దర్యాప్తు మరింత ముందుకు వెళ్లే అవకాశం ఉంది.

విచారణకు హాజరైన పేర్ని జయసుధ: కాగా ఈ కేసులో ఇప్పటికే పేర్ని జయసుధ బందరు తాలుకా పీఎస్‌లో విచారణకు హాజరయ్యారు. సుమారు 2 గంటలకు పైగా సీఐ ఏసుబాబు పేర్ని జయసుధను విచారించారు. అవసరమైతే మరోసారి విచారణకు పిలుస్తామని వెల్లడించారు. ఈ రేషన్‌ బియ్యం మాయం కేసులో పేర్ని జయసుధ ఏ1గా ఉన్నారు. ఇప్పటికే ఆమెకు ముందస్తు బెయిల్‌ మంజూరు చేసిన న్యాయస్థానం పోలీసుల విచారణకు సహకరించాలని ఆదేశించింది.

ప్రభుత్వ వాహనంలో విచారణకు: పేర్ని జయసుధ విచారణకు మేయర్​ కారులో రావడం చర్చనీయాంశంగా మారింది. అలాగే విచారణ సందర్బంగా పీఎస్​ ఎదుట వైఎస్సార్సీపీ కార్యకర్తలు హల్​చల్​ చేశారు. ఎంతసేపు విచారిస్తారని ఆగ్రహం వ్యక్తం చేశారు. విచారణ జరుగుతున్న గదిలోకి వెళ్లేందుకు యత్నించారు. అయితే వారిని పోలీసులు పంపించారు. అనారోగ్యంతో ఉన్న వ్యక్తిని ఎంతసేపు విచారిస్తారని ఆమె లాయర్లు ప్రశ్నించారు.

Police Case on Perni Nani : రేషన్‌ బియ్యం మాయం వ్యవహారంలో వైఎస్సార్సీపీ నేత, మాజీ మంత్రి పేర్ని నానిపై కేసు నమోదైంది. ఆయణ్ని ఏ6గా బందరు తాలూకా పోలీస్ స్టేషన్​లో కేసు నమోదు చేశారు. ఈ కేసులో అరెస్టై రిమాండ్​లో ఉన్న నలుగురు నుంచి సేకరించిన సమాచారం మేరకు పేర్ని నాని పేరును A-6గా చేరుస్తూ పోలీసులు కేసు నమోదు చేశారు. పేర్ని నాని ఆదేశాల మేరకే మిల్లర్ నుంచి లారీ డ్రైవర్‌కు, లారీడ్రైవర్ నుంచి నిందితులకు నగదు లావాదేవీలు జరిగినట్లు పోలీసులు గుర్తించారు. ఫోన్ పే, ఆన్‌లైన్ బ్యాంకు లావాదేవీలను సేకరించారు.