రాధాకిషన్ రావు ఇంట విషాదం - తల్లి అంత్యక్రియల్లో పాల్గొనేందుకు మాజీ డీసీపీకి మధ్యంతర బెయిల్‌ - Radhakishan Rao Mother Passed Away

Phone Tapping Accuse Radhakishan Rao Mother Died : ఫోన్ ట్యాపింగ్ కేసులో నిందితునిగా ఉన్న టాస్క్‌ఫోర్స్‌ మాజీ డీసీపీ రాధాకిషన్‌రావు తల్లి సరోజినీ దేవి ఇవాళ మృతి చెందారు. అనారోగ్యరీత్యా ఆదివారం రాత్రి కరీంనగర్‌లోని ప్రైవేటు ఆస్పత్రిలో చేరిన ఆమె, చికిత్సపొందుతూ ఇవాళ తుదిశ్వాస విడిచారు. ఈ నేపథ్యంలో తన తల్లి అంత్యక్రియలకు హాజరయ్యేందుకు అనుమతించాలని కోరుతూ రాధాకిషన్​రావు నాంపల్లి కోర్టును అభ్యర్థించగా, రేపు సాయంత్రం 6 వరకు బెయిల్‌ మంజూరు అయ్యింది.

Phone Tapping Accuse Radhakishan Rao Mother Passed Away : ఫోన్ ట్యాపింగ్ కేసులో నిందితునిగా ఉన్న రిటైర్డ్ డీసీపీ పి. రాధాకిషన్ ​రావుకు మాతృ వియోగం కలిగింది. అనారోగ్యంతో బాధ పడుతున్న ఆమె కరీంనగర్​లోని ఓ ప్రైవేటు ఆసుపత్రిలో చికిత్స పొందుతూ సోమవారం ఉదయం మరణించింది. జనగామ జిల్లా చిల్పూరు మండలం పల్లెగుట్టకు చెందిన రాధాకిషన్​రావు పదోన్నతి పొందుతూ డీసీపీ స్థాయికి ఎదిగారు.

తెలంగాణ ప్రభుత్వం దర్యాప్తు చేయిస్తున్న ఫోన్ ట్యాపింగ్ కేసులో ఆయన నిందితునిగా ఉన్నారు. ఇటీవలే తన తల్లి అనారోగ్యంతో బాధపడుతున్నారని కోర్టు అనుమతి తీసుకున్న రాధాకిషన్​రావు కరీంనగర్​లోని ప్రైవేటు ఆసుపత్రికి వచ్చి పరమర్శించారు. 98 ఏళ్ల వయసు ఉన్న సరోజనమ్మ నూరేళ్ల పాటు జీవించాలని కుటుంబ సభ్యులు ఆశించారు.

Radhakishan Rao Mother Died : వీరి కుటుంబంలో చాలా మంది దీర్ఘాయుష్షు అందుకున్న వారే కావడంతో సరోజనమ్మ కూడా నిండు నూరేళ్లు బ్రతకాలని వారసులు ఆకాంక్షించారు. అయితే కొంతకాలంగా అనారోగ్యంతో బాధ పడుతున్న సరోజనమ్మకు కరీంనగర్ లోని ఓ ప్రైవేటు ఆసుపత్రిలో చికిత్స అందిస్తున్నపటికీ ఫలితం లేకుండా పోయింది.

ఆమె మరణించిన సమాచారం అందుకున్న రాధాకిషన్​రావు తన తల్లిని చివరి చూపు చూసేందుకు అనుమతించాలని కోరుతూ కోర్టులో పిటిషన్ వేయించారు. అత్యవసర పిటిషన్​ను విచారించి తన తల్లి అంత్యక్రియలకు హాజరయ్యేందుకు అనుమతించాలని కోరుతూ రాధాకిషన్​రావు నాంపల్లి కోర్టును అభ్యర్థించారు.

Former DCP Radhakishan Rao granted interim bail : ఈక్రమంలోనే తన తల్లి అంత్యక్రియల్లో పాల్గొనేందుకు రాధాకిషన్​రావుకు మధ్యంతర బెయిల్ మంజూరు అయ్యింది. మంగళవారం సాయంత్రం 6 వరకు కోర్టు ఎస్కార్ట్ బెయిల్ మంజూరు చేస్తూ ఉత్తర్వులు జారీ చేసింది.

ప్రస్తుతం కరీంనగర్ ఆసుపత్రిలో సరోజనమ్మ మృతదేహాన్ని ఫ్రీజర్​లో ఉంచారు. కోర్టు ఆదేశాల అనంతరం ఆమె శవాన్ని స్టేషన్​ఘన్​పూర్ సమీపంలోని పల్లెగుట్టకు తీసుకెళ్లనున్నారు. స్వగ్రామంలో అంత్యక్రియలు నిర్వహించేందుకు బంధువులు ఏర్పాట్లు చేస్తున్నారు.

ఇటీవల మాజీ డీసీపీ రాధాకిషన్‌రావు తన వాంగ్మూలంలో సంచలన విషయాలు వెల్లడించిన విషయం తెలిసిందే. మునుగోడు ఉపఎన్నిక వేళ బీజేపీకి చెక్‌పెట్టేందుకు అప్పటి ముఖ్యమంత్రి కేసీఆర్‌ ప్రణాళిక, ఎమ్మెల్యేల కొనుగోలు వ్యవహారం ఆపరేషన్‌కు సంబంధించి ఆయన వ్యూహాలను వివరించారు. బీజేపీ నేత బీఎల్​ సంతోష్‌ను అరెస్టు చేయాలని చూసినా కొందరు అధికారుల వైఫల్యంతోనే అది సాధ్యపడలేదని తెలిపారు.