జీఎస్టీ కౌన్సిల్ సమావేశం - 8 అంశాలపై ప్రతిపాదనలు చేసిన ఏపీ ప్రభుత్వం - ap PROPOSALS in GST COUNCIL MEETING

AP PROPOSALS IN GST COUNCIL MEETING: జీఎస్టీ కౌన్సిల్ సమావేశంలో 8 అంశాలపై ఆంధ్రప్రదేశ్​ ప్రభుత్వం కీలక ప్రతిపాదనలు చేసింది. ఈ మేరకు ఏపీ తరపున ఆర్థిక మంత్రి పయ్యావుల కేశవ్ ప్రతిపాదనలను కమిటీ ముందుంచారు. పేదలకు ఊరటనిచ్చేలా జీఎస్టీ వెసులుబాటు ఉండాలని, కీలక రంగాలకు ప్రొత్సహం ఇవాలని, ఏపీకి ప్రయోజనం వచ్చేలా కొన్ని అంశాలపై మినహాయింపులు కోరారు.

AP PROPOSALS IN GST COUNCIL MEETING: జీఎస్టీ కౌన్సిల్ సమావేశంలో ఆంధ్రప్రదేశ్ ప్రభుత్వం తరఫున ఆర్థిక మంత్రి పయ్యావుల కేశవ్ (Payyavula Keshav) కొన్ని కీలక ప్రతిపాదనలు చేశారు. మొత్తం ఎనిమిది అంశాలపై జీఎస్టీ కౌన్సిల్ ఎదుట ప్రతిపాదనలు చేశారు. పేదలకు ఊరటనిచ్చేలా జీఎస్టీ వెసులుబాటు ఉండాలన్నారు. అదే విధంగా కొన్ని కీలక రంగాలకు ప్రొత్సహం ఇచ్చేలా వివిధ అంశాల్లో జీఎస్టీ వెసులుబాటు కోరుతూ ఏపీ ప్రభుత్వం ప్రతిపాదనలను పయ్యావుల కమిటీ ముందుంచారు.

జీఎస్టీ నుంచి మినహాయించాలి: ఏపీకి ప్రయోజనం వచ్చేలా కొన్ని అంశాలపై జీఎస్టీ మినహాయింపులను కోరారు. వచ్చే జీఎస్టీ కౌన్సిల్ సమావేశాన్ని ఏపీలో నిర్వహించాలని జీఎస్టీ కౌన్సిల్ నిర్వాహకులకు ఏపీ ఆర్థిక మంత్రి పయ్యావుల కేశవ్ ఆహ్వానం అందించారు. ఏపీ ఔట్ సోర్సింగ్ ఉద్యోగుల కార్పొరేషన్ సేవలపై ఉన్న జీఎస్టీని మినహాయించాలని కోరారు. మద్యం తయారీలో వినియోగించే ఎక్స్ ట్రా న్యూట్రల్ ఆల్కహాల్​ను జీఎస్టీ నుంచి మినహాయించి వ్యాట్ పరిధిలోకి తేవాలని కౌన్సిల్​ని విజ్ఞప్తి చేశారు.

జీవిత, ఆరోగ్య బీమాలపై 15 శాతంగా ఉన్న జీఎస్టీని 5 శాతానికి తగ్గించాలనీ కోరారు. వృద్ధులు, మానసిక వికలాంగులకు జీవిత, ఆరోగ్య బీమాలపై ఉన్న జీఎస్టీ పన్నును మినహాయించాలనీ ప్రతిపాదించారు. ఆరోగ్య, జీవిత బీమాలపై జీఎస్టీలో వెసులుబాటు కల్పిస్తే సామాన్య ప్రజలకు భారం తగ్గుతుందని పయ్యావుల కేశవ్ అభిప్రాయం వ్యక్తం చేశారు. ఎలక్ట్రిక్ వాహనాల విడి భాగాలపై ప్రస్తుతం 18 శాతంగా ఉన్న జీఎస్టీని 5 శాతానికి కుదించాలని కోరారు.

ఈవీ (Electric Vehicle) ఛార్జింగ్ స్టేషన్ల పైనా జీఎస్టీని తగ్గించాలనీ స్పష్టం చేశారు. ఈవీ రంగానికి జీఎస్టీ నుంచి వెసులుబాటు కల్పించి పర్యావరణహిత పరిస్థితికి ఊతం ఇచ్చేలా చూడాలని కౌన్సిల్​కు విజ్ఞప్తి చేశారు. జీఎస్టీ చట్టం సెక్షన్ 16(4) ఉన్న ఇబ్బందులను తొలగించి పన్ను చెల్లింపుదారుల ప్రయోజనాలను కాపాడాలని పయ్యావుల కోరారు. విద్యా సంస్థలు, యూనివర్శిటీల్లో శాస్త్ర సాంకేతికతను ప్రొత్సహించేందుకు వచ్చే గ్రాంట్లపై జీఎస్టీ నుంచి మినహాయించాలనీ సూచించారు.